អគ្គនាយកដ្ឋាន ក.ប.ប.បានបន្តរៀបចំវគ្គបណ្តុះបណ្តាលជំនាញស៊ើបអង្កេត ដល់មន្ត្រីអនុវត្តច្បាប់ស្តីពីការប្រកួតប្រជែង និងច្បាប់ស្តីពីកិច្ចការពារអ្នកប្រើប្រាស់ នាថ្ងៃទី២៩ ខែឧសភា ឆ្នាំ២០២៣។ រូបថត ក.ប.ប
ភ្នំពេញៈអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.»បានឱ្យដឹងថា ក្នុងខែឧសភា មន្ត្រីបានដកហូតទំនិញ ដែលមិនមានអនុលោមភាពពីលើទីផ្សារជាង ២ ០០០ លីត្រ និងជិត២តោនពីលើទីផ្សារទូទាំងប្រទេស។
របាយការណ៍ប្រចាំខែឧសភា របស់អគ្គនាយកដ្ឋានក.ប.ប ដែលភ្នំពេញប៉ុស្តិ៍ ទទួលបានកាលពីថ្ងៃទី៣០ ឧសភា បានបង្ហាញថា ក្នុងខែឧសភា នេះ មន្ត្រីអគ្គនាយកដ្ឋាន ក.ប.ប. បានអនុវត្តតួនាទី និងភារកិច្ចរបស់ខ្លួន ដោយបានចុះត្រួតពិនិត្យទីផ្សារនៅទូទាំងប្រទេសបានចំនួន ៥២ ទីតាំង។ ក្នុងនោះបានដកហូតទំនិញដែលមិនមានអនុលោមភាព ដូចជាទំនិញក្លែងក្លាយ ខូចគុណភាព ផុតកាលបរិច្ឆេទប្រើប្រាស់ មានសារធាតុគីមី និងសំណល់ថ្នាំកសិកម្មជាដើមបានចំនួន ២ ១៦០,១០ លីត្រ និង ១ តោន ៨៧៥ គីឡូក្រាម។
ចំពោះការចុះត្រួតពិនិត្យឃ្លាំងស្តុក សិប្បកម្មផលិត និងហាងលក់ទំនិញចំនួន ២០ ទីតាំង គឺបានរកឃើញ និងឃាត់ទុកបណ្ដោះអាសន្ ននូវទំនិញរំលោភសិទ្ធិផ្ដាច់មុខ ឬកម្មសិទ្ធិបញ្ញា និងមិនអនុលោមលើបទដ្ឋានព័ត៌មានមួយចំនួន ដើម្បីឱ្យម្ចាស់ចូលខ្លួនមកដោះស្រាយ និងធ្វើការពិន័យអន្តរការណ៍តាមនីតិវិធី។ នេះបើយោងតាមរបាយការណ៍ដដែលនេះ។
របាយការណ៍បានបញ្ជាក់បន្តថា៖«ការចុះត្រួតពិនិត្យបរិមាណ និងគុណភាពប្រេងឥន្ធនៈក្នុងក្របខ័ណ្ឌទូទាំងប្រទេសបានចំនួន ១០៤ ស្ថានីយ/ដេប៉ូ ក្នុងនោះរកឃើញស្ថានីយ/ដេប៉ូចំនួន ២៤ មិនមានអនុលោមភាពផ្នែកគុណភាព និងបរិមាណ និងបានធ្វើការពិន័យអន្តរការណ៍តាមនីតិវិធីផងដែរ។ ក្នុងខែឧសភានេះ ក៏បានទទួលពាក្យបណ្ដឹងពីអ្នកប្រើប្រាស់បានចំនួន៦ពាក្យបណ្ដឹង ដោយពាក្យបណ្តឹងចំនួន២ ត្រូវបានបិទបញ្ចប់ ១ ពាក្យបណ្តឹងបានបញ្ជូនទៅតុលាការ និង ១ ពាក្យបណ្តឹងតម្កល់ទុកមិនចាត់ការ»។
របាយការណ៍នេះត្រូវបានចេញផ្សាយក្រោយ ក្រោយពីអគ្គនាយកដ្ឋាន ក.ប.ប បានបើកកិច្ចប្រជុំបូកសរុបសកម្មភាពការងារប្រចាំខែឧសភា ឆ្នាំ២០២៣ និងទិសដៅអនុវត្តបន្ត កាលពីថ្ងៃទី២៩ ខែឧសភា ឆ្នាំ២០២៣ ដោយមានការចូលរួមពីមន្ត្រីមកពីនាយកដ្ឋាន និងសាខា ក.ប.ប ទូទាំងរាជធានី ខេត្ត។
លោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប បានប្រាប់ភ្នំពេញប៉ុស្តិ៍ថា ក្រុមការងារ បានពិនិត្យទៅលើវឌ្ឍនភាពការងារមួយចំនួន និងបានពិនិត្យទៅសេចក្តីព្រាងច្បាប់ និងលិខិតបទដ្ឋានក្រោមច្បាប់មួយចំនួនផងដែរ។
លោកបានបន្តថា សេចក្តីព្រាងច្បាប់ និងលិខិតបទដ្ឋានក្រោមច្បាប់ទាំងនោះ គឺមានដូចជា សេចក្ដីព្រាងច្បាប់ស្ដីពីការទទួលខុសត្រូវលើផលិតផល (Product Liability) សេចក្ដីព្រាងអនុក្រឹត្យស្ដីពីការកែសម្រួលអនុក្រឹត្យលេខ ៤៧ អនក្រ.បក ចុះថ្ងៃទី១២ ខែមិថុនា ឆ្នាំ២០២៣ ស្ដីពីអនាម័យនៃម្ហូបអាហារ សម្រាប់មនុស្ស និងការរៀបចំសេចក្ដីព្រាងប្រកាសចំនួនស្ថិតក្រោមច្បាប់ស្ដីពីការប្រកួតប្រជែង និងច្បាប់ស្ដីពីកិច្ចការពារអ្នកប្រើប្រាស់។
លោកបានបញ្ជាក់ថា៖«ចំពោះសេចក្ដីព្រាងច្បាប់ស្ដីពីការទទួលខុសត្រូវលើផលិតផល គឺក្រុមការងារបានតាក់តែងចប់ហើយ និងកំពុងបកប្រែជាភាសាខ្មែរ ដែលក្រុមការងារអាចនឹងបញ្ចប់ទាំង២ភាសា នៅចុងខែ៦ ។ ចំណែកសេចក្ដីព្រាងអនុក្រឹត្យស្ដីពីការកែសម្រួលអនុក្រឹត្យលេខ៤៧ ក៏នឹងបញ្ចប់ប្រហែលគ្នាដែរ។ ដូច្នេះខែ៦ យើងនឹងដាក់សុំបន្តនីតិវិធីតាមយន្តការបន្តទៀត»។
ជាមួយគ្នានេះ លោក ផាន អូន ក៏បានឱ្យដឹងផងដែរថា សេចក្ដីព្រាងប្រកាសចំនួន ២ ស្ថិតក្រោមច្បាប់ស្ដីពីការប្រកួតប្រជែង និងច្បាប់ស្ដីពីកិច្ចការពារអ្នកប្រើប្រាស់ ដែលក្រុមការងារបច្ចេកទេសរបស់អគ្គនាយកដ្ឋាន ក.ប.ប បានរៀបរៀង ក៏បានបញ្ជូនទៅគណៈកម្មការប្រកួតប្រជែង ដើម្បីពិនិត្យ និងផ្តល់ធាតុចូលបន្ថែម មុននឹងរដ្ឋមន្ត្រីក្រសួងពាណិជ្ជកម្ម ប្រកាសឱ្យប្រើក្នុងពេលឆាប់ៗផងដែរ៕
.jpg)
