ភ្នំពេញៈ រាជរដ្ឋាភិបាលកម្ពុជានៅតែបន្តយកចិត្តទុកដាក់ខ្ពស់ និងកំពុងផ្តល់អាទិភាពក្នុងការលើកកម្ពស់សេដ្ឋកិច្ចក្រៅប្រព័ន្ធ តាមរយៈការអនុវត្តគោលការណ៍លុបការបង់ភាស៊ី និងការបង់ថ្លៃផ្សេងៗទៀត ចំពោះការលក់ដូររបស់ប្រជាពលរដ្ឋដែលប្រកបរបរក្រៅប្រព័ន្ធ។
នៅក្នុងសិក្ខាសាលាស្ដីពី «ការលើកកម្ពស់ធុរកិច្ចក្រៅប្រព័ន្ធ»នាចុងសប្តាហ៍កន្លងមក លោកហ៊ាន សាហ៊ីប រដ្ឋមន្ត្រីប្រតិភូ អមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុបានលើកឡើងថា ការអនុវត្តគោលការណ៍លុបការបង់ភាស៊ី និងការបង់ថ្លៃផ្សេងៗសម្រាប់អ្នករកស៊ីក្រៅប្រព័ន្ធគឺដើម្បីលើកកម្ពស់សេដ្ឋកិច្ចក្រៅប្រព័ន្ធឱ្យកាន់តែប្រសើរឡើងថែមមួយកម្រិតទៀត។
លោកបានបញ្ជាក់ថា៖«ការលើកកម្ពស់ការយល់ដឹងសាធារណៈ ក៏ដូចជាការជំរុញឱ្យមានការចូលរួមពីវិស័យឯកជន គឺជាកិច្ចការដ៏សំខាន់ក្នុងការលើកកម្ពស់ធុរកិច្ចក្នុងវិស័យសេដ្ឋកិច្ចក្រៅប្រព័ន្ធ។ ខ្ញុំកត់សម្គាល់ឃើញថា នៅកម្ពុជា សកម្មភាពធុរកិច្ចក្រៅប្រព័ន្ធមានចំនួនច្រើន ដែលភាគច្រើនជាបុគ្គលស្វ័យនិយោជន៍ និងអង្គភាពសេដ្ឋកិច្ចធុនមីក្រូ ដែលមានក្នុងវិស័យលក់ដុំ លក់រាយ ជួសជុលយានយន្ត ដឹកជញ្ជូន និងសេវាកម្មផ្សេងទៀត»។
យ៉ាងណាក៏ដោយលោកបានបន្ថែមថា ការលើកកម្ពស់សេដ្ឋកិច្ចក្រៅប្រព័ន្ធ ត្រូវមានគោលនយោបាយ យុទ្ធសាស្ត្រ រួមទាំងកម្មវិធី និងគម្រោង ព្រមទាំងការចូលរួមពីតួអង្គពាក់ព័ន្ធនានា។ ដោយឡែក ការលើកកម្ពស់សហគ្រិនភាព និងពង្រឹងសមត្ថភាពវិស័យឯកជន រួមទាំងធុរជន ក្នុងសេដ្ឋកិច្ចក្រៅប្រព័ន្ធនឹងចូលរួមចំណែកសំខាន់សម្រាប់អភិវឌ្ឍធុរកិច្ចក្រៅប្រព័ន្ធ។
លោកហ៊ាន សាហ៊ីបបានមានប្រសាសន៍ថា៖«ក្នុងន័យនេះតួអង្គពាក់ព័ន្ធអាចអនុវត្តសកម្មភាពនានា ដើម្បីគាំទ្រដល់ធុរកិច្ចក្រៅប្រព័ន្ធដូចជាការប្រឹក្សាយោបល់ ការផ្តល់ការលើកទឹកចិត្ត ការបណ្តុះបណ្តាល និងលទ្ធភាពទទួលបានហិរញ្ញប្បទាន ជាដើម។ ទន្ទឹមនេះ រាជរដ្ឋាភិបាលកម្ពុជា ក៏បានផ្ដល់ការគ្របដណ្ដប់ការថែទាំសុខភាព ដល់បុគ្គលបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ តាមរយ:មូលនិធិសមធម៌សុខាភិបាលដែលរដ្ឋជាអ្នករាប់រងចំណាយទាំងស្រុងផងដែរ»។
លោកស្រីកែវ មុំប្រធានសមាគមសហគ្រិនស្រ្តីកម្ពុជាបានកត់សម្គាល់ដែរថាស្ថានភាពរបស់ធុរកិច្ចក្រៅប្រព័ន្ធក្នុងវិស័យផលិតកម្ម និងម្ហូបអាហារ ហាក់មិនទាន់មានភាពល្អប្រសើរនៅឡើយ ដែលទាមទារឱ្យមានការកែលម្អបន្ថែមទៀត។
លោកស្រីថាម្យ៉ាងវិញទៀតការធ្វើអាជីវកម្មដោយមិនមានការកត់ត្រានូវរបាយការណ៍ហិរញ្ញវត្ថុក៏នៅតែទម្លាប់របស់ម្ចាស់អាជីវកម្មក្រៅប្រព័ន្ធមួយចំនួនដែលបញ្ហាទាំងអស់នេះនៅតែជាឧបសគ្គសម្រាប់អ្នករកស៊ីក្រៅប្រព័ន្ធ។
លោកស្រីកែវ មុំបានប្រាប់ថា៖«បច្ចុប្បន្នស្ថានភាពនិងបញ្ហាប្រឈមសម្រាប់ធុរកិច្ចក្រៅប្រព័ន្ធ ក្នុងវិស័យផលិតកម្ម និងម្ហូបអាហារ រួមមានផលិតផលមិនមានស្ដង់ដាអនាម័យផលិតផលនៅមានកម្រិត ទីកន្លែងលក់ដូរតូចចង្អៀត និងនៅមានកម្រិត។ មិនត្រឹមតែប៉ុណ្ណោះ ការលក់ដូរខ្លះមិនមានកន្លែងលក់ពិតប្រាកដ និងបន្តការលក់ដូរតាមបែបប្រណៃណី ដែលមិនអាចឱ្យពួកគាត់អាចពង្រីកអាជីវកម្មរបស់ខ្លួន»។
លោកអាត់ ធន់ប្រធានសហភាពការងារកម្ពុជា(CLC)ឱ្យដឹងដែរថាការអនុវត្តគោលការណ៍លុបការបង់ភាស៊ី និងការបង់ថ្លៃផ្សេងៗ សម្រាប់អ្នករកស៊ីក្រៅប្រព័ន្ធរបស់រាជរដ្ឋាភិបាលនេះ ជារឿងល្អ ពោលគឺចំពេលដែលអ្នកប្រកបរបរសេដ្ឋកិច្ចក្រៅប្រព័ន្ធកំពុងតែជួបការលំបាកដោយសារអាជ្ញាធរតម្រូវឱ្យបង់ភាស៊ី ថ្លៃសណ្តាប់ធ្នាប់ ឬបង់ទៅលើសេវាផ្សេងៗ។
លោកថ្លែងថា៖«បើសិនមានការអនុគ្រោះបែបនេះមែន ខ្ញុំគិតថានឹងធ្វើឱ្យបងប្អូនអ្នកនៅក្នុងសេដ្ឋកិច្ចក្រៅប្រព័ន្ធយើងបានរួចផុតពីការចំណាយលុយទៅលើអាជ្ញាធរ ឬក៏សមត្ថកិច្ចជាដើម ដែលស្ថិតនៅក្នុងស្ថានភាពវិបត្តិសកលនេះ អ្នកប្រកបរបរសេដ្ឋកិច្ចក្រៅប្រព័ន្ធជួបការលំបាកច្រើនក្នុងការរកចំណូល ដើម្បីផ្គត់ផ្គង់ជីវភាពប្រចាំថ្ងៃ»។
លោកអាត់ ធន់រំពឹងថារាជរដ្ឋាភិបាលនឹងគិតគូរផ្តល់លក្ខខណ្ឌជីវភាពមួយដ៏សមរម្យបន្ថែមទៀត ដល់អ្នករកស៊ីនៅក្នុងសេដ្ឋកិច្ចក្រៅប្រព័ន្ធបន្ទាប់ពីការអនុវត្តគោលការណ៍លុបការបង់ភាស៊ីនិងការបង់ថ្លៃផ្សេងៗហើយនោះ៕
លោកហ៊ាន សាហ៊ីប រដ្ឋមន្ត្រីប្រតិភូ អមនាយករដ្ឋមន្ត្រីថ្លែងក្នុងសិក្ខាសាលាស្ដីពី«ការលើកកម្ពស់ធុរកិច្ចក្រៅប្រព័ន្ធ»នាថ្ងៃទី២៦ ខែឧសភា។ រូបថត៖ មជ្ឈមណ្ឌលអភិវឌ្ឍធុរកិច្ច