លោកផាន អូនប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានក.ប.ប.និងលោកFrank Jattkeប្រធានក្រុមអាស៊ានកម្ពុជា(GIZ)ចុះហត្ថលេខារួមគ្នាលើ«កំណត់ហេតុនៃការព្រមព្រៀងគ្នាលើការអនុវត្តគម្រោងCOMPETE II»នាថ្ងៃទី៣១ខែឧសភា។ រូបថត៖ ក.ប.ប
ភ្នំពេញៈ អគ្គនាយកដ្ឋាន ក.ប.ប និងទីភ្នាក់ងារ GIZ បានចុះហត្ថលេខារួមគ្នាលើកំណត់ហេតុនៃការព្រមព្រៀងគ្នាលើការអនុវត្តគម្រោង COMPETE II ដើម្បីបន្តការជួយជ្រោមជ្រែងដល់ការអភិវឌ្ឍគោលនយោបាយ និងច្បាប់ស្តីពីការប្រកួតប្រជែងនៅប្រទេសកម្ពុជា។
ពិធីចុះហត្ថលេខារួមគ្នាលើ «កំណត់ហេតុនៃការព្រមព្រៀងគ្នាលើការអនុវត្តគម្រោងCOMPETE II»នេះត្រូវបានធ្វើឡើងនៅថ្ងៃទី៣១ខែឧសភាឆ្នាំ២០២៣រវាងលោកផាន អូនប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានក.ប.ប.ជាមួយលោក Frank Jattkeប្រធានក្រុមអាស៊ានកម្ពុជា(GIZ)នៅទីស្នាក់ការអគ្គនាយកដ្ឋានក.ប.ប។
លោកផាន អូនបានប្រាប់ភ្នំពេញប៉ុស្តិ៍ក្រោយបញ្ចប់ពិធីចុះហត្ថលេខាថា «កំណត់ហេតុនៃការព្រមព្រៀងគ្នាលើការអនុវត្តគម្រោងCOMPETE II» គឺជាការព្រមព្រៀងគ្នាដើម្បីរួមចំណែកផ្តល់នូវអត្ថប្រយោជន៍បន្ថែមទៀតដល់អគ្គនាយកដ្ឋានក.ប.ប.ក្នុងការអនុវត្តច្បាប់ស្តីពីការប្រកួតប្រជែង។
លោកបានឱ្យដឹងបន្តថាបច្ចុប្បន្នគម្រោង COMPETE បានឈានដល់ការអនុវត្តដំណាក់កាលទី២ដែលមានរយៈពេល៣ឆ្នាំបន្តដោយចាប់ផ្តើមចាប់ពីចុងខែវិច្ឆិកាឆ្នាំ២០២២រហូតដល់ចុងខែតុលាឆ្នាំ២០២៥។
លោកបានបញ្ជាក់ថា៖«ព្រឹតិ្តការណ៍នាថ្ងៃនេះជាវេទិកាដ៏សំខាន់ដែលអគ្គនាយកដ្ឋានក.ប.បនិងទីភ្នាក់ងារGIZចុះហត្ថលេខារួមគ្នាលើកំណត់ហេតុនៃការព្រមព្រៀងគ្នាលើការអនុវត្តគម្រោងCOMPETE II ដែលឆ្លុះបញ្ចាំងពីកិច្ចបន្តខិតខំប្រឹងប្រែងរួមគ្នាដើម្បីសម្រេចបាននូវសមិទ្ធផលដ៏ច្រើនបន្ថែមទៀតក្រោមគម្រោងCOMPETE II ដើម្បីជួយជ្រោមជ្រែងដល់ការអភិវឌ្ឍគោលនយោបាយនិងច្បាប់ស្តីពីការប្រកួតប្រជែងនៅប្រទេសកម្ពុជា»។
គម្រោងលើកកម្ពស់ភាពប្រកួតប្រជែងក្នុងក្របខ័ណ្ឌនៃគំនិតផ្តួចផ្តើមសម្រាប់សមាហរណកម្មអាស៊ាន(COMPETE)ត្រូវបានរៀបចំឡើងដោយក្រសួងសហប្រតិបត្តិការសេដ្ឋកិច្ចនិងអភិវឌ្ឍន៍អាល្លឺម៉ង់(BMZ)ដើម្បីគាំទ្រដល់គំនិតផ្តួចផ្តើមលើវិស័យពាណិជ្ជកម្មសេវាកម្មនិងគោលនយោបាយប្រកួតប្រជែងទាំងនៅថ្នាក់តំបន់និងថ្នាក់ជាតិ។
លោកផាន អូនបានលើកឡើងថា គម្រោងទី២នេះនឹងផ្តល់អត្ថប្រយោជន៍ដល់ការអនុវត្តច្បាប់របស់មន្ត្រីនៃអគ្គនាយកដ្ឋានក.ប.ប. ដូចជាការរៀបចំសិក្ខាសាលាផ្សព្វផ្សាយច្បាប់និងបទប្បញ្ញត្តិពាក់ព័ន្ធដល់ធុរជននិងសាធារណជនការពង្រឹងសមត្ថភាពមន្ត្រីស៊ើបអង្កេតក.ប.បការកសាងបទប្បញ្ញត្តិនិងលិខិតបទដ្ឋានគតិយុត្តក្រោមច្បាប់ស្តីពីការប្រកួតប្រជែងនិងមានកម្មវិធីបណ្តុះបណ្តាលសម្រាប់អ្នកបណ្តុះបណ្តាលបន្តព្រមទាំងមានការគាំទ្រផ្តល់ជំនួយក្នុងការចូលរួមកិច្ចប្រជុំសិក្ខាសាលានិងវគ្គបណ្តុះបណ្តាលនានានៅក្នុងតំបន់ និងអន្តរជាតិផងដែរពីGIZ។
លោកបានបញ្ជាក់ថា៖«ការព្រមព្រៀងនេះនឹងរួមចំណែកផ្តល់អត្ថប្រយោជន៍បន្ថែមទៀតដល់អគ្គនាយកដ្ឋានក.ប.បក្នុងការអនុវត្តច្បាប់ស្តីពីការប្រកួតប្រជែងដែលរួមមាន ជំនួយលើការតាក់តែងបទប្បញ្ញត្តិក្រោមច្បាប់ស្តីពីការប្រកួតប្រជែង ការពង្រឹងសមត្ថភាពមន្ត្រីស៊ើបអង្កេតនិងកម្មវិធីបណ្តុះបណ្តាលសម្រាប់អ្នកបណ្តុះបណ្តាលបន្ត (TOT) ក៏ដូចជាការគាំទ្រដល់ការបណ្តុះបណ្តាលនៅបរទេសផងដែរ»។
ជាមួយនឹងការចុះហត្ថលេខានេះ លោកផាន អូនក៏បានទទួលសៀវភៅមគ្គុទេសក៍អំពី«សុវត្ថិភាពម្ហូបអាហារសម្រាប់អ្នកប្រើប្រាស់»ចំនួន២០០ក្បាល ដែលផ្តល់ឱ្យដោយទីភ្នាក់ងារGIZជូនមកអគ្គនាយកដ្ឋានក.ប.ប.ផងដែរ ស្របពេលគម្រោងនេះបានបន្តផ្តល់វគ្គបណ្តុះបណ្តាលរយៈពេល២ថ្ងៃគឺថ្ងៃទី៣០ និង៣១ខែឧសភា ឆ្នាំ២០២៣ដល់មន្ត្រីប្រមាណ១៥០នាក់ ជុំវិញការអនុវត្តច្បាប់ស្តីពីការប្រកួតប្រជែងច្បាប់ស្តីពីកិច្ចការពារអ្នកប្រើប្រាស់ ពាក់ព័ន្ធនឹងការធ្វើពាណិជ្ជកម្មតាមប្រព័ន្ធអេឡិចត្រូនិក៕
.jpg)
