ភ្នំពេញៈមន្ត្រីគណៈកម្មាធិការជាតិរៀបចំការបោះឆ្នោត (គជប) បានឱ្យដឹងថា បើទោះបីជាកម្ពុជាមានហេដ្ឋារចនាសម្ព័ន្ធល្អប្រសើរជាងមុនក្តី ប៉ុន្តែនៅខេត្ត និងតំបន់ខ្លះនៅតែទាមទារឱ្យប្រើមធ្យោបាយដឹកជញ្ជូនតាមផ្លូវទឹក អាកាស និងតាមគោយន្ត ដើម្បីដឹកជញ្ជូនសម្ភារបម្រើឱ្យការបោះឆ្នោតទៅដល់គោលដៅ។
តាមរយៈវីដេអូកិច្ចសម្ភាសន៍តាមប្រព័ន្ធអនឡាញរបស់ គ.ជ.ប លើប្រធានបទ «ការដឹកជញ្ជូន និងការបែងចែកសម្ភារសម្រាប់ការងារបោះឆ្នោត»លោក ឌី ភីរុណ ជំនួយការ គ.ជ.ប និងជាប្រធាននាយកដ្ឋានប្រតិបត្តិការ បានឱ្យដឹងថា ពាក់ព័ន្ធផែនការដឹកជញ្ជូនសម្ភារបោះឆ្នោតសម្រាប់បោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ ២០២៣ គឺមាន ៤ ដំណាក់កាលធំៗ។
ក្នុងនោះ ៣ ដំណាក់កាល គឺជាការដឹកជញ្ជូន និងប្រគល់ជូនទៅគណៈកម្មការរៀបចំការបោះឆោតថ្នាក់ក្រោម និងដំណាក់កាលចុងក្រោយ គឺជាការចុះដឹកជញ្ជូនប្រមូលសម្ភារនោះត្រឡប់មកវិញ ដើម្បីរក្សាទុកនៅ
គ.ជ.ប. ។
លោកឱ្យដឹងដែរថា បើសង្កេតជាទូទៅលើភូមិសាស្ត្រ និងហេដ្ឋារចនាសម្ព័ន្ធនៅកម្ពុជាឃើញថា កាន់តែមានភាពល្អប្រសើរឡើង ដូច្នេះការដឹកជញ្ជូនពីថ្នាក់ជាតិទៅថ្នាក់រាជធានី-ខេត្ត មិនមានបញ្ហាចោទណាមួយទេ សម្រាប់មធ្យោបាយដឹកជញ្ជូន ទាំងផ្លូវគមនាគមន៍។
ប៉ុន្តែលោកថា ចំពោះតំបន់ភូមិសាស្ត្រស្មុគស្មាញខ្លះដែលត្រូវដឹកជញ្ជូនពីខេត្តទៅឃុំ សង្កាត់ មានជួបបញ្ហាប្រឈមខ្លះដែរ ទាំងពីខេត្តទៅឃុំ និងពីឃុំទៅការិយាល័យគឺជួបបញ្ហាតិចតួចដែលទាមទារត្រូវប្រើប្រាស់មធ្យោបាយផ្សេងៗដើម្បីធ្វើឱ្យការដឹកជញ្ជូនសម្ភារនេះបានទៅដល់គោលដៅដោយសុវត្ថិភាព។
លោកថា៖«មធ្យោបាយទាំងនោះមានដូចជា តាមផ្លូវទឹក ដែលក្នុងនោះ មានឃុំ១ ឬ២នៅខេត្តបាត់ដំបង កំពង់ឆ្នាំង កំពង់ធំ ខេត្តកោះកុង និងខេត្តព្រះសីហនុ ដែលត្រូវប្រើប្រាស់មធ្យោបាយផ្លូវទឹក ហើយនៅមានតំបន់មួយចំនួនទៀតដែលត្រូវប្រើប្រាស់មធ្យោបាយដូចជាម៉ូតូ គោយន្ត ឬក៏ឈានទៅដល់អន្តរាគមន៍តាមផ្លូវអាកាស ដែលនៅក្នុងនោះរួមមាននៅខេត្តមណ្ឌលគិរី រតនគិរី និងខេត្តក្រចេះ ជាដើម»។ កាលពីឆ្នាំ២០១៨ យើងឈានទៅដល់ការប្រើប្រាស់ដំរីដើម្បីដឹកជញ្ជូនសម្ភារនេះឱ្យបានទៅដល់គោលដៅ។
ទោះជាយ៉ាងណា ផ្អែកលើបទពិសោធន៍ដែលយើងរៀបចំការបោះឆ្នោតកន្លងមក ឬចំណាត់ការ ឬវិធានការ ដែលត្រៀមសម្រាប់ការបោះឆ្នោតនៅពេលខាងមុខនេះ គឺគ.ជ.ប នឹងចាត់ចែងគ្រប់វិធានការ និងមធ្យោបាយឱ្យបានសមស្រប ដើម្បីធានាឱ្យបានសម្ភារបរិក្ខារនេះត្រូវបានដឹកជញ្ជូនទៅដល់គោលដៅ និងមានសុវត្ថិភាព។ នេះបើតាមការបញ្ជាក់បន្ថែមពីលោក ឌី ភីរុណ ។
នាយកប្រតិបត្តិអង្គការឃ្លាំមើលការបោះឆ្នោតនិចហ្វិក លោក សំ គន្ធាមី ថ្លែងថា លោកមិនមានមតិអ្វីច្រើនជុំវិញការប្រើមធ្យោបាយដឹកជញ្ជូនសម្ភារបរិក្ខារបម្រើឱ្យបោះឆ្នោតនោះទេ។ ប៉ុន្តែលោកថា តាមការសង្កេតកន្លងមកឃើញមានកម្លាំងរបស់ គ.ជ.ប បានដឹកជញ្ជូនទៅដល់គោលដៅ មិនមានបញ្ហាអ្វីទេ។
ទន្ទឹមនឹងនោះ លោក ឌី ភីរុណ បានឱ្យដឹងដែរថា ជាទូទៅការដឹកជញ្ជូនសម្ភារត្រូវធ្វើឡើងតាមដំណាក់កាលនៃការប្រើប្រាស់សម្ភារបរិក្ខាររបស់គណៈកម្មការថ្នាក់ក្រោម រួមមាន គណៈកម្មការថ្នាក់ខេត្ត ឃុំ និងគណៈកម្មការការិយាល័យ ពីព្រោះថា សម្ភារទាំងអស់នេះមិនអាចយកទៅរក្សាទុកយូរពេកទេ ព្រោះទាក់ទងសុវត្ថិភាពឯកសារបោះឆ្នោត។
ចំពោះសម្ភារបរិក្ខារដែលត្រូវដឹកជញ្ជូន និងប្រគល់ជូននោះគឺមានច្រើន ហើយទៅតាមជំនាញផ្សេងៗ ប៉ុន្តែសម្ភារសំខាន់នាពេលនេះគឺសំដៅទៅលើសម្ភារបរិក្ខារដែលបម្រើឱ្យកិច្ចប្រតិបត្តិការបោះឆ្នោត និងរាប់សន្លឹកឆ្នោតនៅថ្នាក់ការិយាល័យ ថ្នាក់ឃុំ សង្កាត់ និងរាជធានី ខេត្ត។
សម្ភារបរិក្ខារទាំងនោះរួមមាន ហិបឆ្នោត សោឃ្លុំ បន្ទប់សម្ងាត់ សម្ភារបរិក្ខារវិទ្យុទាក់ទង សម្រាប់បម្រើការងារឱ្យការបោះឆ្នោត បញ្ជីបោះឆ្នោត សន្លឹកឆ្នោត ត្រាសម្ងាត់ ត្រាគណៈកម្មការការិយាល័យបោះឆ្នោត ទឹកខ្មៅលុបមិនជ្រះ ស្បោង ស្រោមសំបុត្រ ឬកញ្ចប់សុវត្ថិភាព និងសម្ភារបរិក្ខារផ្សេងៗទៀត។
លោកបានបញ្ជាក់ថា៖«សម្ភារទាំងអស់នេះសុទ្ធតែមានសារៈសំខាន់ចាំបាច់សម្រាប់បម្រើឱ្យការបោះឆ្នោត និងរាប់សន្លឹកឆ្នោត ប៉ុន្តែមានសម្ភារមួយចំនួនដែលជាសម្ភារមិនអាចខ្វះបាន ឬអាចនិយាយថាប្រសិនបើខ្វះសម្ភារនេះគឺអាចរាំងស្ទះដល់ដំណើរការបើកការិយាល័យបោះឆ្នោត ដែលសម្ភារទាំងនោះយើងបានកំណត់មាន ដូចជា បញ្ជីបោះឆ្នោត សន្លឹកឆ្នោត ត្រាសម្ងាត់ ហឹបឆ្នោត សោឃ្លុំ និងទឹកខ្មៅលុបមិនជ្រះ»។
បើតាមលោក ឌី ភីរុណ គ.ជ.ប ត្រូវរៀបចំចាត់ចែងដឹកជញ្ជូនសម្ភារ ឯកសារ និងបរិក្ខារបោះឆ្នោតនេះ មិនឱ្យលើសពី៣៦ម៉ោង មុនថ្ងៃបោះឆ្នោត ដូច្នេះជាការអនុវត្តទូទៅ សម្ភារទាំងនេះនឹងត្រូវប្រគល់ជូនក្នុងចន្លោះរសៀលថ្ងៃទី២១ ឬថ្ងៃទី២២ ខែកក្កដា ឆ្នាំ២០២៣។
ជាមួយគ្នានេះ លោកសំណូមពរដល់គណៈកម្មការរៀបចំការបោះឆ្នោតគ្រប់លំដាប់ថ្នាក់ ជាពិសេសគណៈកម្មការ ឃុំ ក៏ដូចជា គណៈកម្មការការិយាល័យ សូមយកចិត្តទុកដាក់លើការងារនៅពេលប្រគល់-ទទួលសម្ភារបរិក្ខារបោះឆ្នោតទាំងបរិមាណ គុណភាពការថែរក្សាទុកដាក់ និងការប្រើប្រាស់ឱ្យបានត្រឹមត្រូវតាមគោលការណ៍របស់ គ.ជ.ប.។
សូមជម្រាបថា ការបោះឆ្នោតជ្រើសតាំងតំណាងរាស្ត្រនីតិកាលទី៧នឹងប្រព្រឹត្តទៅនៅថ្ងៃអាទិត្យទី២៣ ខែកក្កដា ឆ្នាំ២០២៣៕