​ភ្នំពេញៈ​ គណៈកម្មាធិការ​ជាតិ​រៀបចំ​ការបោះឆ្នោត ​(​គ​.​ជ​.​ប​.)​ បាន​ចាប់ឆ្នោត​កំណត់​លំដាប់​​លេខ​រៀង​ឈ្មោះ​គណបក្សនយោបាយ​ឈរឈ្មោះ​បោះឆ្នោត​លើ​សន្លឹកឆ្នោត​សម្រាប់​ការបោះ​​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ ឆ្នាំ ​២០២៣ ដោយ​ក្នុងនោះ​គណបក្ស​ប្រជាជន​កម្ពុជា​ដែល​កំពុងកាន់​អំណាច​ទ​ទួលបាន​លេខ​រៀង​ចុងក្រោយ​គេ ក្នុងចំណោម​គណបក្ស​​នយោបាយ​សរុប​ចំនួន ១៨​។

​ពិធី​ចាប់ឆ្នោត​កំណត់​លេខ​រៀង​របស់​គណបក្សនយោបាយ​នេះ​ធ្វើឡើង​នៅ​ព្រឹក​ថ្ងៃទី​ ២៩ ខែឧសភា ឆ្នាំ ​២០២៣ ក្រោម​ព្រះ​វត្តមាន និង​ចាប់ឆ្នោត​ដោយ​សម្តេចព្រះ​អគ្គ​មហា​សង្ឃ​រាជាធិបតី​កិត្តិ​ឧទ្ទេស​បណ្ឌិត ទេព វង្ស សម្តេចព្រះ​មហាសង្ឃរាជ​នៃ​គណៈមហានិកាយ​នៃ​ព្រះ​​រាជាណាចក្រ​កម្ពុជា និង​សម្តេច​ព្រះ​អភិ​សិរី​សុគន្ធា​មហា​សង្ឃ​​រាជាធិបតី​កិត្តិ​ឧទ្ទេស​បណ្ឌិត បួរ គ្រី សម្តេចព្រះ​មហាសង្ឃរាជ​នៃ​គណៈធម្មយុត្តិកនិកាយ​នៃ​ព្រះ​រាជាណាចក្រ​កម្ពុជា​។

​តាម​លទ្ធផល​នៃ​ការចាប់​ឆ្នោត​នេះ​បាន​បង្ហាញថា លេខ​រៀង​ទី​១ គណបក្ស​សំបុក​ឃ្មុំ​,​លេខ​រៀង​ទី​ ២ គណបក្ស​ខ្មែរ​តែមួយ​,​ លេខ​រៀង​ទី​៣ គណបក្ស​សញ្ជាតិ​កម្ពុជា​, លេខ​រៀង​ទី​៤ គណបក្ស​​ខ្មែរ​រួបរួម​ជាតិ​, លេខ​រៀង​ទី​៥ គណបក្ស​កម្លាំង​ប្រជាធិបតេយ្យ​, លេខ​រៀង​ទី​៦ គណបក្ស​កសិករ​,​លេខ​រៀង​ទី​៧ គណបក្ស​ស្ត្រី​ដើម្បី​ស្ត្រី​,​លេខ​រៀង​ទី​៩​គណ​​បក្ស​ខ្មែរ​ឈប់​ក្រ​,​លេខ​រៀង​ទី​១០​ គណបក្ស​ហ្វ៊ុនស៊ីនប៉ិច​។​

​គ​.​ជ​.​ប​.​បាន​បន្តទៀតថា សម្រាប់​លេខ​រៀង​ទី​១១ គណ​បក្ស​ធម្មាធិបតេយ្យ​,​ លេខ​រៀង​ទី​១២ គណបក្ស​មូលដ្ឋាន​,​ លេខ​រៀង​ទី​១៣ គណបក្ស​បំណង​ប្រជាពលរដ្ឋ​, លេខ​រៀង​ទី​១៤ គណបក្ស​ខ្មែរ​អភិវឌ្ឍន៍​សេដ្ឋកិច្ច​, លេខ​រៀង​ទី​១៥ គណបក្ស​ខ្មែរ​​អភិរក្ស​,​ លេខ​រៀង​ទី​១៦ គណ​​បក្ស​យុវជន​កម្ពុជា​,​លេខ​រៀង​ទី​១៧ គណបក្ស​ជនជាតិដើម​ប្រ​ជា​ធិបតេយ្យ និង​លេខ​រៀង​ទី​១៨ គឺ​គណបក្ស​ប្រជាជន​កម្ពុជា​។​

​លោក ប្រាជ្ញ ចន្ទ ប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត ​(​គ​.​ជ​.​ប​.) បាន​ថ្លែង​នាឱកាស​នោះ​ថា នៅពេល​ខាងមុខនេះ គ​.​ជ​.​ប​.​ត្រូវ​ផលិត​សន្លឹកឆ្នោត​តាម​មណ្ឌល​នីមួយៗ សម្រាប់​ប្រើប្រាស់​ក្នុង​ការបោះ​ឆ្នោត​ជ្រើសតាំង​តំណាងរាស្ត្រ នីតិកាល​ទី៧ ដែល​ក្នុង​សន្លឹក​​ឆ្នោត​ទាំងនោះ ត្រូវការ​ជា​ចាំ​​បាច់​នូវ​លំដាប់​លេខ​រៀង​ឈ្មោះ​គណបក្សនយោបាយ​ឈរឈ្មោះ​បោះឆ្នោត ដែល​នឹងត្រូវ​កំណត់​នៅលើ​សន្លឹកឆ្នោត​សម្រាប់​មណ្ឌល​ទាំង​ ២៥ ទូទាំងប្រទេស​។

ការ​ចាប់​ឆ្នោតកំណត់​លំដាប់លេខ​រៀង​គណបក្ស​នយោបាយ​ម្សិលមិញ​។ ហេង ជីវ័ន

​លោក​បន្តថា ដោយ​ផ្អែក​តាម​បទពិសោធន៍​ល្អ​ក្នុង​ការបោះ​ឆ្នោត​ជ្រើសតាំង​តំណាងរាស្ត្រ ក៏ដូចជា​បោះឆ្នោត​ជ្រើសតាំង​សមាជិក​ព្រឹទ្ធសភា និង​ដើម្បី​ធានាបាន​ភាពយុត្តិធម៌ និង​តម្លាភាព ក្នុងការ​កំណត់​លំដាប់​លេខ​រៀង​ឈ្មោះ​គណបក្សនយោបាយ​ឈរឈ្មោះ​បោះឆ្នោត​នេះ គ​.​ជ​.​ប​.​បានរៀបចំ​ពិធី​នេះ​ឡើង​ដោយបាន​យាង​សម្តេចព្រះសង្ឃរាជ​ទាំង​ ២​ គណៈ ធ្វើជា​ព្រះរាជា​ធិ​ប​តី និង​ប្រោស​ព្រះរាជទាន​ការ​ចាប់ឆ្នោត​កំណត់​លំដាប់​លេខ​រៀង​គណបក្សនយោបាយ​លើ​សន្លឹកឆ្នោត​សម្រាប់​ការបោះឆ្នោត​ជ្រើសតាំង​តំណាងរាស្ត្រ នីតិ​កាល​ទី ​៧ ។​

​លោក​ ប្រាជ្ញ ចន្ទ បាន​ថ្លែងថា​៖ «​លទ្ធផល​នៃ​ការចាប់​ឆ្នោត ដើម្បី​កំណត់​លំដាប់​លេខ​រៀង​ឈ្មោះ​គណបក្សនយោបាយ​មាន​អត្ថន័យ​សំខាន់​ណាស់​សម្រាប់​គណបក្សនយោបាយ​ទាំងអស់​ដែល​ឈរឈ្មោះ​បោះឆ្នោត​»​។​

​លោក​បាន​បន្តថា​៖ «​ការ​កំ​​ណ​ត់​លេខ​រៀង​គណបក្សនយោបាយ​នីមួយៗ​លើ​សន្លឹកឆ្នោត​នឹង​ជួយ​បង្កលក្ខណៈ​ងាយស្រួល​ដល់​គណបក្សនយោបាយ​ពាក់​ព័ន្ធ​ក្នុងការ​ឃោសនាបោះឆ្នោត ការបោះឆ្នោត និង​ជួយ​ឱ្យ​អ្នក​បោះឆ្នោត​អាច​ស្គាល់​បាន​ដោយ​ងាយស្រួល​នូវ​គណបក្ស​ន​យោ​បាយ​ដែល​គាត់​ស្រឡាញ់​ពេញ​ចិត្ត​»​។​

​ជាមួយគ្នានេះ លោក សុខ​ ឥសាន អ្នកនាំពាក្យ​គណបក្ស​​ប្រជាជន​កម្ពុជា ប្រាប់ឱ្យដឹង​នៅ​ថ្ងៃទី​ ២៩ ខែឧសភា​ថា កា​រៀបចំ​ពិធី​ចាប់ឆ្នោត​កំណត់​លំដាប់​លេខ​​រៀង​ឈ្មោះ​គណបក្សនយោបាយ​ឈរឈ្មោះ​បោះឆ្នោត​លើ​សន្លឹក​ឆ្នោត​មាន​តម្លាភាព និង​ត្រឹមត្រូវ ព្រោះ​មានការ​យាង​ចូលរួម និង​ចាប់ឆ្នោត​ដោយ​សម្តេចព្រះសង្ឃរាជ​ទាំង​ ២​ គណៈ​។​

​លោក​បាន​បញ្ជាក់ថា​៖ «​ក្នុងការ​ចាប់ឆ្នោត​កំណត់​លេខ​រៀង​នៅលើ​សន្លឹកឆ្នោត​នេះ គណបក្ស​ប្រជាជន​កម្ពុជា​ស្ថិតនៅ​លេង​រៀង​ចុងក្រោយ​គេ​បង្អស់​នៃ​គណបក្សនយោបាយ (​លេខ​​រៀង​ទី ១៨)​ ដូច​ទៅនឹង​ការបោះ​ឆ្នោត​លើក​មុន​ដែរ គឺ​គណបក្ស​ទទួលបាន​លេខ​រៀង​ទី​ ២០ ដែលមាន​ភាពងាយ ស្រួល​ប្រជាពលរដ្ឋ​ចំណាំ និង​គូស​គាំទ្រ​គណ​​បក្ស នៅពេល​បោះឆ្នោត​»​។​

​ពាក់ព័ន្ធ​នឹង​បញ្ហា​នេះដែរ លោក​ញឿ​ន រ៉ា​ដែន អ្នកនាំពាក្យ​គណបក្ស​ហ្វ៊ុន​ស៊ិនប៉ិច ក៏បាន​ប្រាប់ឱ្យដឹង​នៅ​ថ្ងៃទី​ ២៩ ខែឧសភា​ថា គណបក្ស​របស់លោក​ទ​ទួលបាន​លំដាប់​លេខ​រៀង​ទី​ ៩​ នៅលើ​សន្លឹកឆ្នោត​ដែល​ប្រជា​ជន​ខ្មែរ​ជាទូទៅ​តែង​យល់ថា​ជា​លេខ​ហុងស៊ុយ​។

​លោក​ប្រាប់ថា គណបក្ស​របស់លោក​ទ​ទួល​យក​ការរៀបចំ​ចាប់ឆ្នោត​របស់​គ​.​ជ​.​ប​.​ព្រោះ​មាន​តម្លាភាព​ចំពោះ​គណបក្ស​ន​យោ​​បាយ​ដែល​បាន​ចូលរួម​បោះ​ឆ្នោត​ទាំងអស់​៕