លោករដ្ឋមន្ត្រីកសិកម្ម ឌិត ទីណា ពេលជួបសំណេះសំណាល ជាមួយសហភាពសហគមន៍កសិកម្មព្រះវិហារមានជ័យ កាលពីថ្ងៃទី២៥ឧសភា។ រូបថត ក្រសួងកសិកម្ម
ព្រះវិហារៈ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យសហភាពសហគមន៍កសិកម្មព្រះវិហារមានជ័យ យកចិត្តទុកដាក់សិក្សាពីខ្សែច្រវាក់តម្លៃ និងត្រូវមានផែនការផលិតច្បាស់លាស់ ក្នុងការជំរុញការធ្វើស្រូវសរីរាង្គ តាមរយៈការប្រើប្រាស់ពូជស្រូវសុទ្ធ ដើម្បីមានផលិតភាពខ្ពស់ គុណភាពល្អ តម្លៃល្អ និងងាយប្រកួតប្រជែង។ នេះបើយោងតាមផេកហ្វេសប៊ុកក្រសួងកសិកម្ម។
ជាមួយគ្នានេះដែរ លោករដ្ឋមន្ត្រីក៏បានធ្វើការណែនាំឱ្យគិតគូរលើការវេចខ្ចប់ឱ្យមានភាពទាក់ទាញ ដើម្បីបង្ហាញពីអត្តសញ្ញាណ ស្លាកយីហោអង្ករផងដែរ។
លោកឌិត ទីណា បានធ្វើការណែនាំបែបនេះ ក្នុងពេលលោកនិងថ្នាក់ដឹកនាំក្រសួងកសិកម្ម បានចុះទៅទស្សនកិច្ចស្នាក់ការសហភាពសហគមន៍កសិកម្មព្រះវិហារមានជ័យ ស្ថិតនៅភូមិឯកភាព ឃុំប៉ាលហាល ក្រុងព្រះវិហារ កាលពីថ្ងៃទី២៥ឧសភា។
លោករដ្ឋមន្ត្រីមានប្រសាសន៍ថា សហភាពសហគមន៍កសិកម្មត្រូវធ្វើការជាមួយគ្នា សហការគ្នាឱ្យបានល្អ ដោយតម្កល់ផលប្រយោជន៍ជាតិជាធំ ពង្រឹងគុណភាពនិងខ្សែច្រវាក់ផ្គត់ផ្គង់ បង្កើនការនាំចេញ បង្កើនចំណូល មានចំណេញ មានប្រសិទ្ធភាពសេដ្ឋកិច្ច និងភាពរីកចម្រើន។
ទាក់ទងនឹងការងារនេះ លោកថា ក្រសួងនឹងជួយគាំទ្រ ក៏ដូចជាជួយសម្រួលដល់កសិករ ដើម្បីទទួលបានផលចំណេញពីផលិតកម្ម៕
.jpg)
