ភ្នំពេញៈ​​​​ លោក ហេង សំរិន ប្រធានរដ្ឋសភាបាន​ថ្លែងថា យុវជន​សម័យ​សន្តិភាព គឺ​ពិតជា​ទទួលបាន​ពី​សមិទ្ធផល​នៃ​ការអភិវឌ្ឍ​សេដ្ឋកិច្ច​-​សង្គម តាមរយៈ​ការអប់រំ​រៀនសូត្រ ការបណ្តុះបណ្តាល​វិជ្ជាជីវៈ និង​ជំនាញ ដើម្បី​ចូលរួម​នៅក្នុង​ការអភិវឌ្ឍ​សេដ្ឋកិច្ច​-​សង្គម​។​

លោក​បាន​ថ្លែង​បែបនេះ នៅក្នុង​ពិធី​ប្រគល់​សញ្ញាបត្រ​ជូន​ដល់​និស្សិត​ជយលាភី​នៃ​សាកលវិទ្យាល័យ ហេង សំរិន ត្បូងឃ្មុំ​ចំនួន ១ ២៤៩ ​នាក់ នៅ​ខេត្ត​ត្បូងឃ្មុំ នៅ​ព្រឹក​ថ្ងៃទី​៥ ខែមិថុនា ឆ្នាំ​២០២៣​នេះ។​

តាមរយៈ​គេហទំព័រ​ហ្វេ​ស​ប៊ុ​ក​របស់លោក ហេង សំរិន បានឱ្យដឹងថា ធនធានមនុស្សជា​កត្តា​សំខាន់ និង​មិនអាច​ខ្វះ​បាន​សម្រាប់​កសាង និង​អភិវឌ្ឍ​សង្គមជាតិ​។ ប្រទេស​នីមួយៗ​អាច​រីក​ច​ម្រី​ន​ជឿនលឿន​ទៅបាន អាស្រ័យ​ដោយមាន​ធនធានមនុស្ស​ប្រកបដោយ​ចំណេះវិជ្ជា គតិបណ្ឌិត និងសីលធម៌​ល្អ​ដែល​ចេះ​គិតគូរ​ដោះស្រាយ​រាល់​បញ្ហា​ប្រកបដោយ​ភាព​ឆ្លាត​វៃ និង​អាចដឹកនាំ​ប្រកបដោយ​ភាព​ប៉ិនប្រសប់​។

លោក ថ្លែងថា​៖ «​កម្ពុជា​ពេលនេះ​កំពុងមាន​សុខសន្តិភាព ភាពសុខដុមរមនា គ្មាន​ជម្លោះ​ជា​អំពើហិង្សា និង​សង្គ្រាម​។ ក្រោម​ម្លប់​សន្តិភាព ក្នុង​រយៈពេល​ជាង​២​ទសវត្ស​រ៍មកនេះ យុវជន យើង​ពិតជា​មានឱកាស​ច្រើនណាស់​បើ​ប្រៀបធៀប​រវាង​យុវជន​សម័យ​សង្គ្រាម និង​យុវជន​សម័យ​សន្តិភាព គឺ​ខុសគ្នា​ស្រឡះ សឹងតែ​មិនអាច​ប្រៀបធៀប​បានឡើយ​»​។

លោក ថ្លែងថា កម្ពុជា​នឹង​ក្លាយជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ២០៣០ និង​ជា​ប្រទេស​ដែលមាន​ចំណូល​ខ្ពស់​នៅ​ឆ្នាំ​២០៥០​។​

លោក អ៊ុ រ័ត្ន​មុនី រដ្ឋលេខាធិការ​ក្រសួង​អប់រំ យុវជន និង​កីឡា ត្រូវបាន​ដកស្រង់​សម្ដី​នៅក្នុង​សេចក្តីប្រកាស​ព័ត៌មាន​របស់​រដ្ឋសភា​ថា វិស័យ​អប់រំ ជា​វិស័យ​អាទិភាព​១​នៅក្នុង​គោលនយោបាយ និង​យុទ្ធសាស្ត្រ​អភិវឌ្ឍន៍​ជាតិ ដោយ​រាជរដ្ឋាភិបាល​បានកំណត់​នូវ​គោលនយោបាយ​អាទិភាព​សម្រាប់​ការអភិវឌ្ឍ​ជាតិ​ទាំង​ក្នុង​អតីតកាល បច្ចុប្បន្នកាល និង​អនាគតកាល ដែល​ក្នុងនោះ​រួមមាន មនុស្ស ទឹក ផ្លូវ ភ្លើង និង​ការ​បង្ខិត​សាលារៀន​ឱ្យ​ជិត​នឹង​ប្រជាពលរដ្ឋ​។

​លោក​បាន​បញ្ជាក់ថា​៖«​ហេតុនេះហើយ​ទើប​គ្រប់​ឃុំ​សង្កាត់ ស្រុក មិន​ថា​នៅ​ទីប្រជុំជន ឬ​ទីជនបទ តែងតែមាន​សាលារៀន​រហូតដល់​កម្រិត​វិទ្យាល័យ និង​ស្ទើរតែ​គ្រប់​ខេត្ត​មាន​រហូតដល់​កម្រិត​សាកលវិទ្យាល័យ​។ ជាក់ស្តែង​នៅ​ខេត្ត​ត្បូងឃ្មុំ​នេះ​ពី​អតីតកាល​មក​មិន​ដែលមាន​សាកលវិទ្យាល័យ​ឡើយ ទើបតែ សម័យនេះ​ទេ ទើប​យើង​មាន​សាកលវិទ្យាល័យ​ដ៏​ធំ​ស្កឹមស្កៃ»​។​

លោក​បាន​បន្តថា ក្រសួង​អប់រំ យុវជន និង​កីឡា ដែលជា​សេនាធិការ​ចម្បង​របស់​រាជរដ្ឋាភិបាល​បាន​ខិតខំ​ប្រឹងប្រែង​យ៉ាងសកម្ម និង​យកចិត្តទុកដាក់​ខ្ពស់​ក្នុងការ​អនុវត្ត​ផែនការ​យុទ្ធសាស្ត្រ​វិស័យ​អប់រំ​គោលនយោបាយ​ស្តីពី​ចក្ខុវិស័យ​ឧ​ត្ត​មសិ​ក្សា និង​កំណែទម្រង់​សំខាន់​នានា សំដៅ​ធ្វើយ៉ាងណា​កសាង​ធនធានមនុស្ស​ឱ្យ​ប្រកបដោយ​សមត្ថភាព​ខ្ពស់ អាច​ប្រកួតប្រជែង​នៅ​គ្រប់​កាលៈទេសៈ ទាំង​កម្រិត​ជាតិ និង​តំបន់ ជាពិសេស​អាច​ប្រកួតប្រជែង​ដណ្តើម​ទីផ្សារកា​រងារ​ក្នុង​បរិបទ​ដែល​ប្រទេស​កម្ពុជា​បាន និង​កំពុង​ចូលរួម​ក្នុង​ដំណើរការ​សមាហរណកម្ម​សេដ្ឋកិច្ច​អាស៊ាន​៕