រដ្ឋមន្រ្តីក្រសួងមុខងារសាធារណៈធ្វើបាឋកថាពីភាពជាអ្នកដឹកនាំ នវានុវត្តន៍ និងគុណាធិបតេយ្យជូនអគ្គលេខាធិការដ្ឋានព្រឹទ្ធសភា
ភ្នំពេញៈ អគ្គលេខាធិការដ្ឋានព្រឹទ្ធសភាសហការជាមួយក្រសួងមុខងារសាធារណៈបានរៀបចំកម្មវិធីបាឋកថា ស្តីពីភាពជាអ្នកដឹកនាំ នវានុវត្តន៍ និងគុណាធិបតេយ្យក្នុងរដ្ឋបាលសាធារណៈសម្រាប់ពង្រឹងសមត្ថភាពមន្រ្តីរាជការ នៃអគ្គលេខាធិការដ្ឋានព្រឹទ្ធសភា ចាប់ពីអនុប្រធានការិយាល័យឡើងនាថ្ងៃទី១៨ ខែឧសភានេះ។
កម្មវិធីបាឋកថានេះបានប្រព្រឹត្តទៅក្រោមអធិបតីភាពលោក អ៊ុ សារឹទ្ធ អគ្គលេខាធិការព្រឹទ្ធសភា និងលោក ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានគណៈកម្មាធិការកែទម្រង់រដ្ឋបាលសាធារណៈ នៅសាលសិក្ខាសាលាបណ្ណាល័យព្រឹទ្ធសភា។ នេះបើយោងតាមព្រឹទ្ធសភាកម្ពុជា។
លោក ព្រុំ សុខាបានធ្វើបាឋកថាជូនអង្គពិធី។ ក្នុងនោះបានផ្តោតសំខាន់លើ៖១. ភាពជាអ្នកដឹកនាំ និងនវានុវត្តន៍ ដែលរួមមាន តើអ្វីទៅភាពជាអ្នកដឹកនាំ? អំណាច និងឥទ្ធិពល និងការដឹកនាំរបៀបជាវីរជន ការដឹកនាំរបៀបមិនតាំងខ្លួនជាវីរជន និងហេតុអ្វីបានជាការដឹកនាំចាំបាច់ត្រូវមាននវានុវត្តន៍? ២.គុណាធិបតេយ្យ ៣.កំណែទម្រង់រដ្ឋបាលសាធារណៈ ដែលរួមមាន៖ គំរូរដ្ឋបាលប្រពៃណី និងគំរូរដ្ឋបាលថ្មី កសាងវប្បធម៌កែទម្រង់ ការបង្កើត និងការទទួលស្គាល់តម្លៃសាធារណៈ និង៤.តួនាទីរបស់រដ្ឋាភិបាល ដូចជា៖ កំណែទម្រង់រដ្ឋបាលសាធារណៈផ្លាស់ប្តូរតួនាទីរបស់រដ្ឋាភិបាល ការវិវត្តនៃសម័យកាលបដិវត្តន៍ឧស្សាហកម្ម និងរដ្ឋាភិបាលឌីជីថល៕
.jpg)
