រថយន្តជួបគ្រោះថ្នាក់ចរាចរណ៍នៅថ្ងៃទី ២៣ ឧសភា។ រូបថត នគរបាល
ភ្នំពេញៈ យ៉ាងហោចមានមនុស្សរហូតដល់ ១៣ នាក់បានស្លាប់ និង ៥៨ នាក់ផ្សេងទៀត រងរបួសធ្ងន់ស្រាល ដោយសារគ្រោះថ្នាក់ចរាចរណ៍ទូទាំងប្រទេសក្នុងរយៈពេល ២ ថ្ងៃមកនេះ។គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី ២៣ ខែឧសភា ឆ្នាំ ២០២៣ បានបណ្តាលឱ្យមនុស្សស្លាប់ រហូតដល់ ៩ នាក់ របួសធ្ងន់ ១៧ នាក់ និងរងរបួសស្រាល ៣៤ នាក់ ។
យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស ចេញដោយនាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិ នៅថ្ងៃទី ២៣ ឧសភា បានបញ្ជាក់ថា គ្រោះថ្នាក់ចរាចរណ៍ដែលបង្កឱ្យមានមនុស្សស្លាប់ និងរងរបួសសរុបចំនួន ៦០ នាក់នេះ គឺកើតឡើងដោយសារការប៉ះទង្គិចគ្នាចំនួន ១៦ លើក មានកត្តាល្បឿន ៤ លើក មិនគោរពសិទ្ធិ ៣ លើកមិនប្រកាន់ស្តាំ ៣ លើក បើកជែងក្នុងស្ថានភាពគ្រោះថ្នាក់ ១ លើក បត់ក្នុងស្ថានភាពគ្រោះថ្នាក់ ២ លើក ស្រវឹង ១ លើក និងកត្តាយានយន្ត ២ លើក។
ចំណែកគ្រោះថ្នាក់ចរាចរណ៍ផ្លូវគោកទូទាំងប្រទេសកាលពីថ្ងៃទី ២២ ខែឧសភា បណ្តាលឱ្យមនុស្សស្លាប់ ៤ នាក់ របួសធ្ងន់ ៤ នាក់ និងស្រាល ៣ នាក់។
គ្រោះថ្នាក់ចរាចរណ៍ដែលបង្កឱ្យមានមនុស្សស្លាប់ និងរបួសសរុបចំនួន ១១ នាក់ កាលពីថ្ងៃទី ២២ ឧសភា គឺកើតឡើងដោយសារការប៉ះទង្គិច គ្នាចំនួន ៧ លើក មានកត្តាល្បឿន ៣ លើក មិនគោរពសិទ្ធិអាទិភាព ៣ លើក និងបត់នៅក្នុងស្ថានភាពគ្រោះថ្នាក់ ១ លើក៕
.jpg)
