កុមារថតរូបអនុស្សាវរីយ៍ក្នុងទិវាសៀវភៅកុមារអន្តរជាតិ។ រូបថត CIBD
ភ្នំពេញៈ មន្ត្រីក្រសួងអប់រំ យុវជន និងកីឡា ជំរុញឱ្យមានការបង្កើននូវគុណភាពផលិតសៀវភៅសម្រាប់កុមារនៅកម្ពុជា ខណៈ អ្នកជំនាញសៀវភៅកុមារ អំពាវនាវឱ្យអាណាព្យាបាល បណ្តុះការស្រឡាញ់សៀវភៅដល់កុមារតាមរយៈការចូលរួមទិញសៀវភៅសម្រាប់កុមារ បន្ទាប់ពីសង្កេតឃើញថា ការអានមានការធ្លាក់ចុះ។
ការអំពាវនាវនេះ បានធ្វើឡើងនៅក្នុងព្រឹត្តិការណ៍រយៈពេល៣ថ្ងៃ ចាប់ពីថ្ងៃទី ២ ដល់ថ្ងៃទី ៤ ខែមិថុនា ឆ្នាំ ២០២៣ ក្នុងទិវាសៀវភៅកុមារអន្តរជាតិលើកទី៨ រៀបចំដោយសមាគមក្រុមប្រឹក្សាសៀវភៅកុមារ និងយុវជនកម្ពុជា (IBBY Cambodia) នៅវិទ្យាល័យបឹងត្របែក រាជធានីភ្នំពេញ។
លោកស្រី ទន់ សាអុីម អនុរដ្ឋលេខាធិការនៃក្រសួងអប់រំយុវជន និងកីឡា បានលើកឡើងថា ការបង្កើននូវគុណភាពផលិតសៀវភៅ គឺជារឿងមួយដែលស្ថាប័នបោះពុម្ភ និងអ្នកនិពន្ធនានា គួរយកចិត្តទុកដាក់ ដើម្បីទាក់ទាញការចាប់អារម្មណ៍ពីសាធារណជន។ លោកស្រី បន្តថា សៀវភៅ គួរតែត្រូវបានបង្កើតឱ្យមានទាំងការកម្សាន្ត និងចំណេះដឹងទៅដល់អ្នកអាន ព្រោះទាំងនេះ គឺសុទ្ធសឹងតែជាប្រយោជន៍ទាំងអស់។
លោកស្រី បានបញ្ជាក់ថា៖«ការបង្កើនឡើងនូវគុណភាពផលិតសៀវភៅ គឺដើម្បីឱ្យយើងទាំងអស់គ្នាបានសិក្សា បានទទួលចំណេះដឹង បានអភិវឌ្ឍខ្លួនឱ្យកាន់តែមានចំណេះដឹងបន្ថែមទៀត។ ក្មួយៗដែលចូលរួមកម្មវិធីនៅថ្ងៃនេះ នឹងបានចាប់អារម្មណ៍អំពីសៀវភៅសិក្សា ដើម្បីកម្សាន្ត ដើម្បីទទួលបានចំណេះដឹង គឺសុទ្ធសឹងតែជាប្រយោជន៍ទាំងអស់»។
លោក ទន់ សាអុីម ថ្លែងថា សៀវភៅមានតួនាទីផ្តល់ចំណេះដឹង សោភ័ណ និងការអប់រំ ដូច្នេះហើយ ទាំងខ្លឹមសារ ទាំងរូបភាព ត្រូវតែបង្ហាញពីតថភាព ចៀសវាងការផ្តល់សារខុសដែលនាំឱ្យអ្នកអានយល់ច្រឡំ ជាពិសេសកុមារ ព្រោះកុមារចូលចិត្តរូបភាព និងឆាប់ផ្តិតយកជាទីបំផុត។
លោកស្រី ហ៊ុយ ឆេងរតនា តំណាងសមាគម IBBY នៃកម្ពុជា បាននិយាយថា សមាគម IBBY បានបង្កើតឡើងនៅប្រទេសស្វ៊ីស តាំងពីឆ្នាំ១៩៥៣ និងមានសមាជិកចំនួន៨០ប្រទេស។ លោកស្រី បានបន្តថា IBBY គឺជាសមាគមអ្នកស្រឡាញ់សៀវភៅដែលមានការប្ដេជ្ញាចិត្តរួមគ្នាក្នុងការអភិវឌ្ឍវិស័យអំណានសម្រាប់កម្ពុជា តាមរយៈសកម្មភាពនានា ក្នុងការជំរុញឱកាសឱ្យកុមារចូលរួមអានសៀវភៅដែលខ្លួនចូលចិត្តអានបានដោយសេរី។
ទន្ទឹមនឹងនេះ លោកស្រី ក៏បានបញ្ជាក់ដែរថា៖«សមាជិករបស់ IBBY នៃកម្ពុជា រួមមាន គ្រឹះស្ថានបោះពុម្ពផ្សាយ បណ្ណាធិការ អ្នកនិពន្ធ វិចិត្រករ បណ្ណារក្ស អ្នកចែកចាយសៀវភៅ អ្នកអប់រំ។ ទស្សនវិស័យធំរបស់យើង គឺ១ ផ្ដល់ការគាំទ្រ និងជំនួយដល់អង្គការដៃគូ និងអ្នកដែលធ្វើការនៅក្នុងសៀវភៅកុមារ។ ២ លើកកម្ពស់ការផ្លាស់ប្ដូរជំនាញ និងចំណេះដឹងដែលពាក់ព័ន្ធនឹងសៀវភៅកុមារទាំងថ្នាក់ជាតិនិងអន្តរជាតិ និង៣ លើកទឹកចិត្តដល់ការអភិវឌ្ឍទំនាក់ទំនងរវាងប្រទេសកម្ពុជា និងប្រទេសផ្សេងៗទៀតដែលធ្វើការលើវិស័យសៀវភៅកុមារ»។
លោកស្រី គឹមស៊ុន សុធារី ប្រធាន Reading Book ដែលជាស្ថាប័នបោះពុម្ព និងចែកចាយសៀវភៅសម្រាប់កុមារ បាននិយាយប្រាប់ភ្នំពេញប៉ុស្តិ៍ថា សៀវភៅដែលត្រូវបានបោះពុម្ព និងចែកចាយដោយ Reading Book គឺសុទ្ធតែត្រូវបានឆ្លងកាត់ការពិនិត្យ និងបង្កើនការច្នៃប្រឌិត ដើម្បីទាក់ទាញការចាប់អារម្មណ៍ពីសាធារណជន ជាពិសេសកុមារ។
លោកស្រី ថ្លែងថា ការអានមួយរយៈចុងក្រោយនេះ ហាក់មានការធ្លាក់ចុះ និងមិនសូវមានការចូលរួមច្រើនផុសផុលនោះទេ បើទោះជាសៀរភៅដែលបានដាក់តាំងបង្ហាញបានបង្កើនគុណភាពយ៉ាងណាក៏ដោយ។ លោកស្រី ថ្លែងដោយរំពឹងថា សាធារណជន នឹងនៅតែបន្តចូលរួម និងគាំទ្រដល់ការអាន តាមរយៈការទិញសៀវភៅ និងនាំក្មេងៗ ឱ្យចូលរួមសៀវភៅ។
លោកស្រី បានបញ្ជាក់ថា៖«១រយៈនេះ ដូចជាការអានធ្លាក់ចុះ ព្រោះ(ខ្ញុំ) ទៅកម្មវិធីនៅតាមខេត្តមួយចំនួន ដូចជាកំពង់សោម សៀមរាប ខេត្តត្បួងឃ្មុំ គេដូចមិនសូវចាប់អារម្មណ៍នឹងការអានសោះ។ វាមិនសូវដូចពីមុនទេ ក្មេងៗឡូវ គាត់យកភ្នែកមើលតែទូរស័ព្ទច្រើនពេក គាត់មិនសូវយកភ្នែកមើលសៀវភៅទេ»។
IBBY Cambodia គឺជាសមាគមមួយដែលបានរៀបចំប្រារព្ធទិវាសៀវភៅកុមារអន្តរជាតិនៅប្រទេសកម្ពុជាជាលើកដំបូងកាលពីឆ្នាំ២០១៣ ដើម្បីផ្តោតសំខាន់លើសៀវភៅសម្រាប់កុមារតូចៗ ហើយក្នុងនោះ អង្គការដៃគូជាសមាជិក ក៏បានចូលរួមផ្តល់ការកម្សាន្ត និងសកម្មភាពមួយចំនួន។
សម្រាប់ទិវាសៀវភៅកុមារអន្តរជាតិលើកទី៨ ដែលប្រារព្វឡើងក្នុងឆ្នាំនេះ គឺមានសកម្មភាពជាច្រើន ដូចជា ការសម្ដែងរឿងខ្លីសម្រាប់កុមារ ការបង្ហាញសមត្ថភាពរបស់កុមារ ពិភពនិម្មិត សកម្មភាពបណ្ណាល័យចល័ត សំណួរល្បងប្រាជ្ញា ការសរសេរតាមអាន ការប្រឡងប្រកបអក្សរ ការនិទានរឿងដោយប្រើកាមីស៊ីបៃ ការបត់រូបភាពសត្វអូរីកាមី អំណានសេរី ផាត់ពណ៌ និងគូររូបជាដើម។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បាននិយាយថា ដៃគូរអភិវឌ្ឍន៍ បាននិងកំពុងដើរតួនាទីសំខាន់១ ក្នុងការចូលរួមលើកកម្ពស់គុណភាពមូលធនមនុស្សកម្ពុជា តាមរយ:គ្រប់រូបភាព ដូចជាការលើកកម្ពស់អំណាន តាមរយ:ការរៀបចំទិវាសៀវភៅកុមារអន្តរជាតិដែលជាមូលដ្ឋានគ្រឹះមួយចូលរួមលើកកម្ពស់គុណភាពអប់រំនៅកម្ពុជា។
លោក បញ្ជាក់ថា៖«ក្រសួងអប់រំ យុវជន និង កីឡាស្វាគមន៍ និងថ្លែងអំណរគុណចំពោះកិច្ចសហការណ៍វិជ្ជមានពីគ្រប់ភាគីពាក់ព័ន្ធក្នុងការលើកកម្ពស់អំណានដើម្បីចូលរួមចំណែកការងារកំណែទម្រង់អប់រំ យុវជន និងកីឡា។ សៀវភៅជាបង្អួចឱ្យអ្នកអានមើលឃើញពិភពលោករឹតតែច្បាស់»៕
.jpg)
