ឆ្កែកំពុងត្រូវបានទទួលការវ៉ាក់សាំងជំងឺឆ្កែឆ្កួតដោយឥតគិតថ្លៃ។ រូបថត Mission Rabies
ភ្នំពេញៈ រយៈពេល ១ សប្តាហ៍ សត្វសុនខជាង ៣៦ ០០០ ក្បាល បានទទួលការវ៉ាក់សាំងជំងឺឆ្កែឆ្កួតដោយឥតគិតថ្លៃនៅទូទាំងរាជធានីភ្នំពេញ ខណៈអង្គការ Mission Rabies រំពឹងថា នៅពេលសត្វឆ្កែនៅទីក្រុងភ្នំពេញ ទទួលបានការចាក់វ៉ាក់សាំងដល់ ៧០ ភាគរយហើយ នឹងអាចការពារជីវិតរាប់មិនអស់ទាំងមនុស្ស និងសត្វឆ្កែ។
កាលពីថ្ងៃទី ២០ ខែឧសភា ឆ្នាំ២០២៣ អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយនឹងអង្គការ Mission Rabies និងអង្គការ Animal Rescue Cambodia ក៏ដូចជាដៃគូក្នុងស្រុកផ្សេងទៀត បានប្រកាសបើកយុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃនៅរាជធានីភ្នំពេញចាប់ពីថ្ងៃទី២២ ខែឧសភា ដល់ថ្ងៃទី២ ខែមិថុនា ឆ្នាំ២០២៣។
អង្គការ Mission Rabies បានប្រកាសនៅលើហ្វេសប៊ុកថា៖«សប្តាហ៍ទី១(ពីថ្ងៃទី២២ ដល់ថ្ងៃ២៨ឧសភា) នៃគម្រោងរបស់ពួកយើងត្រូវបានបញ្ចប់ហើយ សត្វសុនខជាង៣៦ ០០០ក្បាល នៅក្នុងរាជធានីភ្នំពេញបានទទួលវ៉ាក់សាំងជំងឺឆ្កែឆ្កួត។ ការចាក់វ៉ាក់សាំងទ្រង់ទ្រាយធំរបស់យើងនៅក្នុងរាជធានីភ្នំពេញ កំពុងដំណើរការបន្ទាប់ពីពិធីសម្ពោធជាផ្លូវការបានធ្វើឡើងនៅវិទ្យាស្ថានជាតិកសិកម្មព្រែកលៀប»។
បន្ថែមពីនេះអង្គការ Mission Rabies បានលើកឡើងថា ក្រុមការងារអង្គការនេះ ក៏នឹងធ្វើដំណើរពីផ្ទះ១ទៅផ្ទះ១ ដើម្បីលើកទឹកចិត្តពលរដ្ឋឱ្យនាំយកសត្វឆ្កែរបស់ពួកគេទៅចាក់វ៉ាក់សាំងតាមដែលអាចធ្វើទៅបាន ហើយអង្គការនេះរំពឹងថា តាមរយៈការចាក់វ៉ាក់សាំងឱ្យបាន៧០ភាគរយ នៃចំនួនសត្វឆ្កែនៅទីក្រុងភ្នំពេញ នឹងអាចការពារជីវិតរាប់មិនអស់ទាំងមនុស្ស និងសត្វឆ្កែ។
អង្គការនេះបញ្ជាក់ថា៖«ការចាក់វ៉ាក់សាំងការពារជំងឺឆ្កែឆ្កួតគឺជាវិធីសាស្ត្រដែលចំណាយថវិកាតិច និងមានប្រសិទ្ធភាពបំផុតក្នុងការការពារការស្លាប់របស់មនុស្សដោយសារជំងឺឆ្កែឆ្កួត។ ៨៥ ភាគរយ នៃសត្វឆ្កែ នៅក្នុងប្រទេសកម្ពុជា គឺមានម្ចាស់ ដូច្នេះការអប់រំទៅដល់អ្នកចិញ្ចឹមសត្វឆ្កែ គឺមានសារៈសំខាន់ណាស់ដើម្បីការបង្ការជំងឺឆ្កែឆ្កួតដោយជោគជ័យ»។
តាមការអះអាងរបស់អង្គការ Mission Rabies ការអប់រំស្តីពីជំងឺឆ្កែឆ្កួត ការព្យាបាលរបួសនៅពេលសត្វឆ្កែខាំ និងការការពារកុំឱ្យសត្វឆ្កែខាំ ដែលផ្តល់ទៅឱ្យសហគមន៍នីមួយៗគឺជាមធ្យោបាយមួយដែលពួកគេត្រូវការដើម្បីការពារខ្លួនពីមេរោគដែលបណ្តាលមកពីសត្វឆ្កែដ៏សាហាវនេះ។
គម្រោងយុទ្ធនាការចាក់វ៉ាក់សាំងបង្ការជំងឺឆ្កែឆ្កួតដោយឥតគិតថ្លៃ ត្រូវបានចាប់ផ្ដើមតាមខណ្ឌផ្សេងៗគ្នាទៅតាមកាលបរិច្ឆេទដែលបានកំណត់ ក្នុងនោះសម្រាប់ខណ្ឌជ្រោយចង្វារពីថ្ងៃទី២២-២៦ ខែឧសភា, ខណ្ឌព្រែកព្នៅពីថ្ងៃទី២២-២៤ ខែឧសភា, ខណ្ឌកំបូលពីថ្ងៃទី២២-២៣ ខែឧសភា, ខណ្ឌដង្កោពីថ្ងៃទី២២-២៦ ខែឧសភា, ខណ្ឌពោធិ៍សែនជ័យ ពីថ្ងៃទី២៣-២៦ ខែឧសភា, ខណ្ឌសែនសុខ ពីថ្ងៃទី២៤ឧសភា-២ខែមិថុនា, ខណ្ឌឫស្សីកែវ ពីថ្ងៃទី២៥-៣១ ខែឧសភា, ខណ្ឌច្បារអំពៅ ពីថ្ងៃទី២៩ឧសភា-២ខែមិថុនា, ខណ្ឌទួលគោក ពីថ្ងៃទី៣១ ខែឧសភា-ថ្ងៃទី២ ខែមិថុនា, ខណ្ឌចំការមន ពីថ្ងៃទី៣១ ខែឧសភា-ថ្ងៃទី២ ខែមិថុនា, ខណ្ឌបឹងកេងកង ពីថ្ងៃទី៣១ ខែឧសភា-ថ្ងៃទី២ ខែមិថុនា, ខណ្ឌដូនពេញពីថ្ងៃទី៣១ ខែឧសភា-ថ្ងៃទី២ ខែមិថុនា និងខណ្ឌ៧មករា ពីថ្ងៃទី៣១ ខែឧសភា-ថ្ងៃទី២ខែមិថុនា ឆ្នាំ២០២៣។
លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិត្យសភាកម្ពុជា ធ្លាប់បានពន្យល់ថា ជំងឺឆ្កែឆ្កួតជាជំងឺឆ្លង ហើយអាចធ្វើឱ្យមនុស្សឈឺ និងស្លាប់បាន ដោយសារវាជាជំងឺប្រភេទវីរុស ដែលរស់ក្នុងទឹកមាត់សត្វសុនខ ក៏ដូចជា ប្រភេទសត្វចិញ្ចឹមដទៃទៀតដូចជា សត្វឆ្មា និងកណ្ដុរ ជាដើម។
លោក បញ្ជាក់ថា៖ «អ៊ីចឹង! កាលដែលចាក់រ៉ាក់សាំងបង្ការជំងឺឆ្កែឆ្កួតសម្រាប់សត្វឆ្កែ ជាការល្អបំផុតព្រោះសម្រាប់ការពារសត្វចិញ្ចឹមរបស់យើងកុំឱ្យមានជំងឺឆ្កែឆ្កួត ហើយក៏ការពារមនុស្សកុំឱ្យមានការឆ្លងជំងឺឆ្កែឆ្កួតផងដែរ»។ នៅពេលដឹងខ្លួនឬមាននរណាម្នាក់ត្រូវបានឆ្កែឆ្កួត ឬឆ្កែមិនឆ្កួតខាំ គឺត្រូវតែប្រញាប់ទៅមន្ទីរពេទ្យ ដើម្បីឱ្យពេទ្យឯកទេស ចាក់វ៉ាក់សាំងជូនសម្រាប់បង្ការកុំឱ្យមានជំងឺឆ្កែឆ្កួតនេះ»។
បើតាមអង្គការ Mission Rabies ប្រទេសកម្ពុជា ជាប្រទេស១ដែលគេប៉ាន់ស្មានថាមានអ្នកស្លាប់ដោយជំងឺឆ្កែឆ្កួតខាំខ្ពស់ជាងប្រទេសផ្សេងៗទៀតនៅលើពិភពលោក ហើយការស្លាប់របស់មនុស្ស មានរហូតដល់៩៩ភាគរយដោយសារជំងឺឆ្កែឆ្កួតដែលបង្កឡើងពីសត្វសុនខដែលមានជំងឺឆ្កែឆ្កួតខាំ។អង្គការដដែលនេះក៏បានអះអាងទៀតថា ជារៀងរាល់ឆ្នាំ កម្ពុជាត្រូវបានគេប៉ាន់ស្មានថា មានមនុស្សប្រមាណ៦០ម៉ឺននាក់ត្រូវបានសត្វសុនខខាំប៉ុន្តែពួកគេពុំបានទៅទទួលការព្យាបាលឬវ៉ាក់សាំងក្រោយសត្វខាំគ្រប់ៗគ្នានោះទេ៕
.jpg)
