.jpg)
សកម្មភាពកម្មករអាជ្ញាធរជាតិអប្សរាសម្អាតរុក្ខជាតិតូចៗ នៅប្រាសាទតាព្រហ្ម។ រូបថត ANA
សៀមរាបៈ អាជ្ញាធរជាតិអប្សរា បានលើកឡើងថា រដូវវស្សាជារដូវដែលមានភ្លៀងធ្លាក់ ធ្វើឱ្យរុក្ខជាតិតូចធំដុះលូតលាស់យ៉ាងស្រស់បំព្រង ប៉ុន្តែរុក្ខជាតិទាំងនោះក៏បានធ្វើឱ្យមានផលប៉ះពាល់ខ្លះៗដល់ប្រាសាទដែរ។
ហេតុដូច្នេះហើយ អាជ្ញាធរជាតិអប្សរាតែងតែធ្វើការសម្អាតស្មៅ និងរុក្ខជាតិតូចៗដែលដុះនៅលើប្រាសាទជាប្រចាំ ដើម្បីរក្សាសោភណភាព ការពារកុំឱ្យស្មៅ និងរុក្ខជាតិទាំងនោះបំផ្លាញភាពស្រស់ស្អាតរបស់ប្រាសាទ។
អាជ្ញាធរអប្សរាបានឱ្យដឹងទៀតថា ឫសរបស់រុក្ខជាតិ និងស្មៅទាំងនោះ ក៏បង្កឱ្យខូចខាតដល់ថ្ម និងរចនាសម្ព័ន្ធប្រាសាទផ្សេងៗជាច្រើនដែរ។ នេះបើយោងតាមប្រសាសន៍របស់លោក ងិន ធី ប្រធានកម្មករផ្នែកសម្អាតប្រាសាទ។ លោកងិន ធី ថ្លែងថា ការសម្អាតនេះ ធ្វើឡើងញឹកញាប់ជាងគេ គឺនៅរដូវវស្សា ព្រោះមានភ្លៀងធ្លាក់ងាយធ្វើឱ្យរុក្ខជាតិតូចៗនិងស្មៅដុះលឿន។
ជាមួយគ្នានេះ ដើម្បីសម្រួលដល់ការដើរទស្សនារបស់ភ្ញៀវទេសចរឱ្យបានគ្រប់ជ្រុងជ្រោយ និងមានសណ្ដាប់ធ្នាប់នាយកដ្ឋានអភិវឌ្ឍន៍ទេសចរណ៍ និងវប្បធម៌នៃអាជ្ញាធរជាតិអប្សរា កំពុងរៀបចំវង់ទស្សនានៅប្រាសាទតាកែវ។
បើតាមអាជ្ញាធរជាតិអប្សរាកន្លងមកប្រាសាទតាកែវ មិនទាន់មានការរៀបចំវង់ទស្សនាទេ ហើយការរៀបចំនៅពេលនេះគឺដើម្បីត្រៀមដាក់ឆ្លងទៅក្រុមអ្នកជំនាញការអាដហុក នៃគណៈកម្មាធិការអន្ដរជាតិអាយស៊ីស៊ីអង្គរ ដែលគ្រោងនឹងចុះមកពិនិត្យ និងឱ្យយោបល់នាសប្ដាហ៍ក្រោយ៕
