អ្នកធាក់ស៊ីក្លូដែលទទួលបានការគាំពារពីមូលនិធិត្រីចក្រយានកម្ពុជា។ រូបសាលាក្រុង
ភ្នំពេញៈ រដ្ឋបាលរាជធានីភ្នំពេញប្រកាសថា អ្នកប្រកបរបរធាក់ស៊ីក្លូប្រមាណ ៣០០ នាក់ នៅតែបន្តទទួលបានការគាំពារពីមូលនិធិត្រីចក្រយានកម្ពុជា ដែលមានលោកនាយករដ្ឋមន្ត្រី ហ៊ុន សែន ជាប្រធានកិត្តិយស ដោយក្នុងនោះ ទទួលបានប្រាក់ខែជាប្រចាំ និងសុខុមាលភាព បន្ទាប់ពីមូលនិធិនេះត្រូវបានបង្កើតឡើងតាំងពីឆ្នាំ ២០១៨។
កាលពីថ្ងៃទី ២៨ ខែឧសភា លោក ម៉េត មាសភក្តី អ្នកនាំពាក្យសាលារាជធានីភ្នំពេញបាននាំយកអាវភ្លៀង គ្រឿងបរិភោគ និងថវិកាមួយចំនួន ដើម្បីផ្តល់ជូនអ្នកប្រកបរបរធាក់ស៊ីក្លូប្រមាណ ៣០០ នាក់ បន្ថែមពីលើការឧបត្ថម្ភគាំពារជាប្រចាំទាំងជីវភាព និងសុខុមាលភាព។
ក្នុងឱកាសនោះលោក ម៉េត មាសភក្តី ប្រកាសថា អ្នកប្រកបរបរធាក់ស៊ីក្លូប្រមាណ ៣០០ នាក់ នឹងនៅតែបន្តទទួលបានការគាំពារពីមូលនិធិត្រីចក្រយានកម្ពុជា ដែលជាការគិតគូរជាប្រចាំរបស់លោកនាយករដ្ឋមន្ត្រី ។ លោក ម៉េត មាសភក្តី ប្រាប់ភ្នំពេញប៉ុស្តិ៍នៅថ្ងៃទី ២៩ ឧសភាថា ចំពោះមូលនិធិត្រីចក្រយានកម្ពុជា ដែលអ្នកធាក់ស៊ីក្លូ នៅតែបន្តទទួលបានគឺមានជាប្រាក់ខែជារៀងរាល់ខែចំនួន ២១ ម៉ឺនរៀល ដោយក្នុង ១ ខែពួកគាត់ អាចបើកបាន ៣ ដង ក្នុង ១ ដង ៧ ម៉ឺនរៀល និងការគាំពារសុខុមាលភាពដោយឥតគិតថ្លៃ។
លោកបញ្ជាក់ថា៖ «តាមរយៈការគិតគូរជាប្រចាំរបស់សម្តេចតេជោនាយករដ្ឋមន្ត្រី និងជាប្រធានកិត្តិយសមូលនិធិ ក៏ដោយសាររដូវវស្សាខិតជិតមកដល់ផងដែរនោះ ឯកឧត្តម ឃួង ស្រេង ប្រធានក្រុមប្រឹក្សាភិបាល បានចាត់តាំងរូបខ្ញុំ នាំយកអាវភ្លៀង គ្រឿងបរិភោគ និងថវិកាមួយចំនួន ផ្តល់ជូនលោកពូលោកអ៊ុំជាអ្នកប្រកបរបរធាក់ស៊ីក្លូ បន្ថែមពីលើការឧបត្ថម្ភគាំពារជាប្រចាំទាំងជីវភាព និងសុខុមាលភាព»។
កាលពីឆ្នាំ ២០១៨ លោក ហ៊ុន សែន បានប្រកាសបង្កើតមូលនិធិជាលើកដំបូង ដើម្បីប្រមូលថវិកាពីសប្បុរសជន ខណៈលោកក៏បានផ្តល់ថវិកាជាប្រចាំខែសម្រាប់ផ្គត់ផ្គង់អ្នកធាក់ស៊ីក្លូ ដែលភាគច្រើនជាជនចាស់ជរា និងគ្មានលំនៅដ្ឋាន សំដៅអភិរក្សស៊ីក្លូ ដែលមានដើមកំណើត តាំងពីសម័យអាណានិគមនិយមបារាំង។ ទន្ទឹមនឹងការប្រកាសនេះ លោក ម៉េត មាសភក្តី បានប្រាប់ភ្នំពេញប៉ុស្តិ៍ថា មូលនិធិត្រីចក្រយានកម្ពុជានេះ នឹងមានជារៀងរហូតសម្រាប់គាំទ្រដល់អ្នកប្រកបរបរធាក់ស៊ីក្លូនៅកម្ពុជា។
លោក អ៊ីម សម្បត្ដិ ប្រធានសមាគមអភិរក្សស៊ីក្លូ និងមុខរបរក្រៅប្រព័ន្ធ CCCA បាននិយាយថា មូលនិធិទាំងនេះ គឺជាចំណូលបន្ថែមសម្រាប់អ្នកប្រកបរបរធាក់ស៊ីក្លូ ក្នុងការជួយសម្រាលបន្ទុករបស់ពួកគាត់នៅក្នុងអំឡុងពេលដែលមិនសូវមានភ្ញៀវទេសចរ។ លោកបានបន្តថា បើទោះបីជាការទទួលបានមូលនិធិនេះមិនបានធ្វើឱ្យជីវភាពអ្នកធាក់ស៊ីក្លូក្លាយជាអ្នកមានបានក្តី ប៉ុន្តែមូលនិធិនេះបានជួយសម្រួលឱ្យអ្នកធាក់ស៊ីក្លូ មានប្រាក់ប្រចាំខែ ប្រៀបបានទៅនឹងប្រាក់ចូលនិវត្តន៍របស់ខ្លួន បើទោះជាពួកគាត់ បានធាក់ស៊ីក្លូ ឬមិនមានភ្ញៀវក៏ដោយ។
លោកបានរៀបរាប់ថា៖ «មកដល់ថ្ងៃនេះ ខ្ញុំសង្ឃឹមថា នឹងមានតទៅមុខទៀត ដើម្បីជួយសម្រាលជីវភាពអ្នកធាក់ស៊ីក្លូ មានន័យថា ថវិកាហ្នឹង ដូចជាប្រាក់ចូលនិវត្តន៍របស់គាត់អ៊ីចឹង ទោះបីគាត់ធាក់មិនធាក់ក៏គាត់ទទួលបានរៀងរាល់ ១០ ថ្ងៃ គាត់ទៅបើកម្តង ហើយបានពិនិត្យព្យាបាលជំងឺដោយឥតគិតថ្លៃទៀត»។
យ៉ាងណាលោក អ៊ីម សម្បត្ដិ អំពាវនាវឱ្យសាធារណជនចូលរួមគាំទ្រដល់អ្នកធាក់ស៊ីក្លូ បើទោះជាកំពុងទទួលបានការគាំទ្រក៏ដោយ ព្រោះការចូលរួមគាំទ្ររបស់សាធារណជន គឺជាការចូលរួមជួយអភិរក្សដល់ស៊ីក្លូឱ្យមានបន្តទៀត ហើយការចំណាយពេលជិះស៊ីក្លូលេងកម្សាន្ត ក៏បានផ្តល់ជាកម្លាំងចិត្តនិងថវិកាបន្តិចបន្តួចដល់ពួកគាត់ ស្របពេលរបរនេះ លែងជាមធ្យោបាយធ្វើដំណើរប្រចាំថ្ងៃរបស់ពលរដ្ឋទៅហើយ។
លោកបានរៀបរាប់បន្តថា៖ «យើងមានការគាំទ្រតែភ្ញៀវបរទេសទេ ហើយក្នុងរដូវកាលនេះ មិនសូវមានភ្ញៀវបរទេសចរទេ។ អ៊ីចឹងគាត់រកតាមដំណើររបស់គាត់ ហើយរំពឹងថវិកាពីមូលនិធិនេះ ដើម្បីទ្រទ្រង់ជីវភាព។ ទម្រាំដល់ខែ ៩ ទៅខែ ១០ ដែលមានភ្ញៀវទេសចរមកវិញ បានយើងរៀបចំជាក្រុមៗ ដើម្បីឱ្យពួកគាត់មានភ្ញៀវដឹក។ យើងក៏ចង់ឱ្យយុវជនយើងចូលរួមគាំទ្រជិះស៊ីក្លូដែរ»៕
.jpg)
