វគ្គបណ្តុះបណ្តាលដល់មន្ត្រីស៊ើបអង្កេតជុំវិញនីតិវិធីនៃការស៊ើបអង្កេត និងការកំណត់ការបំពានច្បាប់នាថ្ងៃទី១៧ខែឧសភា។ រូបថត៖ កបប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) សហការជា មួយគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលី (ACCC) បានរៀបចំវគ្គបណ្តុះបណ្តាលដល់មន្ត្រីស៊ើបអង្កេតជុំវិញនីតិវិធីនៃការស៊ើបអង្កេត និងការកំណត់ការបំពានច្បាប់ដែលអាចកើតមានឡើង។
ការបណ្តុះបណ្តាលនេះត្រូវបានធ្វើឡើងនាថ្ងៃទី១៧ ខែឧសភា ដោយលោកឌឹម ថេង អគ្គនាយករងអគ្គនាយកដ្ឋានក.ប.ប និងលោកMitchell Grayson មន្ត្រីជំនាញពីគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលី ក្រោមគម្រោងកម្មវិធីអនុវត្តច្បាប់ស្តីពីការប្រកួតប្រជែងដំណាក់កាលទី៥(CLIP Phase V) ដោយមានមន្ត្រីអនុវត្តច្បាប់ និងមន្ត្រីស៊ើបអង្កេតចំនួន៤០រូប។
លោកផាន អូន អគ្គនាយកនៃអគ្គនាយកដ្ឋានក.ប.បបានមានប្រសាសន៍ថា វគ្គបណ្តុះបណ្តាលនេះគឺមានការធ្វើបទបង្ហាញពីមន្ត្រីជំនាញក្នុងការអនុវត្តច្បាប់ប្រកួតប្រជែងនៃគណៈកម្មាធិការACCCដើម្បីពង្រឹងសមត្ថភាព និងផ្តល់ចំណេះដឹងដល់មន្ត្រីស៊ើបអង្កេត និងមន្ត្រីអនុវត្តច្បាប់។
លោកបានបញ្ជាក់ថា៖«មន្ត្រីស៊ើបអង្កេត និងមន្ត្រីអនុវត្តច្បាប់កម្ពុជានឹងកាន់តែយល់ដឹងកាន់តែទូលំទូលាយ និងស៊ីជម្រៅបន្ថែមទៀតអំពីបទប្បញ្ញត្តិសំខាន់ៗ ដែលមានចែងក្នុងច្បាប់ស្តីពីការប្រកួតប្រជែងដើម្បីធ្វើយ៉ាងណាឱ្យការកំណត់បទល្មើសក្រោមច្បាប់ស្តីពីការប្រកួតប្រជែងមានភាពប្រាកដប្រជានិងស្របតាមនីតិវិធីជាធរមាន»។
លោកផាន អូន បានបន្ថែមថា ប្រធានបទទាំងនោះមានដូចជា ការកំណត់ថ្លៃលក់រាយបន្ត ការកំណត់អំពីការរំលោភបំពានច្បាប់ស្តីពីការប្រកួតប្រជែង ផែនការ និងការរៀបចំការស៊ើបអង្កេតប្រកបដោយប្រសិទ្ធភាព វិធីសាស្ត្រនៃការប្រមែប្រមូលភ័ស្តុតាង និងវិធីសាស្ត្រនៃការធ្វើសម្ភាសន៍។
រហូតមកដល់ពេលនេះ អគ្គនាយកដ្ឋានក.ប.ប.បានទទួលជំនាញការមកពីគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលី (ACCC)ចំនួន៥រូបរួចមកហើយ ដើម្បីរៀបចំបទប្បញ្ញត្តិពាក់ព័ន្ធនឹងវគ្គបណ្តុះបណ្តាលដល់មន្ត្រីអនុវត្តច្បាប់។
លោកMitchell Graysonគឺជាមន្ត្រីជំនាញការម្នាក់ក្នុងចំណោមមន្ត្រីជំនាញដែលមក(Expert Placement)ពីគណៈកម្មាធិការប្រកួតប្រជែង និងអ្នកប្រើប្រាស់អូស្ត្រាលីបានមកបំពេញការងារនៅកម្ពុជាដើម្បីចូលរួមចែករំលែកចំណេះដឹងដល់មន្ត្រីជុំវិញបច្ចេកទេស និងនីតិវិធីនានា។
លោកMitchell Graysonបានមកដល់កម្ពុជាកាលពីថ្ងៃទី៩ ខែឧសភា ហើយបេសកកម្មរបស់លោកនឹងត្រូវបញ្ចប់ថ្ងៃទី១៥ ខែមិថុនា ឆ្នាំ២០២៣។លោកនឹងចូលរួមអនុវត្តគម្រោងកម្មវិធីអនុវត្តច្បាប់ស្តីពីការប្រកួតប្រជែងដំណាក់កាលទី៥(CLIP Phase V)នេះ។
ក្រៅវគ្គបណ្តុះបណ្តាលខាងលើ លោកMitchell Graysonក៏នឹងជួយអភិវឌ្ឍផែនការ និងយុទ្ធសាស្ត្រនៃការស៊ើបអង្កេតគោលការណ៍ណែនាំនៃការកំណត់ថ្លៃលក់រាយ និងផ្តល់នូវចំណេះដឹងដល់មន្ត្រីនៃអគ្គនាយកដ្ឋានក.ប.ប.តាមរយៈការបណ្តុះបណ្តាលលើប្រធានបទមួយចំនួនទៀតផង។ នេះបើតាមការប្រកាសរបស់អគ្គនាយកដ្ឋានក.ប.ប៕
.jpg)
