ភ្នំពេញៈ ក្រុមការងារបច្ចេកទេសក្រសួងមហាផ្ទៃ ក្រសួងបរិស្ថាន និងភាគីពាក់ព័ន្ធសំខាន់ៗមួយចំនួនទៀតបានបើកកិច្ចប្រជុំពិគ្រោះយោបល់លើកម្រងសេវារដ្ឋបាលក្នុងវិស័យបរិស្ថាន ដើម្បីរៀបចំនីតិវិធីនៃការប្រើប្រាស់ប្រព័ន្ធកម្រៃសេវារដ្ឋបាលក្នុងវិស័យបរិស្ថាននៅថ្នាក់ក្រោមជាតិនាថ្ងៃទី២២ខែឧសភា។
លោកលេង វីរដ្ឋលេខាធិការក្រសួងមហាផ្ទៃបានឱ្យថ្លែងថាកិច្ចប្រជុំនេះបានធ្វើការពិភាក្សាគ្នាពិគ្រោះយោបល់គ្នាដើម្បីរៀបចំនីតិវិធីនៃការប្រើប្រាស់ប្រព័ន្ធកម្រៃសេវារដ្ឋបាលក្នុងវិស័យបរិស្ថាននៅថ្នាក់ក្រោមជាតិដែលមានការគ្រប់គ្រងប្រព័ន្ធលូ ប្រព័ន្ធប្រព្រឹត្តិកម្មទឹកកខ្វក់ជាដើម។
លោកបានបន្តថា៖«កិច្ចពិគ្រោះយោបល់បានផ្តោតលើចំពោះកិច្ចសហការនិងការគាំទ្រក្នុងការអនុវត្តកំណែទម្រង់វិមជ្ឈការ និងវិសហមជ្ឈការដែលបានធ្វើឱ្យកំណែទម្រង់នេះកាន់តែល្អប្រសើរជាបន្តបន្ទាប់មកដល់ពេលនេះ»។នេះបើយោងតាមក្រសួងមហាផ្ទៃ។
លោកលេង វីបានបន្តថាតាមរយៈកិច្ចប្រជុំនេះក្រសួងមហាផ្ទៃក៏បានពិនិត្យទៅលើប្រកាសរួមនិងប្រកាសអន្តរក្រសួង ដើម្បីពិនិត្យនិងចងក្រងទៅលើប្រភេទសេវាដែលស្ថិតនៅក្នុងសមត្ថកិច្ចរបស់រដ្ឋបាលក្រុង ស្រុកឱ្យស្ថិតនៅក្នុងសេចក្តីព្រាងប្រកាសអន្តរក្រសួងថ្មីមួយដាច់ដោយឡែកពីរដ្ឋបាលរាជធានី និងរដ្ឋបាលឃុំ សង្កាត់។
លោកបានបន្ថែមថាការងារនេះពិតជាត្រូវការពិភាក្សានិងការផ្តល់ធាតុចូលលម្អិត ព្រោះសុទ្ធសឹងតែជាការងារដែលមានលក្ខណៈបទដ្ឋាន និងបច្ចេកទេសទៅលើការគ្រប់គ្រងប្រព័ន្ធលូ និងប្រព័ន្ធប្រព្រឹត្តិកម្មទឹកកខ្វក់។
ក្នុងឱកាសនោះដែរ លោកបួន ហេងប្រធាននាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាល ក្រសួងមហាផ្ទៃក៏បានធ្វើបទបង្ហាញអំពីមូលដ្ឋានគតិយុត្ត សាវតារនៃការរៀបចំការប្រកាសអន្តរក្រសួង និងកម្រងសេវារដ្ឋបាលក្នុងវិស័យបរិស្ថានជូនអង្គប្រជុំទាំងមូលជ្រាបផងដែរ។
លោកបានលើកឡើងថាក្រសួងមហាផ្ទៃក៏បានចងក្រង និងប្រមូលផ្តុំប្រភេទសេវាស្ថិតក្នុងសមត្ថកិច្ច ដើម្បីពិនិត្យសម្រេចរបស់រដ្ឋបាលក្រុង ស្រុក ខណ្ឌដាច់ដោយឡែក ពីប្រភេទសេវារដ្ឋបាលរស់រដ្ឋបាលរាជធានី ខេត្ត និងរដ្ឋបាលឃុំសង្កាត់ផងដែរ។
ក្រៅពីពិគ្រោះយោបល់លើកម្រងសេវារដ្ឋបាលក្នុងវិស័យបរិស្ថានហើយនោះ អន្តរក្រសួងក៏បានពិភាក្សាលើការស្នើសុំបង្កើត ក្រុមការងារបច្ចេកទេសអន្តរក្រសួងដែលមានការចូលរួមពីមន្ត្រីបច្ចេកទេសរបស់ក្រសួងមហាផ្ទៃ និងក្រសួងបរិស្ថាន ព្រមទាំងក្រសួងពាក់ព័ន្ធដើម្បីធ្វើការសិក្សារៀបចំរចនាសម្ព័ន្ធខ្នាតបទដ្ឋាន ការគ្រប់គ្រងប្រព័ន្ធលូ និងប្រព័ន្ធប្រព្រឹត្តិកម្មទឹកកខ្វក់ដើម្បីអាចមានមូលដ្ឋានក្នុងការចងក្រងសេវារដ្ឋបាលបាន។
ជុំវិញការស្នើឱ្យបង្កើត ក្រុមការងារបច្ចេកទេសអន្តរក្រសួងនេះដែរ លោកលេង វី បានឯកភាពចំពោះការបង្កើតក្រុមការងារបច្ចេកទេសនេះព្រមទាំងបានណែនាំឱ្យក្រុមការងារខិតខំបំពេញតួនាទីភារកិច្ចដើម្បីបង្កើនភាពងាយស្រួល និងការអនុវត្តការរៀបចំសេវារដ្ឋបាលនេះកាន់តែមានប្រសិទ្ធភាពថែមទៀត៕