ភ្នំពេញៈ លោកនាយករដ្ឋមន្ត្រី ហ៊ុន សែន បានធ្វើការអំពាវនាវដល់មហាជន ប្រជាពលរដ្ឋ និងអ្នកលេងបណ្តាញសង្គមទាំងអស់រក្សាភាពស្ងប់ស្ងាត់ និងបញ្ឈប់ការចែកចាយបទចម្រៀង ១ បទដែលច្រៀងដោយ អ្នកនាងមាស សុខសោភាបន្ទាប់ពីអ្នកចម្រៀងរូបនេះបានសូមទោសជាសាធារណៈពីកំហុសឆ្គងនេះ។
នៅក្នុងពិធីប្រគល់សញ្ញាបត្រជូននិស្សិត សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចនាព្រឹកថ្ងៃទី ៥ ខែមិថុនា លោក ហ៊ុន សែន បានលើកឡើងដោយថ្លែងអំណរគុណដល់អ្នកនាង មាស សុខសោភា ផងដែរ ដែលបានលុបចោលបទចម្រៀង «មរណភាពព្រះស្វាមីជ័យវរ្ម័នទី៧» និងបានសុំទោសសាធារណជនផងដែរ។
លោកមានប្រសាសន៍ថា៖ «ខ្ញុំក៏អំពាវនាវសុំឱ្យអ្នកលេងបណ្តាញសង្គម បញ្ឈប់ភ្លាម ដោយកុំបន្តជជែកលើបទចម្រៀងនេះ ព្រោះបើមិនអ៊ីចឹង វានឹងធ្វើឱ្យក្លាយជារឿង រុញឱ្យខ្លោច រោចឱ្យឆៅ ដោយសារមានអ្នកខ្លះថា គួរតែចាត់វិធានការតាមផ្លូវច្បាប់»។
លោកបន្តថា៖ «ខ្ញុំសុំអង្វរករ គ្នាបានជាជ្រុលជ្រួសទៅហើយ ហើយគ្នាក៏បានសុំទោស គ្នាក៏បានដកចេញ ឥឡូវតើត្រូវចាំបាច់ត្រូវធ្វើរឿងនេះ ឱ្យបន្ថែមលើរឿងទេ។ កុំរុញឱ្យខ្លោច កុំរោចឱ្យឆៅ ស្ងប់ស្ងៀមទៅ។ខ្ញុំសុំឱ្យបញ្ចប់ត្រឹមនេះទៅចុះ»។
ទាក់ទងនឹងបទចម្រៀងនេះដែរ បន្ទាប់ពីគេហទំព័រហ្វេសប៊ុករបស់អ្នកនាង មាស សុខសោភា បានចែកចាយនូវបទចម្រៀង «មរណភាពព្រះស្វាមី ជ័យវរ្ម័នទី៧» កាលពីថ្ងៃទី ៤ ខែមិថុនា ត្រូវបានមហាជន ក្រសួងវប្បធម៌ និងវិចិត្រសិល្បៈ រួមទាំងលោកនាយករដ្ឋមន្ត្រី ហ៊ុន សែន ផងដែរ បានធ្វើការប្រតិកម្ម និងស្នើឱ្យលុបចេញជាបន្ទាន់។
នាយប់ថ្ងៃទី ៤ ខែមិថុនា ដដែលនោះ អ្នកនាង មាស សុខសោភា ក៏បានសរសេរសារសូមទោសចំពោះលោកនាយករដ្ឋមន្ត្រី ក្រសួងវប្បធម៌ និងវិចិត្រសិល្បៈ ព្រមទាំងប្រជាជនខ្មែរទាំងក្នុង និងក្រៅប្រទេស ចំពោះកំហុសឆ្គងលើខ្លឹមសារនៃបទចម្រៀងដែលបានបង្ហោះក្នុងហ្វេសប៊ុកផេច និងឆាណែលយូធូបរបស់នាង។
អ្នកនាង មាស សុខសោភា សរសេរថា៖ «នាងខ្ញុំពិតជាមិនមានចេតនាណាមួយក្នុងការបំភ្លៃប្រវត្តិសាស្ត្រខ្មែរទេ តែដោយសារតែការខ្វះចន្លោះក្នុងការសិក្សាស្វែងយល់ឱ្យបានស៊ីជម្រៅពីប្រវត្តិសាស្ត្រខ្មែរមុននឹងផលិតបទនេះឡើង ទើបធ្វើឱ្យមានកំហុសឆ្គងកើតមានឡើងដោយអចេតនា»។
អ្នកនាងបន្តថា៖ «នាងខ្ញុំ និងក្រុមការងារសង្ឃឹមថា សម្តេចពុក ក្រសួងពាក់ព័ន្ធនានា ព្រមទាំងបងប្អូនជនរួមជាតិ មេត្តាយោគយល់ និងអធ្យាស្រ័យដល់នាងខ្ញុំ។ មកដល់ពេលនេះនាងខ្ញុំបានលុបទាំងស្រុង នូវវីដេអូចម្រៀង១បទនេះចេញពី ហ្វេសប៊ុកផេច និងឆាណែលយូធូបរបស់នាងខ្ញុំជាស្ថាពរហើយ»។
អ្នកចម្រៀងរូបនេះក៏បានសន្យាផងដែរថា នឹងព្យាយាមសិក្សាស្វែងយល់បន្ថែមទៀតពីប្រវត្តិសាស្ត្រខ្មែរ ព្រមទាំងផលិតបទចម្រៀងដែលលើកស្ទួយវប្បធម៌ អរិយធម៌ខ្មែរ ជាបន្តទៀត។
ក្រសួងវប្បធម៌ និងវិចិត្រសិល្បៈ កាលពីថ្ងៃទី ៤ ខែមិថុនា ក៏បានលើកឡើងដែរថា បទចម្រៀង «មរណភាពព្រះស្វាមី ជ័យវរ្ម័នទី៧» បានបរិយាយដោយគ្មានភ័ស្តុតាងច្បាស់លាស់ពីការសោយទិវង្គតរបស់ព្រះអង្គដែលជាព្រះមហាវីរក្សត្រដ៏មហិមានៅសម័យអង្គរ និងបានបង្កឱ្យមានប្រតិកម្មយ៉ាងខ្លាំងពីសាធារណមតិ។
ក្រសួងវប្បធម៌ និងវិចិត្រសិល្បៈ បានបញ្ជាក់ថា រហូតមកដល់បច្ចុប្បន្ននេះ ពុំទាន់មានឯកសារស្រាវជ្រាវប្រវត្តិសាស្ត្រណាមួយដែលមានលក្ខណៈវិទ្យាសាស្ត្រគ្រប់គ្រាន់ បញ្ជាក់ច្បាស់ពីការសោយទិវង្គតរបស់ព្រះបាទជ័យវរ្ម័នទី៧ នៅឡើយទេ។ ការផលិតបទចម្រៀងខាងលើ គឺពុំមានភ័ស្តុតាងពិតប្រាកដ ដែលជាហេតុបង្កឱ្យមានការភាន់ច្រឡំចំពោះប្រវត្តិសាស្ត្រកម្ពុជា។
ជុំវិញបញ្ហានេះដែរ លោក សំបូរ មាណ្ណារ៉ា សាស្ត្រាចារ្យប្រវត្តិសាស្ត្របានប្រាប់ឱ្យដឹងថា ការដកចេញបទចម្រៀងនេះ គឺជាការត្រឹមត្រូវបំផុត ដោយសារតែខ្វះឯកសារយោង និងភាពជាក់ស្តែងនៃប្រវត្តិសាស្ត្រកម្ពុជា។
លោកបន្តថា បញ្ហានេះក្រសួងស្ថាប័នមានសមត្ថកិច្ចដែលជាសេនាធិការរបស់រាជរដ្ឋាភិបាល គួរតែធ្វើការទទួលខុសត្រូវ ព្រោះនៅពេលដែលផ្សាយចេញទៅហើយ ប្រាកដជាប៉ះពាល់ដល់សច្ចធម៌ប្រវត្តិសាស្ត្រជាពិសេសការប្រើប្រាស់ពាក្យពេចន៍ខុស ថា ព្រះស្វាមី ឬមរណភាពចំពោះព្រះបាទជ័យវរ្ម័នទី៧ ដែលគេមិនដែលប្រើបែបនេះឡើយ។
លោក មាណ្ណារ៉ា មានប្រសាសន៍ថា៖ «ទាំងអស់នេះ ខ្ញុំដឹងថា មកពីការសិក្សារៀនសូត្រ របស់អ្នកនិពន្ធ ឬក៏អ្នកចម្រៀងទាំងអស់នៅមានកម្រិត។ មួយទៀត គឺពួកគាត់រើសអើងដោយមិនខ្វល់ពីអ្នកដទៃ ដោយគិតខ្លួនឯងថា ជាអ្នកល្បី គាត់ធ្វើអីបានតាមចិត្ត ដែលអាហ្នឹងហើយធ្វើឱ្យ មានការកើនឡើងនូវវិបត្តិក្នុងវប្បធម៌ ប្រវត្តិសាស្ត្រជាតិ និងធ្វើឱ្យសាបរលាបនូវតម្លៃមហាបុរសខ្មែរតាមរយៈបទចម្រៀងទាំងអស់ហ្នឹង»៕