និស្សិត១ក្រុម ក្នុងចំណោមនិស្សិតជាច្រើនក្រុមផ្សេងទៀត ដែលចូលរួមជជែកដេញដោលស្តីពី "ការផ្តល់សេវាសាធារណៈ និងគណនេយ្យភាពថវិកា"។ រូបថត អង្គការតម្លាភាពកម្ពុជា
ភ្នំពេញៈ អ្នកឈ្នះជយលាភីក្នុងការប្រកួតជជែកដេញដោល ជំរុញ និងលើកទឹកចិត្តដល់យុវជនដទៃទៀត គួរចូលរួមស្វែងយល់អំពីការផ្តល់សេវាសាធារណៈ និងតម្លាភាពថវិកា ឱ្យកាន់តែច្រើននៅតាមមូលដ្ឋាន បន្ទាប់ពីកម្មវិធីការជជែកដេញដោលយុវជនដែលមានយុវជនចូលរួមជាង ១៦០ នាក់ បានស្វែងរកម្ចាស់ជយលាភី។
កាលពីថ្ងៃទី១៣ ខែឧសភា អង្គការតម្លាភាពកម្ពុជា បានរៀបចំកម្មវិធីការជជែកដេញដោលយុវជនស្តីពី "ការផ្តល់សេវាសាធារណៈ និងគណនេយ្យភាពថវិកា" ឆ្នាំ២០២៣ វគ្គផ្តាច់ព្រ័ត្រ ដោយមានការសហការពីទីភ្នាក់ងារអភិវឌ្ឍន៍ និងកិច្ចសហប្រតិបត្តិការអន្តរជាតិប្រទេសស៊ុយអែត (SIDA) សហភាពអឺរ៉ុប (EU) និងទីភ្នាក់ងារអភិវឌ្ឍន៍ និងកិច្ចសហប្រតិបត្តិការអន្តរជាតិសហរដ្ឋអាមេរិក (USAID)។
កម្មវិធីនេះ ត្រូវបានធ្វើឡើងនៅសាកលវិទ្យាល័យបញ្ញាសាស្ត្រកម្ពុជា សាខាទួលទំពូង និងផ្សាយផ្ទាល់ តាមរយៈទំព័រហ្វេសប៊ុកផ្លូវការ អង្គការតម្លាភាពកម្ពុជា ដោយមានយុវជនចំនួន៤ក្រុម បានចូលរួមជជែកពិភាក្សាលើប្រធានបទ "ការចូលរួមរបស់ពលរដ្ឋ និងយុវជនក្នុងកិច្ចការសង្គម លើការផ្ដល់សេវាសាធារណៈ និងគណនេយ្យភាពថវិកា ដើម្បីឈានទៅរកម្ចាស់ជយលាភី។
លោក ប៉ិច ពីសី ប្រធានអង្គការតម្លាភាពកម្ពុជា បាននិយាយថា យុវជនទាំង ៤ក្រុម ដែលឈានមកដល់វគ្គផ្តាច់ព្រ័ត្រ គឺត្រូវបានជ្រើសរើសចេញពីក្នុងចំណោមយុវជនប្រមាណ១៦២នាក់ (១២៤នាក់ជាស្ត្រី)ដោយមាន៤២ក្រុម បន្ទាប់ពីយុវជនទាំងនោះ បានដាក់ពាក្យចូលរួមប្រកួតលើវិញ្ញាសា និងឆ្លងកាត់ការប្រកួតប្រជែងនេះ។
លោក បានបន្តថា កម្មវិធីប្រកួតជជែកពិភាក្សានេះ គឺដើម្បីផ្តល់ជាវេទិកា ពិភាក្សា និងចូលរួមលើកកម្ពស់ការយល់ដឹងរបស់យុវជន អំពីការផ្តល់សេវាសាធារណៈ និងគណនេយ្យភាពថវិកានៅថ្នាក់មូលដ្ឋាននៅកម្ពុជា។
លោក បានបញ្ជាក់ថា៖«កម្មវិធីនេះ គឺជាគម្រោងមួយដើម្បីគណនេយ្យភាព អ៊ីចឹងហើយបានប្អូនៗ ដែលចូល គឺជាធាតុចូល និងជួយជំរុញបញ្ហាទាំងអស់នេះ។ កម្មវិធីនេះ គឺចង់ឱ្យប្អូនៗចេះ និងទាញយកអ្វីមួយត្រូវចេះគិត និងប្រើប្រាស់ព័ត៌មាន ព្រោះប្អូនថ្ងៃក្រោយជាសសរស្តម្ភប្រកួតប្រជែងជាមួយបណ្តាប្រទេសនៅអាស៊ាន ដែលជាកម្លាំងស្នួលរបស់គេដែរ»។
ក្រោយការប្រកួតជជែកដេញដោលពេញ ១ព្រឹក បានបញ្ចប់ ក្រុមអ្នកឈ្នះជយលាភី ក៏ត្រូវបានប្រកាសជាបន្តបន្ទាប់ បន្ទាប់ពីគណៈកម្មការវាយតម្លៃចំនួន ៤រូប មកពីស្ថាប័នរដ្ឋ សង្គមស៊ីវិល និងអ្នកជំនាញមកពីសាកលវិទ្យាល័យ បានចូលរួមផ្តល់ពិន្ទុ។
កញ្ញា ស៊ើង និមល ជាសមាជិកម្នាក់នៅក្នុងក្រុម ដែលទទួលបានជយលាភីលេខ៣ បានប្រាប់ភ្នំពេញប៉ុស្តិ៍ថា ប្រធានបទនៃការជជែកដេញដោលនេះ គឺពិតជាមានសារប្រយោជន៍ដែលបានផ្តល់ឱ្យកញ្ញា និងយុវជនដទៃទៀត បានស្វែងយល់ស៊ីជម្រៅអំពីសេវាសាធារណៈ និងលំហូរនៃថវិកា រួមទាំងបញ្ហាជាច្រើនទៀត ដែលកើតឡើងនៅក្នុងសង្គម។
កញ្ញា បាននិយាយទៀតថា មិនត្រឹមតែផ្តល់ឱកាស និងសមត្ថភាពទេ ការជជែកដេញដោលនេះ ក៏អាចពាំនាំជាសារទៅដល់យុវជនដទៃទៀត ដើម្បីបញ្រ្ជាបពីបញ្ហា វិធីសាស្ត្រ និងដំណោះស្រាយ ដែលអាចផ្តល់ជាប្រយោជន៍យ៉ាងទូលាយទៅដល់យុវជន និងស្ថាប័នមានសមត្ថកិច្ច។
កញ្ញា រំពឹងថា៖«សម្រាប់ខ្ញុំ ក្រោយចូលរួមការប្រកួតនេះ ជាសាររបស់ខ្ញុំទៅកាន់យុវជនដទៃទៀត តាមរយៈការវែកញែកនេះ គឺយើងបានឃើញបញ្ហាដែលបានកើតឡើងនៅក្នុងការផ្តល់សេវាសាធារណៈ និងថវិកា។ ខ្ញុំចង់ឱ្យយុវជនបន្តចូលរួម និងគួរតែស្វែងរកចំណេះដឹងទាក់ទងនឹងការផ្តល់សេវាសាធារណៈ និងកិច្ចការនៅមូលដ្ឋាន ក៏ដូចជាការគ្រប់គ្រងថវិកាជាដើម»។
ការដែល កញ្ញា ស៊ើង និមល ចង់ឃើញ និងអំពាវនាវបែបនេះ ក៏ព្រោះតែបានមើលឃើញថា កន្លងមក ការចូលរួមរបស់យុវជនក្នុងបញ្ហានេះ ហាក់នៅមានកម្រិត ហើយឱកាសដែលយុវជនអាចចួលរួម ក៏មានតិចផងដែរ ដែលកញ្ញា យល់ថា យុវជនក្នុងសម័យថ្មី គួរតែទទួលបានឱកាស និងចូលរួមកិច្ចការងារសង្គមឱ្យបានច្រើន។
ចំណែកកញ្ញា សេង កុលនិស្ស័យ ដែលជាប្រធានក្រុមម្នាក់ ក្នុងក្រុមជយលាភីលេខ១ ក្នុងការប្រកួត បាននិយាយដែរថា ការដេញដោលមតិ គឺពិតជាមានសារៈសំខាន់ណាស់ សម្រាប់យុវជន ដែលអាចឱ្យពួកកញ្ញា ឬយុវជនដទៃទៀត ទទួលបានចំណេះដឹងតាមរយៈការស្រាវជ្រាវ និងជជែកដេញដោលគ្នា។ បន្ថែមពីនេះ កញ្ញា យល់ថា វេទិកានេះ ក៏នឹងផ្តល់ប្រយោជន៍យ៉ាងសំខាន់ទៅកាន់សាធារណជន និងស្ថាប័នរដ្ឋាភិបាល បន្ទាប់ពីពួកកញ្ញា ដែលជាយុវជន បានចូលរួមជជែកដេញដោល។
កញ្ញា បានបញ្ជាក់ថា៖«យុវជនគឺជាកម្លាំងចលករ និងជាក្មេងជំនាន់ក្រោយ ហើយជាពិសេសនៅក្នុងប្រទេសកម្ពុជាយើងតែម្តង ភាគច្រើន គឺជាយុវជន។ អ៊ីចឹងទៅ ខ្ញុំចង់ឱ្យគាត់ចួលរួមយ៉ាងសកម្ម តាមរយៈការប្រើប្រាស់ចំណេះដឹងទៅកាន់ការប្រើប្រាស់សេវាសាសាធារណៈ និងយល់ដឹងអំពីថវិកាជាតិ។ មួយវិញទៀត ចង់ឱ្យយុវជន ចូលរួមអភិវឌ្ឍក្នុងមូលដ្ឋានរបស់ខ្លួន ដូចជាក្នុងឃុំ សង្កាត់របស់គាត់ ដែលត្រូវការការចូលរួមរបស់ពួកគាត់»។
ជាមួយគ្នានោះ កញ្ញា សេង កុលនិស្ស័យ ក៏រំពឹងដែរថា រដ្ឋាភិបាលកម្ពុជា នឹងបន្តពង្រឹងគុណវុឍ្ឍិមន្ត្រី និងលុបបំបាត់អំពើពុករលួយ តាមរយៈការលើកឡើងពីបញ្ហា និងដំណោះស្រាយដែលយុវជនក្នុងក្រុមនីមួយៗ បានលើកយកមកជជែកដេញដោលក្នុងពេលនេះ។
តាមការប្រកាសរបស់អង្គការតម្លាភាពកម្ពុជា រង្វាន់ដែលក្រុមជយលាភីទាំង ៤ក្រុម ទទួលបាន គឺរួមមាន ជយលាភីលេខ១ ទទួលបានរង្វាន់ជាទឹកប្រាក់ចំនួន ១ ២០០ដុល្លារ ពានរង្វាន់ជយលាភី មេដាយមាស វិញ្ញាបនបត្រ។
ក្រុមជយលាភីលេខ២ ទទួលបានរង្វាន់ជាទឹកប្រាក់ចំនួន ១ ០០០ដុល្លារ មេដាយប្រាក់ វិញ្ញាបនបត្រ និងជយលាភីលេខ៣ ទទួលបានរង្វាន់ជាទឹកប្រាក់ចំនួន ៨០០ដុល្លារ មេដាយសំរឹទ្ធ និងវិញ្ញាបនបត្រ ខណៈក្រុមដែលជាប់ឈ្មោះក្នុងវគ្គជម្រុះចុងក្រោយ ទទួលបានរង្វាន់ជាទឹកប្រាក់ចំនួន ៥០០ដុល្លារ និងវិញ្ញាបនបត្រ៕
.jpg)
