អ្នកចូលរួមក្នុងពិធីក្រុងពាលីសាងសង់ទីតាំងថ្មី CPU កាលពីថ្ងៃទី១៧ឧសភា។ រូបថត CPU
ភ្នំពេញៈ អង្គភាពការពារកុមារ (CPU) ចាប់ផ្តើមសាងសង់អគារថ្មី ដើម្បីបង្កើតមជ្ឈមណ្ឌលដំបូងគេបំផុតនៅកម្ពុជា ដែលនឹងផ្តល់សេវាកម្មគាំពារ និងគាំទ្រល្អិតល្អន់បំផុតដល់កុមារ ដែលបានរងគ្រោះពីអំពើរំលោភបំពានផ្លូវភេទ និងរាងកាយ ដោយមជ្ឈមណ្ឌលថ្មីនេះ នឹងបំពាក់ឧបករណ៍ទំនើបសម្រាប់ជួយក្នុងការធ្វើកោសល្យវិច័យ និងនីតិវិធីនៃការស៊ើបអង្កេត។
កាលពីថ្ងៃទី១៧ ខែឧសភា ទំព័រហ្វេសប៊ុករបស់អង្គភាព CPU បានប្រកាសពីពិធីក្រុងពាលីសាងសង់ទីតាំងថ្មី ដើម្បីបង្កើតមជ្ឈមណ្ឌលដំបូងគេបំផុត ដែលមានឈ្មោះថា មជ្ឈមណ្ឌលរំដួល ដែលជាវិទ្យាស្ថានផ្តល់សេវាកម្មគាំពារ និងគាំទ្រទំនើប និងល្អិតល្អន់បំផុតដល់កុមារដែលបានរងគ្រោះពីអំពើរំលោភបំពានផ្លូវភេទ និងរាងកាយ។
អង្គភាព CPU បានបញ្ជាក់ថា៖ «មជ្ឈមណ្ឌលនេះ មានស្តង់ដាខ្ពស់បំផុតលំដាប់ពិភពលោក ដែលនឹងផ្តល់សេវាកម្មដូចជាផ្នែកគាំពារ ព្យាបាល កោសល្យវិច័យ ស៊ើបអង្កេត បណ្តុះបណ្តាល និងសេវាកម្មគាំទ្រវេជ្ជសាស្ត្រជូនដល់កុមាររងគ្រោះទាំងឡាយ»។
ដោយមានកិច្ចសហប្រតិបត្តិការជាមួយអគ្គស្នងការដ្ឋាននគរបាលជាតិកម្ពុជា អង្គភាព CPU បានបញ្ជាក់ថា មជ្ឈមណ្ឌលនេះ នឹងនាំចូលវិធីសាស្ត្រ និងមធ្យោបាយស៊ើបអង្កេតថ្មីៗ និងទំនើប ថែមទាំងជំនាញកោសល្យវិច័យ ដើម្បីបង្កើនសមត្ថភាពក្នុងការស៊ើបអង្កេត និងប្រយុទ្ធប្រឆាំងរាល់បទល្មើសលើកុមារផងដែរ។
លោក James McCabe នាយកប្រតិបត្តិអង្គភាព CPU បាននិយាយថា អនាគតនៃកិច្ចការពារកុមារកម្ពុជា យើងបានធ្វើពិធីក្រុងពាលីសាងសង់ទីតាំងថ្មី ដើម្បីបង្កើតមជ្ឈមណ្ឌលដំបូងគេបំផុត មិនសម្រាប់តែប្រទេសកម្ពុជាប៉ុណ្ណោះទេ ក៏ប៉ុន្តែវាគឺជាមជ្ឈមណ្ឌលដំបូងបំផុតនៅក្នុងតំបន់អាស៊ីអាគ្នេយ៍។
លោកថ្លែងថា ការបង្កើតមជ្ឈមណ្ឌលរំដួលនេះ គឺមានការគាំទ្រពីរាជរដ្ឋាភិបាលកម្ពុជា ក្រសួងមហាផ្ទៃ និងអគ្គស្នងការដ្ឋាននគរបាលជាតិ ហើយមជ្ឈមណ្ឌលនេះ នឹងធ្វើឱ្យប្រាកដថា កិច្ចខិតខំប្រឹងប្រែងក្នុងការប្រយុទ្ធប្រឆាំង ស្វែងរក និងបង្ការបទល្មើសលើកុមារ នឹងបន្តទៅថ្ងៃអនាគត ដោយមានសមត្ថភាពខ្ពស់បំផុត។
លោកបានបញ្ជាក់ថា៖ «យើងមានភាពរីករាយ និងទន្ទឹងរង់ចាំការសាងសង់ និងបើកសម្ពោធមជ្ឈមណ្ឌលថ្មី និងសេវាកម្មផ្សេងៗ ដែលនឹងមានផ្តល់ជូនទៅដល់កុមាររងគ្រោះ។ ខ្ញុំសូមថ្លែងអំណរគុណដល់លោក Scott Neeson ចំពោះការប្តេជ្ញា និងការគាំទ្រដែលធ្វើឱ្យមជ្ឈមណ្ឌលនេះអាចកើតឡើង ថែមទាំងអ្នកទាំងអស់គ្នាដែលបានជ្រោមជ្រែងធ្វើឱ្យក្តីសុបិននេះក្លាយទៅជាការពិត»។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្រាប់ភ្នំពេញប៉ុស្តិ៍ថា ការបង្កើតមជ្ឈមណ្ឌលថ្មី ដែលមានទីតាំងក្នុងរាជធានីភ្នំពេញនេះ គឺជារឿងដែលពិសេសសម្រាប់កម្ពុជា ព្រោះថា កម្ពុជា មិនទាន់មានមជ្ឈមណ្ឌលបែបទំនើប ឬឧបករណ៍ទាន់សម័យដែលអាចធ្វើកោសល្យវិច័យទេ ហើយជាពិសេសនោះ គឺការពិនិត្យ DNA។
ជាមួយគ្នានោះ លោកស្រី លើកឡើងថា មជ្ឈមណ្ឌលថ្មីនេះ នឹងចូលរួមគាំទ្របន្ថែមទៀត លើនីតិវិធីនៃការស៊ើបអង្កេតជាមួយសមត្ថកិច្ច ដើម្បីស្វែងរកជនល្មើស ដែលបានប្រព្រឹត្តមកលើកុមារនៅក្នុងប្រទេសកម្ពុជា បន្ថែមលើកិច្ចសហការជាមួយអង្គភាពនេះលើកិច្ចការបច្ចេកទេស។
លោកស្រី បានបញ្ជាក់ថា៖ «ការចូលរួមរបស់ CPU នេះ វាបានជួយដល់រដ្ឋាភិបាលយើង រួមចំណែកក្នុងការរកវិធីសាស្ត្រនៅក្នុងការវិភាគ ក៏ដូចជាស្វែងរកនីតិវិធីក្នុងការបង្រ្កាបបទល្មើសពាក់ព័ន្ធទៅលើកុមារ ជាពិសេសឧក្រឹដ្ឋកម្ម។ កន្លងមកយើងដឹងហើយថា អំពើហិង្សា និងបទល្មើសមួយចំនួនមកលើកុមារ គឺមានទ្រង់ទ្រាយកាន់តែសហាវឃោរឃៅ ហើយជនល្មើស គឺមិនងាយនឹងស្វែងរកយកមកផ្តន្ទាទោសបានទេ។ ដូច្នេះទម្រាំរកឃើញករណីនីមួយៗ គឺត្រូវការភ័ស្តុតាង និងសាក្សីច្រើន»។
បើទោះជាត្រូវបានលើកឡើងថា មានប្រយោជន៍ និងការរួមចំណែកដើម្បីជួយដល់សមត្ថកិច្ចកម្ពុជា ក៏លោក សុក សំអឿន ប្រធានក្រុមអ្នកច្បាប់អមរិន្ទ បាននិយាយថា តាមនីតិវិធីច្បាប់ មន្ទីរពិសោធន៍ និងការងារស៊ើបអង្កេត ត្រូវតែឯករាជ្យដាច់ពីគ្នា។ ដូចនេះ លោកយល់ថា ប្រសិនបើ CPU ជ្រើសរើសយកការងារពិសោធន៍ នោះគឺត្រូវទម្លាក់ចោលការងារស៊ើបអង្កេត។
តាមរបាយការណ៍ប្រចាំឆ្នាំ២០២២ របស់អង្គភាព CPU បានចូលរួមស៊ើបអង្កេតទៅលើបទល្មើសដែលកើតមានលើកុមារកម្ពុជាជិត ៣៧០ករណី និងឈានដល់មានការចាប់ខ្លួនជនល្មើសចំនួន ៣១៥នាក់ ឬស្មើ ៨៦ភាគរយ។
របាយការណ៍ដដែល បានឱ្យដឹងទៀតថា ក្នុងរយៈពេល១ឆ្នាំនេះ តុលាការបានសម្រេចផ្តន្ទាទោសដាក់ពន្ធនាគារទៅលើជនល្មើសចន្លោះពី ៤ឆ្នាំ ទៅ ១ជីវិត មានចំនួន ៥៥៥នាក់ ខណៈបេសកកម្មរបស់ CPU បានចំណាយថវិកាត្រឹមតែជាង១ ២០០ ០០០ដុល្លារប៉ុណ្ណោះ។
របាយការណ៍ដែលចេញផ្សាយកាលពីខែកុម្ភៈ ឆ្នាំ២០២៣ បានបញ្ជាក់ថា៖ «ក្នុងឆ្នាំ២០២២ CPU បានធ្វើការស្រាវជ្រាវលើបទល្មើសដែលបានកើតឡើងទៅលើកុមារកម្ពុជាចំនួន ៣៦៦ករណី ដោយបទល្មើសទាំងនោះ ពាក់ព័ន្ធនឹងបទល្មើសឃាតកម្ម រំលោភសេពសន្ថវៈ និងបទល្មើសស្មុគស្មាញដទៃទៀត ដែលប្រឆាំងនឹងកុមារ»៕
.jpg)
