រដ្ឋបាលខេត្តសៀមរាបប្រារព្ធទិវាជាតិនៃការចងចាំ ២០ ឧសភា ដើម្បីរំឭកវិញ្ញាណក្ខន្ធអ្នកស្លាប់ក្នុងរបបប៉ុល ពត
សៀមរាបៈ រដ្ឋបាលខេត្តសៀមរាបនាថ្ងៃទី១៩ខែឧសភានេះបានប្រារព្ឋទិវាជាតិនៃការចងចាំ ២០ ឧសភានៅវត្តពោធិវង្ស ក្នុងសង្កាត់គោកចកក្រុងសៀមរាប ដើម្បីរំឭកវិញ្ញាណក្ខន្ធតាមប្រពៃណីព្រះពុទ្ធសាសនា ដោយមានពិធីរាប់បាត្រឧទ្ធិសកុសលជូនអ្នកបាត់បង់ជីវិតក្នុងរបបប៉ុល ពត។
ការប្រារព្ធនេះត្រូវបានធ្វើឡើង ដើម្បីរក្សាប្រពៃណី នៃការចងចាំនូវមហាឧក្រិដ្ឋកម្ម និងដើម្បីឧទ្ទិសកុសលដល់វិញ្ញាណក្ខន្ធប្រជាជនកម្ពុជារាប់លាននាក់ ដែលបានបាត់បង់អាយុជីវិតយ៉ាងអាណោចអាធម្ម និងអយុត្តិធម៌ជាទីបំផុត ដោយនយោបាយប្រល័យពូជសាសន៍ នៃរបបកម្ពុជាប្រជាធិបតេយ្យ ប៉ុល ពត។ នេះបើយោងតាមសេចក្តីប្រកាសរបស់រដ្ឋបាលខេត្ត។
ក្នុងឱកាសនោះដែរ លោក អ៊ាន ឃុន ប្រធានក្រុមប្រឹក្សាខេត្តបានរំឭកពីប្រវត្តិអតីតកាលដ៏សែនជូរចត់ក្នុងរបបខ្មែរក្រហម។ ក្នុងរយៈពេលជិត ៤ ឆ្នាំនៃរបបនេះ ប្រជាជនកម្ពុជាទាំងមូលបានរស់នៅក្នុងគុកឥតជញ្ជាំងដ៏ជូរចត់ ទទួលរងនូវទុក្ខទារុណកម្មគ្រប់បែបយ៉ាង សោកនាដកម្មដ៏ធំធេងបំផុតសម្រាប់មនុស្សជាតិ និង សង្គមជាតិទាំងមូលតាមរយៈការបាត់បង់នូវការកសាងជាតិ ការរស់នៅដូចសត្វធាតុ ការនិរាសព្រាត់ប្រាស់គ្រួសារ សាច់សារលោហិតគួរឱ្យសោកសង្រែង។ ជាពិសេសការកាប់សម្លាប់ជីវិតជាតិសាសន៍ឯងយ៉ាងព្រៃផ្សៃអស់ជាងបីលាននាក់។
ក្រោយពីបានឃើញនូវរបបដឹកនាំផ្តាច់ការប្រល័យពូជសាសន៍ប៉ុល ពតនេះ នៅថ្ងៃទី២ ខែធ្នូ ឆ្នាំ១៩៧៨ រណសិរ្សសាមគ្គីសង្គ្រោះជាតិត្រូវបានបង្កើតឡើង ក្រោមការដឹកនាំរបស់លោកជា ស៊ីម លោកនាយករដ្ឋមន្រ្តី ហ៊ុន សែន និងលោក ហេង សំរិន ជាប្រមុខបានប្រមូលផ្តុំកម្លាំងអ្នកស្នេហាជាតិចូលរួមយ៉ាងច្រើនកុះករ ក្រោកឈរតស៊ូផ្តួលរំលំរបបកម្ពុជាប្រជាធិបតេយ្យប្រល័យពូជសាសន៍រហូតទទួលបានជ័យជម្នះយ៉ាងត្រចះត្រចង់នាថ្ងៃទី៧ ខែមករា ឆ្នាំ១៩៧៩។ ជ័យជម្នះ ពិតជាបានសង្គ្រោះជាតិមាតុភូមិ និងប្រជាជនកម្ពុជា ឱ្យរស់រានមានជីវិតឡើងវិញ និង បង្កលក្ខណសម្បត្តិឱ្យពលរដ្ឋទាំងអស់គ្នាបានចាប់ផ្តើមជាថ្មីនូវការកសាងប្រវត្តិសាស្រ្តរបស់ខ្លួនចាប់តាំងពីបាតដៃទទេ។ នេះបើយោងតាមមន្ទីរព័ត៌មានខេត្តសៀមរាប៕
.jpg)
