
សិស្សថ្នាក់ទី១២ នៃវិទ្យាល័យពេជ្រចិន្តា ស្ថិតក្នុងស្រុកភ្នំព្រឹក ខេត្តបាត់ដំបង ចូលរួមក្នុងការរៀបចំពិព័រណ៌ការងារប្រចាំឆ្នាំ២០២៣។ រូបថត វិទ្យាល័យពេជ្រចិន្តា
ភ្នំពេញៈ វិទ្យាល័យពេជ្រចិន្តា ស្ថិតក្នុងស្រុកភ្នំព្រឹក ខេត្តបាត់ដំបង បានរៀបចំពិព័រណ៍ការងារប្រចាំឆ្នាំ ២០២៣ ដែលមានសិស្សថ្នាក់ទី១២ ជាង ៣០០ នាក់បានចូលរួម ដើម្បីទទួលបានព័ត៌មានតម្រង់ទិសច្បាស់លាស់ក្នុងការបន្តការសិក្សា និងចាប់យកឱកាសការងារ។
ពិព័រណ៍ការងារប្រចាំឆ្នាំ២០២៣ ត្រូវបានធ្វើឡើងនៅថ្ងៃទី៨ ខែមិថុនា ឆ្នាំ២០២៣ នៅវិទ្យាល័យពេជ្រចិន្តា ដែលមានសិស្សកំពុងសិក្សាថ្នាក់ទី១២ចំនួន៣៣១នាក់ មកពីវិទ្យាល័យពេជ្រចិន្តា និងវិទ្យាល័យបួរ ខណៈពិព័រណ៍នេះមានការសហការរៀបចំ និងចូលរួមពីអង្គការសង្គមស៊ីវិល អាជ្ញាធរពាក់ព័ន្ធ និងវិស័យឯកជនដែលធ្វើការលើវិស័យអប់រំចំនួន៣១ ស្ថាប័ន។ នេះបើតាមការអះអាងរបស់លោក ប៉ិច ឈឿត នាយកវិទ្យាល័យពេជ្រចិន្តា។
លោក បានប្រាប់ភ្នំពេញប៉ុស្តិ៍នៅថ្ងៃទី៨ មិថុនាថា ពិព័រណ៍នេះ គឺបានរៀបចំឡើងជារៀងរាល់ឆ្នាំតាំងពីឆ្នាំ២០១៧ មកម៉្លេះ ដើម្បីផ្តល់ឱកាសដល់សិស្សដែលកំពុងសិក្សាថ្នាក់ទី១២ ឱ្យទទួលបានព័ត៌មាននានា ក្នុងការបន្តការសិក្សា និងចាប់យកឱកាសការងារច្បាស់លាស់ និងតាមក្តីស្រមៃ។
លោក បានបញ្ជាក់ថា៖«ពិព័រណ៍ បានលេចជារូបរាងឡើង ក្រោយយើងបានបង្កើតកម្មវិធីតម្រង់ទិស ដោយយកគ្រូយើង ទៅធ្វើជាគ្រូបង្គោល ហើយយកគ្រូបង្គោលនេះ មកបណ្តុះបណ្តាលបន្ថែមដល់សិស្សពីថ្នាក់ទី១០ ដល់ថ្នាក់ទី១២។ ពិព័រណ៍ការនេះ គឺគោលបំណងចង់ឱ្យប្អូនៗកំពុងតែរៀនថ្នាក់ទី១២នេះ គាត់ធ្វើការសម្រេចចិត្ត ដោយយល់ថា នៅពេលគាត់រៀនចប់ថ្នាក់ទី១២ ហើយមុននឹងទៅបន្តថ្នាក់មហាវិទ្យាល័យ គាត់ត្រូវដឹងព័ត៌មាន»។
លោក ប៉ិច ឈឿត ថ្លែងថា ស្តង់នៅក្នុងការតាំងបង្ហាញនីមួយៗ គឺបានចូលរួមផ្តល់ព័ត៌មាននានាពាក់ព័ន្ធនឹងវិស័យអប់រំ និងការងារ ដែលអាចផ្តល់ឱកាសឱ្យសិស្សទាំងនោះ បានសាកសួរព័ត៌មាននានាដែលពួកគេចង់ដឹង ដើម្បីធ្វើការសម្រេចចិត្ត មិនថាពាក់ព័ន្ធនឹងបញ្ហាបច្ចេកទេស ការចាប់យកជំនាញក្នុងការសិក្សាបន្ត ឬក៏ជ្រើសរៀនជំនាញបណ្តុះបណ្តាលវិជ្ជាជីវភាពនោះទេ គឺផ្តល់ឱកាសឱ្យពួកគេបានដឹងគ្រប់ជ្រុងជ្រោយ ដែលពីអតីតកាលព័ត៌មានទាំងនោះហាក់មិនសូវទូលាយនោះទេ ជាពិសេសក្នុងតំបន់ដាច់ស្រយាល។
លោក បានបញ្ជាក់ថា៖«នៅពេលដែលសិស្សានុសិស្ស ត្រូវបន្តការសិក្សា នោះគឺមិនមែនចេះតែរៀនតាមគ្នា ឬតាមម៉ែឪបង្ខំនោះទេ គឺគាត់ត្រូវដឹងអំពីចំណេះដឹង ចំណង់ចំណូលចិត្ត និងឧបនិស្ស័យរបស់គាត់ ហើយក្នុងនោះ គឺយើងអញ្ជើញស្ថាប័នរបស់យើងជាច្រើន ដោយមានស្តង់រហូតដល់៣១ ស្តង់(៣១ ស្ថាប័ន) ដើម្បីបង្ហាញពួកគាត់»។
លោក ណម សារឿត ប្រធានកម្មវិធីតំបន់ស្រុកភ្នំព្រឹក ខេត្តបាត់ដំបង នៃអង្គការទស្សនៈពិភពលោក ដែលបានចូលរួមផ្តល់ព័ត៌មានពីការអប់រំក្នុងពិព័រណ៌នេះ បាននិយាយថា ការចូលរួមចំណែកផ្តល់ព័ត៌មានដល់សិស្សនៅក្នុងវិទ្យាល័យនេះជារៀងរាល់ឆ្នាំ ក្រោមការសម្របសម្រួលរបស់វិទ្យាល័យពេជ្រចិន្តា និងអង្គការសម្រេចសុបិនកុមារ។
លោក បានបញ្ជាក់ថា៖«ការចូលរួមរបស់អង្គការទស្សនៈពិភពលោក និងស្ថាប័នដទៃទៀត គឺក្នុងគោលបំណងតម្រង់ទិស និងផ្តល់ព័ត៌មានដល់យុវជននៅក្នុងតំបន់ដាច់ស្រយាល១នេះ ជាពិសេសសិស្សដែលកំពុងសិក្សាថ្នាក់ទី១២ ឱ្យពួកគាត់បានមើលឃើញពីអ្វីដែលពួកគាត់ត្រូវត្រៀមខ្លួន និងធ្វើបន្ត ឱ្យសមនឹងជំនាញ ចំណេះដឹង និងការស្រឡាញ់របស់ខ្លួនក្រោយបញ្ចប់ការសិក្សាថ្នាក់ទី១២»។
យុវតី កែ សៀវម៉ី ជាសិស្សថ្នាក់ទី១២ នៃវិទ្យាល័យពេជ្រចិន្ដា ដែលបានចូលរួមក្នុងពិព័រណ៍នេះជាលើកដំបូង បាននិយាយថា ព័ត៌មានមួយចំនួនដែលរូបគេមិនធ្លាប់បានដឹងពីមុន គឺត្រូវបានបង្ហាញ និងបកស្រាយពីអ្នកជំនាញ និងស្ថាប័នទាំងនោះ ព័ត៌មានជុំវិញការសិក្សា និងការងារ គឺបានផ្តល់ឱ្យរូបគេ និងសិស្សានុសិស្សដទៃអាចធ្វើការសម្រេចចិត្តបានត្រឹមត្រូវ។
កញ្ញា បានបញ្ញាក់ថា៖«វាក៏បានផ្លាស់ប្ដូរផ្នត់គំនិតខ្ញុំជាច្រើនហើយវាបានធ្វើឱ្យខ្ញុំមានការគិត ក៏ដូចជាយល់កាន់តែច្បាស់អំពីរការងារដែរខ្ញុំស្រឡាញ់។ ខ្ញុំចាប់អារម្មណ៍ជំនាញផ្សេងៗ តែអ្វីដែលពិសេសនោះគឺមជ្ឈមណ្ឌលបណ្តុះបណ្តាលឌ្រីម (សាលាខាងចុងភៅ) ក៏ដូចជាបដិសណ្ឋារកិច្ចនៅក្នុងសណ្ឋាគារដោយសារតែការរៀនចំណាយពេលត្រឹមតែ១០ខែ គឺខ្ញុំអាចចេញធ្វើការបានហើយខាងសាលាគេចំណាយឱ្យទាំងអស់មិនថា កន្លែងគេង ចំណីអាហារ និងថ្លៃសាលា គឺយើងចាំតែខំរៀនតែប៉ុណ្ណោះ»។
កញ្ញា សៀវម៉ី ថ្លែងថា៖«ទី២ គឺខ្ញុំមានចំណាប់អារម្មណ៍ទៅលើសាកលវិទ្យាល័យបៀលប្រាយ ដែលក្នុងនោះគឺមហាវិទ្យាល័យនីតិសាស្ត្រ និងសង្គមកិច្ចដែលខ្ញុំបានជ្រើសរើស ដោយសារតែវាជាការស្រឡាញ់របស់ខ្ញុំ១ដែរទៅលើមុខជំនាញរដ្ឋបាលសាធារណៈ ដោយខាងសាលាបានពន្យល់ណែនាំខ្ញុំយ៉ាងក្បោះក្បាយ និងបានប្រាប់ពីមុខវិជ្ជាដែលខ្ញុំត្រូវខំរៀនបន្ថែម ដើម្បីងាយស្រួលក្នុងការចូលរៀនមុខជំនាញនោះផងដែរ»៕