ភ្នំពេញៈ ​លោក សែម សុវណ្ណនី ទេសរដ្ឋមន្ត្រី អនុប្រធាន​ទី​២ អាជ្ញាធរ​មីន និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព​បាន​ចូលរួម​ដឹកនាំ​កម្លាំង​ជំនាញ ដុត​កម្ទេចចោល​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ជាង ២០០ ​គ្រាប់​នៅ​ឃុំរ​យ៉ ស្រុក​កោះ​ញែក ខេត្តមណ្ឌលគិរី កាលពី​ថ្ងៃទី ​៤ ខែមិថុនា ឆ្នាំ​ ២០២៣។​

យោងតាម​មជ្ឈមណ្ឌល​ជាតិ​រក្សា​សន្តិភាពបានឱ្យដឹងថា កងទ័ព​មួក​ខៀវ​កម្ពុជា បាន​កម្ទេច​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ជាង ២០០​ គ្រាប់ និង​អំបែង​ចំនួន ៥៦ ៩៤៩​ ដុំ ដែល​នៅសល់​ពី​សង្គ្រាម​។​

លោក សែម សុវណ្ណនី ថ្លែងថា កម្ពុជា​ធ្លាប់ជា​ប្រទេសមួយ​ដែល​រងគ្រោះ​ជោកជាំ​ដោយ​ភ្លើងសង្គ្រាម​អស់​ជាច្រើន​ទសវត្សរ៍​។ បន្ទាប់ពី​សង្គ្រាម​ត្រូវ​បញ្ចប់ គ្រាប់មីន និង​យុទ្ធភណ្ឌ​មិនទាន់​ផ្ទះ​ជាច្រើន​បាន​នៅ​សេសសល់​កប់​ក្នុង​ដី​ដែល​តែង​បង្ក ជា​ហានិភ័យ​ដល់​អាយុជីវិត​មនុស្ស​សត្វ​និង​ទ្រព្យសម្បត្តិ​ទូទាំងប្រទេស​។​

លោក ថ្លែងថា​៖«​ដោយមាន​ការសហការ​យ៉ាង​ស្អិតល្មួត​ជាមួយ​អាជ្ញាធរ​មីន ជាមួយ​អាជ្ញាធរ​ដែនដី​គ្រប់លំដាប់​ថ្នាក់​និង​ក្រោម​ការគាំទ្រ​ពី​មូលនិធិ​កម្ពុជា​គ្មាន​មីន​ឆ្នាំ​២០២៥ ក្នុងការ​អនុវត្ត​គម្រោង​សម្ដេច​តេ​ជោ​សម្រាប់​សកម្មភាព​មីន​ក្រោម​មូលបទ ផ្តល់​ដី​មាន​សុវត្ថិភាព​បង្កើត​ស្នាមញញឹម ជាហេតុ​នាំឱ្យ​ប្រតិបត្តិ​ការទទួលបាន​ជោគជ័យ​យ៉ាង​ត្រចះត្រចង់​»​។​

ប្រតិបត្តិការ​ក្នុង​ខេត្តមណ្ឌលគិរី​នេះ ផ្ទៃដី​សរុប​ជាង​៩ លាន​ម៉ែត្រក្រឡា ត្រូវបាន​បោសសម្អាត​បាន​ផ្ទៃដី​ជាង​៨​លាន​ម៉ែត្រក្រឡា ស្មើនឹង​ប្រមាណ ៨០% នៃ​ផ្ទៃដី​សរុប​។ ក្នុងនោះ មន្ត្រី​បាន​រកឃើញ​មីន​ប្រឆាំង​មនុស្ស និង​រថក្រោះ​ចំនួន ៤៤​គ្រាប់ យុទ្ធភណ្ឌ​មិនទាន់​ផ្ទះ​ចំនួន ១៦៩​គ្រាប់ ព្រមទាំង​អំបែង​ចំនួន ៥៦ ៩៤៩​ដុំ​។ ចំពោះ​ផ្ទៃដី​ដែល​បាន​បោសសម្អាត​រួច​បាន​បែងចែក​ទៅ​ប្រជាពលរដ្ឋ​ចំនួន​៦១៤​គ្រួសារ​។ នេះ​បើ​យោងតាម​មជ្ឈមណ្ឌល​ជាតិ​រក្សា​សន្តិភាព​។​

ជុំវិញ​ការដុត​កម្ទេច​គ្រាប់មីន និង​គ្រាប់​យុទ្ធភណ្ឌ​មិនទាន់​ផ្ទុះ​ជាង ២០០​គ្រាប់​នេះដែរ លោក នួន សារ៉ន អភិបាលរង​ខេត្តមណ្ឌលគិរី បានឱ្យដឹងថា ខេត្តមណ្ឌលគិរី ជា​ខេត្ត​មួយ​ដែល​មិនសូវ​ទទួលរង​នូវ​ការគំរាមកំហែង​ពី​គ្រាប់មីន និង​យុទ្ធភណ្ឌ​មិនទាន់​ផ្ទុះ​ផ្សេងៗ ដែល​កន្លងមក មាន​ការរង​ផលប៉ះពាល់​តិចតួច ពី​គ្រាប់បែក​ចង្កោម​តែប៉ុណ្ណោះ ដែល​ធ្វើឱ្យមាន​សុខ​សុវត្ថិភាព​ជូន​ដល់​ប្រជាពលរដ្ឋ​។

លោក​ថា ៖ «​តាមរយៈ​សកម្មភាព​នេះ នឹង​ជួយ​លើកកម្ពស់​ជីវភាព​រស់​នៅ​របស់​ប្រជាពលរដ្ឋ​បន្ថែមទៀត​»​។​

​យោងតាម​អាជ្ញាធរ​មីន​កម្ពុជា បានឱ្យដឹងថា មកដល់ពេលនេះ រាជធានី ខេត្ត​ចំនួន​ទាំង​១២ ត្រូវបាន​ប្រកាសថា​ជា «​ខេត្ត​អស់​មីន​» ដែល​ក្នុង​មានដូចជា ខេត្តស្ទឹងត្រែង កែប ព្រៃវែង ភ្នំពេញ ព្រះសីហនុ​ត្បូងឃ្មុំ កំពង់ចាម ស្វាយរៀង កំពង់ឆ្នាំង កណ្តាល តាកែវ និង​ខេត្តកំពត​៕