.jpg)
លោកគួច ចំរើនផ្តល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋក្នុងឃុំកំពេញ ស្រុកស្ទឹងហាវនាថ្ងៃទី១៨ ខែឧសភា។ រូបថត៖ រដ្ឋបាលខេត្តព្រះសីហនុ
ព្រះសីហនុៈ អភិបាលខេត្តព្រះសីហនុ លោក គួច ចំរើន បានណែនាំប្រជាពលរដ្ឋឱ្យមានការប្រុងប្រយ័ត្នពីគ្រោះថ្នាក់ចរាចរណ៍ក្នុងព្រះសីហនុ ព្រោះគ្រោះថ្នាក់នេះបានឆក់យកអាយុជីវិតមនុស្សគួរឱ្យកត់សម្គាល់ ក្នុងរយៈពេលប៉ុន្មានខែចុងក្រោយនេះ ទោះបីរដ្ឋបាលខេត្តបានធ្វើការផ្សព្វផ្សាយអប់រំយ៉ាងណាក៏ដោយ។
ការណែនាំនេះត្រូវបានធ្វើឡើងនាថ្ងៃទី ១៨ ខែឧសភា ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ និងមោឃភាពបណ្ណសម្គាល់សិទ្ធិកាន់កាប់ដីធ្លី ឬបណ្ណសម្គាល់សិទ្ធិកាន់កាប់អចលនវត្ថុជូនប្រជាពលរដ្ឋក្នុងភូមិ ១ ភូមិ ២ ឃុំកំពេញ ស្រុកស្ទឹងហាវ ខេត្តព្រះសីហនុ។
លោកបានថ្លែងថា៖«គ្រោះថ្នាក់ចរាចរណ៍ នៅតែកើតមានបានឆក់យកអាយុជីវិតប្រជាពលរដ្ឋ មានដូចជា ខែមករា ស្លាប់៨នាក់ កុម្ភៈ ១៣នាក់ មីនា៧នាក់ មេសា៨នាក់ ខែឧសភាត្រឹមថ្ងៃទី១៨ ស្លាប់១០នាក់ ដូច្នេះត្រូវពាក់មួកសុវត្ថិភាព ពាក់ខ្សែក្រវាត់ឱ្យបានត្រឹមត្រូវ ចូលរួមគោរពច្បាប់ចរាចរណ៍ឱ្យបានជាប់ជាប្រចាំ បើស្រឹវឹងសូមកុំបើកបរ បើបើកបរសូមកុំពិសាគ្រឿងស្រវឹង»។ នេះបើយោងតាមរដ្ឋបាលខេត្តព្រះសីហនុ។
ពាក់ព័ន្ធនឹងការក្រើនរំឭកឱ្យមានការប្រុងប្រយ័ត្នចំពោះគ្រោះថ្នាក់ចរាចរណ៍នោះដែរ លោកស្រី មិន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការជាតិ សុវត្ថិភាពចរាចរណ៍ផ្លូវគោកនៅថ្ងៃទី១៨ ខែឧសភានេះ បានផ្ញើសារដល់អ្នកប្រើផ្លូវទាំងអស់ ប្រុងប្រយ័ត្នការពារអាយុជីវិត កាយសម្បទា និងទ្រព្យសម្បត្តិគ្រួសារ ដោយប្រកាន់ខ្ជាប់នូវស្មារតីគោរពច្បាប់ចរាចរណ៍ និងធ្វើដំណើរដោយប្រុងប្រយ័ត្នគ្រប់ពេលវេលា និងគ្រប់ស្ថានភាពផ្លូវ។
លោកស្រីបញ្ជាក់ថា៖«ត្រូវគោរពច្បាប់ និងវិធានសុវត្ថិភាពចរាចរណ៍ កុំបើកហួសល្បឿនកំណត់ គោរពសិទ្ធិអាទិភាព ត្រូវឈប់មើលឆ្វេងស្តាំនៅផ្លូវប្រសព្វ មុនបត់ ឬជែង ត្រូវប្រាកដថា មានសុវត្ថិភាព ត្រូវគោរពទិស និងសញ្ញាចរាចរណ៍ ប្រកាន់ស្តាំជានិច្ច បើពិសាគ្រឿងស្រវឹង គឺកុំបើកបរ ត្រូវពិនិត្យលើបច្ចេកទេសយានយន្តមុនចេញដំណើរ ពាក់មួកសុវត្ថិភាពជានិច្ចពេលជិះម៉ូតូ និងកុំបើកបរពេលងងុយ»។
ក្នុងពិធីចែកបណ្ណកម្មសិទ្ធិដីធ្លីនោះ លោកគួច ចំរើន ក៏បានលើកទឹកចិត្តឱ្យពលរដ្ឋ ចូលរួមសហការដោះស្រាយបញ្ហាដីធ្លីក្រៅប្រព័ន្ធតុលាការ ស្របតាមគោលនយោបាយឈ្នះឈ្នះរបស់រាជរដ្ឋាភិបាល។ លោកបានថ្លែងថា ដីធ្លីដែលចុះបញ្ជីហើយមានសុវត្ថិភាពក្នុងការប្រើប្រាស់កាត់បន្ថយទំនាស់ដីធ្លីនៅក្នុងមូលដ្ឋាន។
លោកក៏បានថ្លែងការអរគុណដល់ប្រជាពលរដ្ឋដែលបានស្រុះស្រួលគ្នា ទទួលយកបណ្ណទៅប្រើប្រាស់ ព្រោះបណ្ណនេះមានភាពងាយស្រួលក្នុងការប្រើប្រាស់ ពង្រីកផលរបរ និងបង្កើតប្រាក់ចំណូល។ ការចុះបញ្ជីដីធ្លី ពិតជាមានអត្ថប្រយោជន៍សម្រាប់ប្រជាពលរដ្ឋជាអ្នកប្រើប្រាស់ ស្របតាមគោលនយោបាយដីធ្លី និងការកាន់កាប់ដោយស្របច្បាប់។ លោកអភិបាលខេត្ត បានប្រាប់ឱ្យពលរដ្ឋ ប្រុងប្រយ័ត្នថែរក្សាបណ្ណ ដែលទទួលបានឱ្យមានសុវត្ថិភាព។
លោកមានប្រសាសន៍ថា៖«យើងបានខិតខំកែសម្រួលចុះបញ្ជីដីធ្លី ជូនបងប្អូនប្រជាពលរដ្ឋនៅឃុំកំពេញ ប្រសិនបើយើងមិនមានកាទំនាស់គ្នា ការចេញបណ្ណរហ័សលឿន ហើយបណ្ណដែលចេញជូនបងប្អូនប្រជាពលរដ្ឋនាពេលនេះ មានជាង ៥០០បណ្ណ ភូមិ១ និងភូមិ២ ដើម្បីមានសន្តិសុខប្រកបដោយសុវត្ថិភាព»។
លោក ចេង ស្រុង ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ បានឱ្យដឹងថា ក្រុមការងារជំនាញបានវាស់វែង ចុះបញ្ជីដីធ្លី ដើម្បីផ្ដល់បណ្ណកម្មសិទ្ធិជូនប្រជាពលរដ្ឋ។ ជាលទ្ធផលការចុះបញ្ជីដីធ្លីនៅក្នុងភូមិ១ ភូមិ២ ឃុំកំពេញ លើក្បាលដីដែលគណៈកម្មការរដ្ឋបាលបានលើកសំណើផ្ដល់កម្មសិទ្ធិលើដីធ្លី ដើម្បីចេញវិញ្ញាបនបត្រសម្គាល់ម្ចាស់អចលនវត្ថុ សរុបមានចំនួន៤៦៥ក្បាលដី ក្នុងចំណោមក្បាលដី៤៨៩ក្បាលដី។ ក្នុងនោះភូមិ១ មានចំនួន២៤៤ក្បាលដី និងភូមិ២ មានចំនួន២២១ក្បាលដី៕
