.jpg)
លោកនាយករដ្ឋមន្ត្រី ហ៊ុន សែន និងស្ត្រីមានផ្ទៃពោះ ពីម្សិលមិញ។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសជាថ្មីទៀត ពីការដាក់ឱ្យអនុវត្តក្របខ័ណ្ឌគោលនយោបាយស្ត្រីជាមួយកម្មការិនីមានផ្ទៃពោះដោយរាជរដ្ឋាភិបាល នឹងផ្តល់ការឧបត្ថម្ភបន្ថែមទៀត ដល់កម្មការិនីទាំងអស់ចាប់ពីពេលចាប់ផ្តើមមានផ្ទៃពោះដំបូង រហូតដល់កូនមានអាយុ ២ ឆ្នាំ។
ការប្រកាសដូច្នេះ ត្រូវបានធ្វើឡើងនៅក្នុងពិធីសំណេះសំណាលជាមួយកម្មករនិយោជិត, ទស្សនាពិព័រណ៍សមិទ្ធផលក្នុងតំបន់សេដ្ឋកិច្ចពិសេសក្រុងព្រះសីហនុ និងសម្ពោធដាក់ឱ្យដំណើរការរោងចក្រផលិតសម្បកកង់ដើម្បីអបអរសាទរខួបលើកទី១០ នៃគំនិតផ្ដួចផ្ដើមខ្សែក្រវាត់ និងផ្លូវដែលជាសមិទ្ធផលកើតចេញពីនយោបាយ ឬគំនិតផ្តួចផ្តើម «ខ្សែក្រវាត់ និងផ្លូវ» នាថ្ងៃទី ២២ ខែឧសភា ឆ្នាំ ២០២៣។ លោកនាយករដ្ឋមន្ត្រីលើកឡើងថា ការឧបត្ថម្ភថវិកាដល់កម្មការិនីចាប់ពីមានផ្ទៃពោះ រហូតដល់កូនអាយុ ២ ឆ្នាំ ជាគោលនយោបាយជាក់លាក់ មិនមែនឆក់កណ្តៀត ឬជាការសន្យាខ្យល់នោះទេ។
លោកមានប្រសាសន៍ថា៖ «ចាប់ផ្តើមពីការដាក់ចេញគោលនយោបាយគាំពារសង្គម ខ្ញុំសម្រេចដាក់ឱ្យមុនគេគឺការគិតគូរដល់ស្ត្រីមានផ្ទៃពោះ ហើយមិនតែប៉ុណ្ណោះ កម្មការិនីមានផ្ទៃពោះ ក្រោយពេលសម្រាលកូនហើយក៏អាចឈប់សម្រាកបាន ៣ ខែផងដែរ និងថែមទាំងបានប្រាក់ខែ ១២០% ទៀត។ អ៊ីចឹងខ្ញុំសង្ឃឹមថា ស្ត្រីកម្មការិនីដទៃទៀតនឹងមិនច្រណែនជាមួយនឹងស្ត្រីមានផ្ទៃពោះទេ»។
ជាមួយគ្នានេះ លោក ហ៊ុន សែន ក៏បានបញ្ជាក់ដែរថា ការប្រកាសនេះ គឺផ្តល់ជូនចំពោះកម្មការិនីទាំងអស់នៅក្នុងវិស័យសេដ្ឋកិច្ចក្នុងប្រព័ន្ធ ដែលគ្រប់គ្រងដោយក្រសួងការងារ និងបណ្ដុះបណ្ដាលវិជ្ជាជីវៈប៉ុណ្ណោះ ខណៈលោកក៏បានណែនាំឱ្យក្រសួងសេដ្ឋកិច្ច និងហិរញ្ញវត្ថុ ពិនិត្យមើលលើគោលនយោបាយផ្តល់ ៤ ម៉ឺនរៀលបន្ថែមទៀត សម្រាប់កម្មការិនីពេលទៅពិនិត្យផ្ទៃពោះផងដែរ។
ពាក់ព័ន្ធនឹងរឿងនេះ លោកអាត់ធន់ប្រធានសហភាពការងារកម្ពុជា បានថ្លែងថា កន្លងមកលោកឃើញថា ការអនុវត្តកម្មវិធីឧបត្ថម្ភសាច់ប្រាក់ជូនកម្មករជានារី ក្នុងពេលមានបុត្រ របស់រដ្ឋាភិបាល មានសកម្មភាពជាហូរហែ ខណៈលោកថា នាប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជាបានយកចិត្តទុកដាក់ទៅលើប្រព័ន្ធសន្តិសុខសង្គមបានច្រើនផងដែរ។
លោក អាត់ ធន់ ក៏បានជំរុញឱ្យរដ្ឋាភិបាលត្រូវផ្តោតការយកចិត្តទុកដាក់លើការងារផ្សេងៗទៀត ដូចជា សិទ្ធិកម្មករ និងដំឡើងប្រាក់ខែកម្មករបន្ថែមទៀត ពិសេសត្រូវអនុវត្តលើរបបសន្តិសុខសង្គមឱ្យបានទូទាំងប្រទេស និងកាន់តែមានប្រសិទ្ធភាពថែមទៀត ព្រោះកន្លងមកការអនុវត្តប្រព័ន្ធនេះនៅមានកម្រិតតិចតួចនៅឡើយ។
លោក ឈួរ សុបញ្ញា រដ្ឋលេខាធិការក្រសួងសង្គមកិច្ច និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃមូលនិធិជាតិជំនួយសង្គម បានថ្លែងនៅថ្ងៃទី ២២ ខែឧសភា ឆ្នាំ ២០២៣ ថា ក្រោយទទួលបានអនុសាសន៍ពីលោកនាយករដ្ឋមន្ត្រីភ្លាម ក្រុមការងារបច្ចេកទេស នៃក្រសួងសង្គមកិច្ច ក្រុមការងារក្រសួងការងារ និងអគ្គលេខាធិការដ្ឋានក្រុមប្រឹក្សាជាតិគាំពារសង្គម កំពុងរៀបចំការប្រជុំ ដើម្បីសិក្សាពីទិដ្ឋភាពបច្ចេកទេស សិក្សាទិដ្ឋភាពឯកសារគតិយុត្ត និងយន្តការបច្ចេកទេសនានា សំដៅឈានទៅអនុវត្តតាមអនុសាសន៍នេះ ឱ្យបានឆាប់រហ័ស និងកាន់តែមានប្រសិទ្ធភាព។
លោកបញ្ជាក់ថា៖ «អ្វីដែលសម្តេចតេជោ ហ៊ុន សែន មានប្រសាសន៍ គឺសំដៅលើការឧបត្ថម្ភថវិកាចំនួន ៤ ដង មុនសម្រាល និង ១០ ដងក្រោយសម្រាល មានន័យថា យើងធ្វើទៅតាមយន្តការ និងអនុក្រឹត្យចាស់»។
លោក ឈួរ សុបញ្ញា ពន្យល់ថា យន្តការ និងអនុក្រឹត្យចាស់នេះ គឺបានកំណត់ថា ការផ្តល់ប្រាក់ឧបត្ថម្ភមុនសម្រាល ៤ ដង ដែលម្តងបានប្រាក់ ៤ ម៉ឺនរៀល, ពេលសម្រាល គឺសម្រាប់កម្មការិនីទទួលបាន ៤០ ម៉ឺនរៀល ដោយអាស្រ័យលើចំនួនកូន ១ ឬ ២ នាក់ជាដើម ហើយក្រោយសម្រាល ១០ ដងទៀត គឺទទួលបានម្តងៗ ៤ ម៉ឺនរៀល។ អ៊ីចឹងសរុប ១០ ដងនេះអាចបាន ៤០ ម៉ឺនរៀលរហូតដល់កូនអាយុ ២ ឆ្នាំ។
បើតាមលោកនាយករដ្ឋមន្ត្រី ការអនុវត្តការឧបត្ថម្ភបន្ថែមទៀតដល់កម្មការិនីមានផ្ទៃពោះនាពេលនេះ ក៏មិនអាចដួលរលំសេដ្ឋកិច្ចកម្ពុជាដែរប៉ុន្តែផ្ទុយទៅវិញវាក៏បានជួយកម្មការិនីឱ្យមានសុខភាពល្អថែមទៀត ខណៈបច្ចុប្បន្ន រាជរដ្ឋាភិបាលមានកម្មវិធីមួយដែលកំពុងអនុវត្តដោយក្រសួងសង្គមកិច្ច ដែលមកដល់ពេលនេះ មានស្ដ្រីជិត ៥ សែនគ្រួសារ បានប្រើថវិកាអស់ចំនួន ១៥ ០០០ លានដុល្លាររួចហើយ។
យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា គិតត្រឹមត្រីមាសទី ១ ឆ្នាំ ២០២៣ នេះ មានកម្មការិនីឆ្លងទន្លេចំនួនសរុបជាង ៣៥ ម៉ឺន ៦ ពាន់នាក់ ដែលមានចំនួនកូនជាង ៣៥ ម៉ឺន ៨ ពាន់នាក់ បានផ្តល់ប្រាក់ឧបត្ថម្ភសរុបជាង ១៤៣ ប៊ីលានរៀល ឬស្មើនឹងប្រមាណជាង ៣៥ លានដុល្លារអាមេរិក៕
