សកម្មភាពរៀបចំដឹកសំរាមនៅឃុំចុងឃ្នៀសកាលពីពេលកន្លងមក ។ រូបថត អង្គការ River-Ocean-Cleanup
សៀមរាបៈ អង្គការសម្អាតទន្លេសមុទ្របានអះអាងថា ត្រឹមរយៈពេល ៣ ខែ សំណល់ប្លាស្ទិកចំនួន ៣០ តោន ត្រូវបានក្រុមការងារសហការជាមួយអាជ្ញាធរមូលដ្ឋានប្រមូលចេញពីច្រាំង និងផ្ទះបណ្តែតទឹកក្នុងតំបន់បឹងទន្លេសាប ស្ថិតក្នុងសង្កាត់ចុងឃ្នៀស ខេត្តសៀមរាប ដើម្បីយកទៅកែច្នៃប្រើប្រាស់ឡើងវិញ។
លោក នូ សុវណ្ណ នាយកប្រតិបត្តិអង្គការសម្អាតទន្លេសមុទ្របានប្រាប់ភ្នំពេញប៉ុស្តិ៍នៅថ្ងៃទី១ មិថុនាថា បន្ទាប់ពីពង្រីកបេសកកម្មរបស់ខ្លួនទៅដល់តំបន់បឹងទន្លេសាប ក្រុមការងារបានប្រមូលសំរាមចេញពីតំបន់បឹងទន្លេសាបជាបន្តបន្ទាប់ ដោយគិតចាប់ពីខែមីនា មកទល់ខែឧសភា គឺមានចំនួន៣០តោន។
លោកបានឱ្យដឹងបន្តថា សំរាមទាំងនេះ គឺត្រូវបានអ្នកស្ម័គ្រចិត្ត ប្រជាសហគមន៍ និងអាជ្ញាធរមួលដ្ឋាន រួមគ្នាប្រមូលចេញពីច្រាំង និងផ្ទះបណ្តែតទឹក រួមទាំងសំរាមដែលបណ្តែតនៅក្នុងទឹកផងដែរ។
លោកបានបញ្ជាក់ថា៖«មកទល់ពេលនេះ យើងចាប់ផ្តើមប្រមូលសំរាមបាន៣០តោន តាំងពីខែមីនា ដល់ខែឧសភា ដែលមានរយៈពេល៣ខែ នៅក្នុងសង្កាត់ចុងឃ្នៀស ដែលជាតំបន់ទេសចរណ៍ អាចទៅកម្សាន្តបាន តាមរយៈការមើលថ្ងៃលិច ទស្សនាផ្ទះបណ្តែតទឹក និងប្រជាសហគមន៍ប្រកបរបរនេសាទ»។
បន្ថែមពីនេះ លោកបានអះអាងថា ដោយសារតែតំបន់ចុងឃ្នៀស ជាតំបន់ទេសចរណ៍ដែលមានសកម្មភាពជាច្រើន ជាពិសេសក៏ជាកន្លែងដែលប្រជាសហគមន៍ប្រកបរបរនេសាទផងនោះបានធ្វើឱ្យបញ្ហាសំរាម ជាពិសេសថង់ប្លាស្ទិកត្រូវបានបោះចោលនៅតាមមាត់ទន្លេ និងស្ទឹងនាំឱ្យហូរចូលទន្លេជាច្រើនរៀងរាល់ថ្ងៃ។
លោកបានថ្លែងថា៖«ដោយសារមើលឃើញពីបញ្ហាដែលបង្កដល់ជីវចម្រុះទន្លេសាបយ៉ាងខ្លាំង ទើបយើងបានសហការជាមួយសាលាសង្កាត់ចុងឃ្នៀស និងយុវជន ដោយបានផ្តល់ជាកញ្ចប់ថវិកាគាំទ្រផ្នែកបច្ចេកទេស ដោយធ្វើយ៉ាងណាឱ្យមានការប្រមូលសំរាមទាំងនោះចេញយកមកប្រើប្រាស់ឡើងវិញនិងបំប្លែងទៅជាថាមពល»។
ជាមួយនេះដែរ លោកនូ សុវណ្ណ អំពាវនាវដល់ប្រជាពលរដ្ឋឱ្យចូលរួមបន្ថែមទៀត និងងាកមកទុកដាក់សំរាម ឱ្យបានត្រឹមត្រូវហើយចូលរួមថែរក្សាអនាម័យបរិស្ថានសម្រាប់មនុស្សជំនាន់ក្រោយ និងការរស់នៅប្រកបដោយផាសុកភាព។
លោកម៉ៃ មាន ជាយុវជនទទួលបន្ទុកផ្នែកអនាម័យក្នុងតំបន់ចុងឃ្នៀសបាននិយាយនៅថ្ងៃទី១ មិថុនាថា សំរាមទាំង៣០តោននេះគឺត្រូវបានប្រមូលចេញពីក្នុងទឹកដើម្បីយកទៅទុកនៅកន្លែងរក្សាសំរាមនៃមជ្ឈ
មណ្ឌលបែងចែក និងកែច្នៃសំរាមរបស់សហគមន៍ចុងឃ្នៀស មុននឹងដឹកបន្តយកទៅកែច្នៃ។
លោកបានបន្តថា បន្ទាប់ពីសំរាមទាំងនោះត្រូវបានដឹកចេញពីសហគមន៍រួច ក្រុមការងារស្ម័គ្រចិត្តរបស់អង្គការដៃគូ និងអាជ្ញាធរមូលដ្ឋាន រួមគ្នាបន្តសកម្មភាពក្នុងការប្រមូលសំរាមជាបន្តទៀត ហើយសកម្មភាពទាំងនេះ គឺត្រូវបានធ្វើឡើងជារៀងរាល់ថ្ងៃ ដើម្បីធានាថា តំបន់ទេសចរណ៍ចុងឃ្នៀស គ្មានសំរាមប្លាស្ទិក។
លោកបានបញ្ជាក់ថា៖«យើងប្រមូលពីក្នុងទឹក ហើយយកទៅដាក់ទីលាន ដើម្បីហាលឱ្យស្ងួតមុនច្រកចូលការុងរក្សាទុកក្នុងឃ្លាំង។ បន្ទាប់មក គឺយើងមិនកំណត់ថា យើងស្តុកពេញ១ឃ្លាំងៗទើបយកចេញទេ គឺខាងអង្គការសម្អាតទន្លេសមុទ្រ នឹងជួយដឹកជញ្ជូនចេញពីឃ្លាំងម្តង១ឡានៗ (១ឡានប្រមាណ១០តោន)។ គាត់នឹងយកសំរាមទាំងនោះចេញពីតំបន់យើងដើម្បីយកទៅកែច្នៃបន្ត»។
បើតាមលោក ម៉ៃ មាន ដោយសារតែមានសកម្មភាពទាំងនេះហើយ ទើបមកទល់បច្ចុប្បន្ន សំរាមមិនត្រូវបានកកស្ទះ ហើយបើប្រៀបធៀបនឹងប៉ុន្មានឆ្នាំមុនគឺហាក់មានការថយចុះ ព្រោះតែសំរាមដែលប្រមូលបាន គឺត្រូវបានដឹកចេញពីតំបន់សហគមន៍ជាបន្តបន្ទាប់។
លោកបានបញ្ជាក់ថា៖«ឥឡូវសំរាមមានការថយចុះ និងមានលក្ខណៈធូរស្រាលជាងមុន ព្រោះតែសំរាមដែលយើងប្រមូលបានពីក្នុងទឹកពីតាមផ្ទះ និងតាមច្រាំងនានា មិនមានការកកស្ទះដោយសារមានមធ្យោបាយក្នុងការដឹកចេញទេ។ ក្រុមការងារយើង នៅតែប្តេជ្ញាចិត្តក្នុងការធ្វើសកម្មភាពសម្អាតទន្លេបន្តទៀត បើទោះជាមិនទាន់បានជាលទ្ធផលល្អយ៉ាងណា ក៏បានកាត់បន្ថយច្រើនជាងមុន»៕
.jpg)
