កញ្ញារ៉ាត់ យ៉ារូ គឺជាសិស្សថ្នាក់ទី១០ និងជាប្រធានក្រុមប្រឹក្សាយុវជន នៃវិទ្យាល័យពេជ្រចិន្តា ស្រុកភ្នំព្រឹក ខេត្តបាត់ដំបង ទៅចូលរួមប្រជុំនៅអង្គការសហប្រជាជាតិ។ រូបថត អង្គការទស្សនៈពិភពលោក
បាត់ដំបងៈយុវតីថ្នាក់ទី ១០ ម្នាក់ តំណាងឱ្យយុវជនកម្ពុជា ទៅចូលរួមកិច្ចប្រជុំជាន់ខ្ពស់របស់អង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក ដែលមន្ត្រីជាន់ខ្ពស់ក្រសួងអប់រំ ចាត់ទុកថា ការចូលរួមរបស់យុវតីរូបនេះ គឺជាគំរូដល់អ្នកសិក្សាគ្រប់រូប តាមរយៈគ្រប់រូបភាពដើម្បីបន្តអភិវឌ្ឍសមត្ថភាពយុវជន ក្នុងឆាកជាតិតំបន់ និងអន្តរជាតិ។
កញ្ញា រ៉ាត់ យ៉ារូ គឺជាសិស្សថ្នាក់ទី ១០ និងជាប្រធានក្រុមប្រឹក្សាយុវជននៃវិទ្យាល័យពេជ្រចិន្តា ស្រុកភ្នំព្រឹក ខេត្តបាត់ដំបង ត្រូវបានអង្គការទស្សនៈពិភពលោកប្រចាំកម្ពុជាបានអញ្ជើញទៅចូលរួមកិច្ចប្រជុំ និងដំណើរទស្សនកិច្ចនៅទីក្រុងញូវយ៉ក សហរដ្ឋអាមេរិក តំណាងឱ្យយុវជនកម្ពុជា។
ដំណើរទស្សនកិច្ចនិងការទៅចូលរួមក្នុងកិច្ចប្រជុំជាន់ខ្ពស់របស់អង្គការសហប្រជាជាតិនេះគឺបានធ្វើឡើងតាំងពីថ្ងៃទី១៥ ខែឧសភា ឆ្នាំ២០២៣ ហើយគិតត្រឹមថ្ងៃទី២២ ខែឧសភាឆ្នាំ២០២៣ យុវតីរូបនេះ កំពុងស្ថិតនៅសហរដ្ឋអាមេរិក នៅឡើយ។ នេះបើតាមអង្គការទស្សនៈពិភពលោកប្រចាំកម្ពុជា។
អង្គការទស្សនៈពិភពលោកប្រចាំកម្ពុជា បានឱ្យដឹងថា យ៉ារ៉ូជាអ្នកដឹកនាំយុវជន ដែលបានឡើងធ្វើបទបង្ហាញក្នុងកិច្ចប្រជុំជាន់ខ្ពស់នៃអង្គការសហប្រជាជាតិ អំពីការតាមដានការអនុវត្តការកាត់បន្ថយហានិភ័យ នៅទីក្រុងញូវយ៉ក។ មិនត្រឹមតែប៉ុណ្ណោះ យ៉ារ៉ូ ក៏បានចែករំលែកពីសកម្មភាព ដែលបានអនុវត្តជាមួយយុវជន និងសិស្សានុសិស្សដទៃទៀត ក្នុងការផ្សព្វផ្សាយការចិញ្ចឹមកូនបែបវិជ្ជមាននៅតាមផ្ទះសាលារៀន និងសហគមន៍។
អង្គការទស្សនៈពិភពលោកប្រចាំកម្ពុជាបានបញ្ជាក់ថា៖«តាមរយៈការធ្វើការជាមួយអង្គការទស្សនៈពិភពលោកអន្តរជាតិនៅកម្ពុជា បានសហការជាមួយអ្នកដឹកនាំសហគមន៍ និងអាជ្ញាធរ ដើម្បីការពារកុមារពីផលប៉ះ ពាល់នៃបញ្ហាប្រែប្រួលអាកាសធាតុផងដែរ។ យ៉ារ៉ូ តែងតែមានក្ដីសង្ឃឹមនិងក្ដីស្រមៃក្នុងការធ្វើជាតំណាងយុវជន និងកុមារ នៅសហគមន៍ដើម្បីលើកឡើងពីបញ្ហាប្រឈមទៅកាន់អ្នកដឹកនាំលើឆាកអន្តរជាតិ»។
នៅក្នុងវេទិកានៃកិច្ចប្រជុំរបស់អង្គការសហប្រជាជាតិពីទីក្រុងញូវយ៉ក កញ្ញា រ៉ាត់ យ៉ារ៉ូ បានលើកឡើងថា អង្គការទស្សនៈពិភពលោកអន្តរជាតិនៅកម្ពុជា បានគាំទ្រនាង ឱ្យចូលរួមក្នុងកិច្ចប្រជុំជាន់ខ្ពស់នៃអង្គការសហប្រជាជាតិ ដើម្បីលើកឡើងពីបញ្ហាប្រឈមនានា ក្នុងសហគមន៍ទៅកាន់អ្នកដឹកនាំយុវជនមកពីបណ្ដាប្រទេសផ្សេងៗ នៅទីក្រុងញូវយ៉ក។
តាមរយៈគម្រោងរបស់អង្គការទស្សនៈពិភពលោកអន្តរជាតិនៅកម្ពុជា បានធ្វើឱ្យនាងក្លាយទៅជាយុវជនម្នាក់ ដែលមានសមត្ថភាព និងអាចជួយទៅដល់សហគមន៍ជាពិសេសក្មេងៗដទៃទៀត។
កញ្ញាបានរៀបរាប់ថា៖«ខ្ញុំគឺជាយុវជននាំមុខនៅសហគមន៍របស់ខ្ញុំ ខ្ញុំចង់ពាំនាំនូវបញ្ហា ដែលបានកើតឡើងទៅលើកុមារ ដែលជាផ្នែកមួយនៃគម្រោងរបស់អង្គការទស្សនៈពិភពលោកប្រចាំកម្ពុជាដើម្បីរួមគ្នាក្នុងតំបន់ និងអន្តរជាតិជួយដល់កុមារ ឬយុវជន និងការពារពួកគេ។ ការធ្វើការរបស់យើងគឺជំរុញ និងលើកកម្ពស់នូវចំណេះដឹង ដល់ឪពុកម្តាយរបស់កុមារ»។
លោកស្រី ឈឹម រតនា ប្រធានយុទ្ធនាការនៃអង្គការទស្សនៈពិភពលោក បានប្រាប់ភ្នំពេញប៉ុស្តិ៍នៅថ្ងៃទី២២ ឧសភាថា ការចូលរួម និងសំឡេងរបស់កុមារ ក្មេងវ័យជំទង់ និងយុវជន នៅក្នុងការដោះស្រាយបញ្ហា នៅតាមមូលដ្ឋាន និងបញ្ហាសកល ពិតជាមានសារៈសំខាន់ណាស់។
លោកស្រី បានបន្តថា អង្គការទស្សនៈពិភពលោក ចាត់ទុក កុមារ និងយុវជនជាដៃគូចម្បង សម្រាប់កម្មវិធីរបស់របស់អង្គការ ខណៈ យ៉ារ៉ូ ជាប្រធានក្លិបយុវជន ប្រចាំនៅតំបន់កម្មវិធីភ្នំព្រឹក របស់អង្គការទស្សនៈពិភពលោក។
លោកស្រី បានបញ្ជាក់ថា៖« គាត់បានចូលរួមយ៉ាងសកម្មជាមួយសកម្មភាពផ្សេងៗ របស់ក្លិបយុវជន រួមមាន ការលើកកម្ពស់ការយល់ដឹងអំពីការការពារកុមារ សិទ្ធិកុមារ និងការផ្តល់ការប្រឹក្សាយោបល់ដល់សិស្សជាច្រើននៅក្នុងវិទ្យាល័យ ដែលគាត់កំពុងសិក្សា។ គាត់បានចូលរួមជាមួយក្លិបយុវជនដើម្បីផ្តួចផ្តើមគម្រោង ការរៀនសូត្រនៅតាមសហគមន៍ របស់អង្គការទស្សនៈពិភពលោក ដើម្បីគាំទ្រដល់សិស្ស និងគ្រួសារងាយរងគ្រោះបំផុត នៅតំបន់គោលដៅ»។
ជាងនេះទៅទៀត គាត់បានកៀរគរធនធានពីសហគមន៍សម្រាប់ការអភិវឌ្ឍសាលារៀន និងការងារសង្គមផ្សេងៗ ដែលរួមចំណែកដល់ការបញ្ឈប់អំពើហិង្សាលើកុមារ ក្នុងសហគមន៍។ គាត់គឺជាធនធានម្នាក់ដ៏សំខាន់នៅក្នុងសាលា សម្រាប់ការដឹកនាំសកម្មភាពសាលា។
លោក រស់ សុវាចា អ្នកនាំពាក្យក្រសួងអប់រំ ថ្លែងថា ការចូលរួមរបស់សិស្ស រ៉ាត់ យ៉ារ៉ូ នៅសហរដ្ឋអាមេរិក គឺជាការបន្តលើកទឹកចិត្តដល់អ្នកសិក្សាគ្រប់រូប ដែលជាយុវជនសតវត្សរ៍ទី២១តាមរយៈគ្រប់រូបភាព ដើម្បីបន្តអភិវឌ្ឍសមត្ថភាពយុវជន ក្នុងឆាកជាតិតំបន់ និងអន្តរជាតិ។
ក្រសួងអប់រំ សូមស្វាគមន៍និងលើកទឹកចិត្ត ចំពោះកិច្ចសហការវិជ្ជមានរវាងក្រសួង-ស្ថាប័នដៃគូរអភិវឌ្ឍន៍ និងជាមួយគ្រប់ភាគីពាក់ព័ន្ធក្នុងការលើកកម្ពស់ការអនុវត្តគោលនយោបាយអភិវឌ្ឍន៍យុវជន និងកម្មវិធីសិក្សាផ្សេងទៀត ដែលស្របនឹងផែនការយុទ្ធសាស្ត្រវិស័យអប់រំ ឆ្នាំ២០១៩-២០២៣ ក្នុងន័យចូលរួមលើកកម្ពស់គុណភាពយុវជន សម្រាប់ការចូលរួមការអភិវឌ្ឍសេដ្ឋកិច្ចកម្ពុជា។
លោកបានបញ្ជាក់ថា៖«យុវជនសតវត្សរ៍ទី២១ ជាយុវជនបន្តវេន និងជាសសរទ្រូង សម្រាប់ការអភិវឌ្ឍសង្គម និងសេដ្ឋកិច្ចកម្ពុជា ឆ្ពោះទៅសម្រេចចក្ខុវិស័យកម្ពុជា នៅឆ្នាំ២០៣០ និង២០៥០។ ដូចនេះ យុវជន ត្រូវបន្តទទួលបាននូវការអភិវឌ្ឍលើគ្រប់ទិដ្ឋភាពនិងតាមគ្រប់រូបភាព»។
ជាមួយនឹងការមើលឃើញនេះ លោក រស់ សុវាចា លើកឡើងថា ក្រសួងអប់រំនឹងបន្តគាំទ្រដល់កម្មវិធីអភិវឌ្ឍន៍យុវជន ទាំងបំណិនបច្ចេកទេស និងបំណិនទន់ ដោយផ្តោតលើបំណិនសតវត្សរ៍ទី២១ និងការលើកកម្ពស់ភាពជាអ្នកដឹកនាំហើយការបណ្តុះបណ្តាលជំនាញវិជ្ជាជីវៈទាំងការអប់រំការបណ្តុះបណ្តាលវិជ្ជាជីវៈ និងបំណិនទន់ ដែលជាយុទ្ធសាស្ត្រស្នូលផងដែរ។
លោកបន្ថែមថា៖«ដើម្បីឱ្យយុវជនមានសមត្ថភាពចូលរួមដោះស្រាយបញ្ហារួមរបស់ប្រទេសជាតិ មានភាពក្លាហាន និងមានភាពឈ្លាសវៃ ក្នុងការបញ្ចេញមតិ មានសមត្ថភាពត្រិះរិះពិចារណាសិក្សាស្រាវជ្រាវ ចែករំលែកគំនិត និងជំនាញក្នុងការនិយាយជាសាធារណៈ ប្រកបដោយក្រមសីលធម៌ និងចំណេះដឹងពិតប្រាកដ។ ការផ្តល់ឱកាសឱ្យយុវជនបញ្ចេញគំនិតយោបល់បង្ហាញទេពកោសល្យ ដើម្បីបង្កើតសង្គមពុទ្ធិ និងការធ្វើសុខដុមនីយកម្ម សម្រាប់ទាំងអស់គ្នាការបង្កើតទំនាក់ទំនងល្អរវាងយុវជន និងយុវជន និងការលើកកម្ពស់តម្លៃមិត្ត ភាពនិងសន្តិភាព»៕
.jpg)
