បាត់ដំបងៈ ឧបនាយក​រដ្ឋមន្រ្តី រដ្ឋមន្រ្តី​ក្រសួង​មហាផ្ទៃ លោក ស ខេង បានស្នើ​ឱ្យ​មានការបន្ត​រួមគ្នា ដើម្បី​ថែរក្សា​ការពារ​សុខសន្តិភាព​ជាអាទិភាព ឱ្យ​ដើរ​ទន្ទឹមគ្នា​នឹងការខិតខំ​ថែរក្សាសន្តិសុខ សណ្ដាប់​សាធារណៈ និងឱ្យ​អាជ្ញាធរ​បន្ត​ការងារ​ជាប្រក្រតី​តាម​តួនាទី និងភារកិច្ច។

ការស្នើ​នេះ​ត្រូវបាន​ធ្វើឡើង​នាថ្ងៃ​ទី២៧​ខែឧសភា ក្នុងពេល​ដែលលោក​ឧបនាយក​រដ្ឋមន្រ្តីធ្វើ​ជាអធិបតី​ក្នុងពិធី​សំណេះសំណាល​ជាមួយ​មន្ត្រី​រាជការ កងកម្លាំង អតីតយុទ្ធ​ជន និវត្តជន ក្នុង​ស្រុក​សំឡូត ខេត្ត​បាត់ដំបង។

ក្នុងឱកាស​នោះដែរ លោក ស ខេង ក៏បានគូសបញ្ជាក់​អំពី​ការប្រជែង​ភូមិ​សាស្រ្តនយោបាយ និងវិបត្តិ​សង្គ្រាម ព្រមទាំង​បញ្ជាក់​អំពី​ស្ថានភាព​ផ្ទៃក្នុង​ប្រទេស ដែល​ក្រុមប្រឆាំង​ជ្រុលនិយម​នៅតែបន្ត​ប៉ុនប៉ង​បំផ្លាញ​សន្តិភាព។

យ៉ាងណាក៏ដោយ ក្រោមការដឹកនាំរបស់​លោកនាយក​រដ្ឋមន្រ្តី ហ៊ុន សែន រាជរដ្ឋាភិបាល​បានដាក់​ចេញនូវ​គោលនយោបាយ និងវិធានការ​នានា​ដោយមាន​ការគាំទ្រ និងការចូលរួម​ពីមន្ត្រី​រាជការ កងកម្លាំង មានសមត្ថកិច្ច អាជ្ញាធរ​គ្រប់​លំដាប់​ថ្នាក់ និងប្រជាពលរដ្ឋ​ធ្វើ​ឱ្យ​ប្រទេស​ជាតិ​អាច​ជម្នះ​បាននូវ​បញ្ហាប្រឈម​នានា​ជាសកល។ ក្នុងនោះរួម​ទាំង​ជំងឺកូវីដ១៩ ព្រមទាំង​ទប់ស្កាត់​បាន​នូវរាល់ឧបាយកល​ទុច្ចរិត​របស់​ក្រុមប្រឆាំង​ជ្រុលនិយម រក្សា​បាន​សុខសន្តិភាព និងការអភិវឌ្ឍ​សេដ្ឋកិច្ច។ នេះបើយោងតាម​ហ្វេសប៊ុក​របស់​លោកស ខេង។

លោក​ឧបនាយក​រដ្ឋមន្រ្តី​បានបន្ត​ថា សមិទ្ធផល​នានា ដែលកើតចេញ​ពី​មូលដ្ឋាន​នៃការខិតខំ​ប្រឹងប្រែង​ថែរក្សា​សុខសន្តិភាព​មានដូចជា​ការបន្ត​អនុវត្ត​លទ្ធិប្រជាធិបតេយ្យ សេរីពហុបក្ស ពិសេស​ការរៀបចំ​ការបោះឆ្នោត​ជាទៀងទាត់ ការដាក់ចេញ​គោលនយោបាយ​ពង្រឹងសេដ្ឋកិច្ច​ជាតិ ធានាការផ្ដល់​សេវា​សាធារណៈ និងការបន្ត​អនុវត្ត​គម្រោង​អភិវឌ្ឍន៍​ផ្សេងៗទៀត។ ក្នុងនោះ​ក៏មាន​ការអភិវឌ្ឍ​ធនធាន​មនុស្ស ផ្លូវ​គមនាគមន៍ ទឹក​ស្អាត និង​ប្រព័ន្ធ​ធារាស្ត្រ និងការតបណ្ដាញ​អគ្គិសនី។

លោក ស ខេង ក៏បានស្នើ​ឱ្យ​មានការបន្ត​រួមគ្នា​ជំរុញ​គាំទ្រ​ការអនុវត្ត​គោលនយោបាយ​ភូមិ ឃុំ សង្កាត់ មាន​សុវត្ថិភាព ព្រមទាំង​ប្ដេជ្ញាចិត្ត​រួមគ្នា​ធ្វើឱ្យ​ការបោះឆ្នោត​ជ្រើសតាំង​តំណាងរាស្រ្ត​នីតិកាល​ទី៧ នាខែកក្កដា ឆ្នាំ២០២៣​ខាងមុខនេះ ឱ្យ​ប្រព្រឹត្ត​ទៅដោយ​រលូន ដើម្បី​រួមគ្នា​រក្សា​ស្ថិរភាព​ជាតិ និងការអភិវឌ្ឍ​តាមគន្លង​ប្រជាធិបតេយ្យ៕​