ភ្នំពេញៈ យុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃរយៈពេល ២ សប្តាហ៍ បានចាក់ថ្នាំបង្ការដល់សត្វសុនខសរុបជិត ៧៥ ០០០ ក្បាល ខណៈអង្គការ Mission Rabies អំពាវនាវឱ្យសាធារណជនរាយការណ៍ បើសិនជាឃើញសត្វសុនខណាដែលបង្ហាញសញ្ញាសង្ស័យថាកើតជំងឺឆ្កែឆ្កួត។
ការប្រកាសពីលទ្ធផលនៃការផ្តល់វ៉ាក់សាំងជំងឺឆ្កែឆ្កួតក្នុងរយៈពេល ២ សប្តាហ៍នេះ បានធ្វើឡើងបន្ទាប់ពីអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយនឹងអង្គការ Mission Rabies និងអង្គការ Animal Rescue Cambodia កាលពីថ្ងៃទី ២០ ខែឧសភា បានប្រកាសបើកយុទ្ធនាការចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វសុនខដោយឥតគិតថ្លៃនៅរាជធានីភ្នំពេញ និងផ្នែកខ្លះនៃខេត្តកណ្តាល ចាប់ពីថ្ងៃទី ២២ ខែឧសភាដល់ថ្ងៃទី ២ ខែមិថុនា ឆ្នាំ ២០២៣។
អង្គការ Mission Rabies បានឱ្យដឹងនៅថ្ងៃទី ៤ ខែមិថុនាថា ក្រុមការងារ ពិតជាមានសេចក្តីរំភើបរីករាយណាស់ក្នុងការប្រកាសពីការបញ្ចប់ដោយជោគជ័យនៃយុទ្ធនាការចាក់វ៉ាក់សាំងសត្វសុនខដ៏ធំរបស់ពួកយើងនៅក្នុងរាជធានីភ្នំពេញ។ អង្គការដដែលនេះ បានបញ្ជាក់ថា ត្រឹមតែរយៈពេល ១០ ថ្ងៃ ឬ ២ សប្តាហ៍ប៉ុណ្ណោះ ក្រុមការងារបានចាក់ថ្នាំបង្ការឱ្យសត្វសុនខសរុបចំនួន ៧៤ ៨៧២ ក្បាល នៅរាជធានីភ្នំពេញ និងផ្នែកខ្លះក្នុងទឹកដីខេត្តកណ្តាល។
អង្គការ Mission Rabies បានបញ្ជាក់ថា៖ «សមិទ្ធផលដ៏អស្ចារ្យនេះនឹងមិនអាចទៅរួចឡើយ ប្រសិនបើគ្មានការគាំទ្រ និងការសហការគ្នាដោយឥតងាករេពីដៃគូរបស់ពួកយើង។ សូមថ្លែងអំណរគុណយ៉ាងជ្រាលជ្រៅចំពោះដៃគូរបស់យើង ហើយជាការពិតណាស់អ្នកស្ម័គ្រចិត្តរបស់ពួកយើងទាំងអស់គ្នាមកពីក្រៅប្រទេស និងសាកលវិទ្យាល័យក្នុងស្រុកសម្រាប់ការរួមចំណែកដ៏មានតម្លៃរបស់ពួកគេពេញ១យុទ្ធនាការ»។
អង្គការ Mission Rabies បានអះអាងថា ក្រុមការងារទាំងអស់ កំពុងតែបានសម្លឹងមើលទៅអនាគតរួចទៅហើយ ដោយនឹងយកមេរៀនដែលបានរៀនពីយុទ្ធនាការនេះ ដើម្បីកែលម្អយុទ្ធសាស្ត្ររបស់ខ្លួនបន្ថែមទៀត និងកែលម្អយុទ្ធសាស្ត្រការផ្សព្វផ្សាយរបស់ពួកគេដើម្បីប្តេជ្ញាចិត្តក្នុងការការពារសុខភាព និងសុខុមាលភាពទាំងមនុស្ស និងសត្វឱ្យមានស្ថិរភាព។
អង្គការ Mission Rabies បានបញ្ជាក់ថា៖ «ពួកយើងក៏សូមរំឭកអ្នកទាំងអស់គ្នាថា ការងារតាមដានជំងឺឆ្កែឆ្កួតរបស់ពួកយើងនៅតែបន្ត។ ក្នុងអំឡុងយុទ្ធនាការនេះ ពួកយើងក៏បានចាប់យកសត្វដែលសង្ស័យថា មានជំងឺឆ្កែឆ្កួត ដើម្បីធ្វើតេស្តបញ្ជាក់ពីវត្តមាននៃវីរុសឆ្កែឆ្កួតផងដែរ។ ប្រសិនបើលោកអ្នកឃើញសត្វសុនខណាដែលបង្ហាញសញ្ញាសង្ស័យថា កើតជំងឺឆ្កែឆ្កួត សូមទាក់ទងមកកាន់ពួកយើង។ ការចូលរួម និងការជឿទុកចិត្តរបស់លោកអ្នក មានសារៈសំខាន់ណាស់ក្នុងការសម្រេចបាននូវព្រឹត្ដិការណ៍ដ៏អស្ចារ្យនេះ»។
ប្រទេសកម្ពុជា គឺជាប្រទេស ១ ដែលគេប៉ាន់ស្មានថា មានអ្នកស្លាប់ដោយជំងឺឆ្កែឆ្កួតខាំខ្ពស់ជាងប្រទេសផ្សេងៗទៀតនៅលើពិភពលោក ហើយការស្លាប់របស់មនុស្សមានរហូតដល់ ៩៩ ភាគរយដោយសារជំងឺឆ្កែឆ្កួតដែលបង្កឡើងពីសត្វសុនខដែលមានជំងឺឆ្កែឆ្កួតខាំ។ ជារៀងរាល់ឆ្នាំ កម្ពុជាត្រូវបានគេប៉ាន់ស្មានថា មានមនុស្សប្រមាណ ៦០ ម៉ឺននាក់ ត្រូវបានសត្វសុនខខាំ ប៉ុន្តែពួកគេពុំបានទៅទទួលការព្យាបាលឬវ៉ាក់សាំងក្រោយសត្វខាំគ្រប់ៗគ្នានោះទេ។ យោងតាមអង្គការ Mission Rabies។
លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិត្យសភាកម្ពុជា ធ្លាប់ថ្លែងថា ជំងឺឆ្កែឆ្កួតជាជំងឺឆ្លង ហើយអាចធ្វើឱ្យមនុស្សឈឺ និងស្លាប់បាន ដោយសារវាជាជំងឺប្រភេទវីរុស ដែលរស់ក្នុងទឹកមាត់សត្វសុនខ ក៏ដូចជា ប្រភេទសត្វចិញ្ចឹមដទៃទៀតដូចជា សត្វឆ្មា និងកណ្ដុរជាដើម។
លោកបញ្ជាក់ថា៖ «កាលដែលចាក់វ៉ាក់សាំងបង្ការជំងឺឆ្កែឆ្កួតសម្រាប់សត្វឆ្កែ ជាការល្អបំផុត ព្រោះសម្រាប់ការពារសត្វចិញ្ចឹមរបស់យើងកុំឱ្យមានជំងឺឆ្កែឆ្កួត ហើយក៏ការពារមនុស្សកុំឱ្យមានការឆ្លងជំងឺឆ្កែឆ្កួតផងដែរ»។
អង្គការ Mission Rabies ថ្លែងថា បច្ចុប្បន្ននេះអង្គការកំពុងធ្វើការជាមួយអ្នកពាក់ព័ន្ធក្នុងមូលដ្ឋានជាច្រើនបន្ថែមទៀត ដើម្បីធ្វើការចាក់វ៉ាក់សាំងបង្ការជំងឺឆ្កែឆ្កួតដល់សត្វសុនខលើសពី ៧០ ភាគរយ នៃចំនួនសត្វសុនខទាំងអស់នៅក្នុងរាជធានីភ្នំពេញ ដើម្បីសម្រេចបាននូវភាពស៊ាំ៕