អង្គការ Mission Rabies ចាក់វ៉ាក់សាំងបង្ការជំងឺឆ្កែឆ្កួតនៅរាជធានីភ្នំពេញ នាពេលថ្មីៗនេះ។ រូបថត Mission Rabies
កណ្តាលៈ អង្គការ Mission Rabies ប្រកាសពង្រីកយុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃ ទៅកាន់ស្រុក និងក្រុងចំនួន ៦ នៅក្នុងខេត្តកណ្តាល រយៈពេល ២ ថ្ងៃ ស្របពេលយុទ្ធនាការជាង ១០ ថ្ងៃ នៅរាជធានីភ្នំពេញ ជិតបិទបញ្ចប់ដោយក្នុងនោះ សត្វសុនខរាប់ម៉ឺនក្បាលទទួលបានការវ៉ាក់សាំងការពារជំងឺឆ្កែឆ្កួត។
អង្គការ Mission Rabies បានឱ្យដឹងនៅថ្ងៃទី ១ មិថុនាថា នៅសល់តែ ១ ថ្ងៃទៀតតែប៉ុណ្ណោះ យុទ្ធនាការចាក់ថ្នាំការពារជំងឺឆ្កែឆ្កួតសម្រាប់សត្វសុនខនៅរាជធានីភ្នំពេញនឹងត្រូវបិទបញ្ចប់ ហើយបច្ចុប្បន្ននេះ ក្រុមការងារ កំពុងតែបន្តកិច្ចខិតខំប្រឹងប្រែងរបស់ខ្លួន ដើម្បីបន្តចាក់វ៉ាក់សាំងទៅកាន់ស្រុក និងក្រុងចំនួន ៦ ទៀតនៅខេត្តកណ្តាល។
តាមការប្រកាស ក្រុមចាក់វ៉ាក់សាំងរបស់អង្គការ Mission Rabies និងអង្គការនានា នឹងចុះទៅកាន់តំបន់មួយចំនួនក្នុងក្រុងតាខ្មៅ ស្រុកកណ្តាលស្ទឹង ស្រុកមុខកំពូល ស្រុកស្អាង និងស្រុកកៀនស្វាយ ដើម្បីផ្តល់វ៉ាក់សាំងដល់សត្វសុនខដោយឥតគិតថ្លៃ។
អង្គការនេះបញ្ជាក់ថា៖ «ពួកយើងពិតជាមានសេចក្តីរំភើបរីករាយជាខ្លាំង ក្នុងការពង្រីកបេសកកម្មរបស់ពួកយើង និងបន្តការប្តេជ្ញាចិត្តរបស់ពួកយើង ដើម្បីការពារសត្វសុនខប្រឆាំងទៅនឹងជំងឺឆ្កែឆ្កួត ឱ្យបានច្រើនតាមដែលអាចធ្វើទៅបាន។ ដោយមានការសហការគ្នាជាមួយនឹងដៃគូរបស់ពួកយើង ពួកយើងកំពុងតែធ្វើការដោយមិនឈប់ឈរ ដើម្បីបង្កើតបានបរិយាកាសមួយ ដែលមានសុវត្ថិភាពសម្រាប់សត្វចិញ្ចឹមរបស់ពួកយើង និងសហគមន៍រស់នៅតាមមូលដ្ឋាន»។
បន្ថែមពីនេះអង្គការ Mission Rabies អំពាវនាវថា៖ «សូមកុំឱ្យឱកាសនេះកន្លងផុតទៅណា៎ ដើម្បីឱ្យសត្វចិញ្ចឹមជាទីស្រឡាញ់របស់អ្នកទទួលបានវ៉ាក់សាំងការពារ ក៏ដូចជារួមចំណែកក្នុងការចូលរួមលុបបំបាត់ជំងឺឆ្កែឆ្កួតផងដែរ។ សូមចងចាំថា សត្វសុនខ ១ ក្បាលៗដែលទទួលបានវ៉ាក់សាំង គឺរួមចំណែកក្នុងការបានជាភាពស៊ាំក្នុងហ្វូងសត្វសុនខ (herd immunity) ប្រឆាំងទៅនឹងជំងឺឆ្កែឆ្កួត ដើម្បីការពារគ្រួសារ និងសហគមន៍របស់អ្នកទាំងអស់គ្នា»។
លោក Kei Tazawa មន្ត្រីគម្រោងអន្តរជាតិនៃអង្គការ Mission Rabies បានប្រាប់ភ្នំពេញប៉ុស្តិ៍នៅថ្ងៃទី ១ មិថុនាថា យុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃ ត្រូវបានពង្រីកខ្លួនទៅកាន់ខេត្តកណ្តាលនេះ គឺធ្វើឡើងនៅថ្ងៃទី ១ និងថ្ងៃទី ២ ខែមិថុនា ស្របគ្នាជាមួយនឹងយុទ្ធនាការនៅក្នុងខណ្ឌមួយចំនួនក្នុងរាជធានីភ្នំពេញ កំពុងបន្តដំណើរការ។
លោកបានបញ្ជាក់ថា៖ «យើងមិនទាន់មានរបាយការណ៍នៃការផ្តល់វ៉ាក់សាំងដោយឥតគិតថ្លៃសរុបនៅឡើយទេ។ ប៉ុន្តែនឹងផ្តល់ឱ្យអ្នកនូវចំនួនសរុបចុងក្រោយនៅពេលយុទ្ធនាការទាំងក្នុងរាជធានីភ្នំពេញ និងខេត្តកណ្តាល បានបញ្ចប់ជាស្ថាពរនៅសប្តាហ៍បន្ទាប់»។
កាលពីថ្ងៃទី ២០ ខែឧសភា ឆ្នាំ ២០២៣ អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយនឹងអង្គការ Mission Rabies និងអង្គការ Animal Rescue Cambodia ក៏ដូចជាដៃគូក្នុងស្រុកផ្សេងទៀត បានប្រកាសបើកយុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃនៅរាជធានីភ្នំពេញចាប់ពីថ្ងៃទី ២២ ខែឧសភា ដល់ថ្ងៃទី ២ ខែមិថុនា។
អង្គការសង្គ្រោះសត្វកម្ពុជា បានឱ្យដឹងថា វ៉ាក់សាំងការពារជំងឺឆ្កែឆ្កួតចំនួន ៣៦ ៧១៩ ដូស ត្រូវបានផ្តល់ឱ្យសត្វសុនខក្នុងរយៈពេលត្រឹមតែ ៥ ថ្ងៃដំបូងតែប៉ុណ្ណោះ ខណៈអង្គការនេះ ឱ្យដឹងថា ចំនួននេះ នឹងបន្តបង្កើនឡើងបន្ទាប់ពីយុទ្ធនាការជាង ១០ ថ្ងៃ ត្រូវបានបញ្ចប់ក្នុងពេលខាងមុខ។
ទន្ទឹមនឹងយុទ្ធនាការនេះ អង្គការសង្គ្រោះសត្វកម្ពុជា បានឱ្យដឹងទៀតថា ការស៊ើបអង្កេតផ្ទាល់លើករណីសង្ស័យ ដែលត្រូវបានធ្វើឡើងក្នុងសប្តាហ៍ដំបូងនៃយុទ្ធនាការ បានរកឃើញសត្វសុនខមានជំងឺឆ្កែឆ្កួតចំនួន ៧ ករណីផងដែរ។
អង្គការសង្គ្រោះសត្វកម្ពុជា បានបញ្ជាក់ថា៖ «ការចាក់វ៉ាក់សាំងដ៏ធំបំផុតក្នុងប្រវត្តិសាស្ត្រកម្ពុជាកំពុងតែដំណើរការ។ តួលេខដែលទទួលបាន បានសបញ្ជាក់ពីឥទ្ធិពលនៃយុទ្ធនាការនេះ ដោយនៅក្នុងសប្តាហ៍ដំបូងសត្វសុនខចំនួន ៣៦ ៧១៩ ក្បាល បានទទួលការចាក់វ៉ាក់សាំងការពារជំងឺឆ្កែឆ្កួត។ ពួកយើង គឺជាជំហានដ៏ធំ ១ ក្នុងការលើកកម្ពស់សុខភាពសាធារណៈដែលទាក់ទងនឹងជំងឺឆ្កែឆ្កួតសម្រាប់ទាំងមនុស្ស និងសត្វដូចគ្នា»៕
.jpg)
