ភ្នំពេញៈ ដោយមានបទពិសោធន៍ក្នុងការដាំដំណាំ និងចិញ្ចឹមសត្វដែលជាការងារទូទៅប្រចាំថ្ងៃ លោក នី ប៊ុនថា និងគ្រួសារបានចងក្រងចំណេះដឹង ក៏ដូចជាបច្ចេកទេសកសិកម្មដ៏មានប្រយោជន៍ទាំងនេះ ជាវីដេអូខ្លីៗដើម្បីបង្ហោះ និងចែករំលែកទៅកាន់អ្នកទស្សនា ពិសេសបងប្អូនកសិករនៅលើគេហទំព័រកសិកម្មឈ្មោះថា «រៀនដាំ»។
លោក នី ប៊ុនថា មានលំនៅ ស្រុកស្រែអំបិល ខេត្តកោះកុង និងជាស្ថាបនិក «រៀនដាំ» បានថ្លែងថា លោកបង្កើតផេច (page) នេះឡើងគឺដើម្បីចែករំលែកចំណេះដឹងមូលដ្ឋានគ្រឹះផ្នែកកសិកម្មចម្រុះ ការចិញ្ចឹមសត្វ និងបទពិសោធន៍ផ្ទាល់ដល់បងប្អូនកសិករថ្មីដែលទើបតែចាប់ផ្ដើមធ្វើកសិកម្មជាដើម។
លោកបញ្ជាក់ថា៖ «គោលបំណងធំនៃការបង្កើតផេច រៀនដាំ នេះគឺដើម្បីចែករំលែកចំណេះដឹងដល់បងប្អូនចង់ចាប់ផ្ដើមដាំ ឬក៏ចំណេះដឹងបទពិសោធន៍ដែលយើងបានអនុវត្ត និងរៀបចំវាឡើង ដើម្បីឱ្យពួកគាត់បានយល់ដឹងពីការដាំដុះ ចិញ្ចឹមសត្វ និយាយរួមគឺចំណេះដឹងកសិកម្ម ដែលជាការងារខ្ញុំអនុវត្តជាប្រចាំ ហើយចង់ចែករំលែកទៅជាប្រយោជន៍ដល់សង្គមតែម្ដង»។
លោកបន្តថា លោកក៏មានសេវាកម្មផ្សេងទៀតដូចជា វគ្គបង្រៀនខ្លីៗតាមអនឡាញរួមមាន វគ្គចិញ្ចឹមមាន់ ការដាំបន្លែលើទឹក ឯការងារដែលធ្វើវីដេអូបង្ហោះលើផេចហ្វេសប៊ុក និងយូធូប គឺដោយសារចិត្តស្រឡាញ់ និងចូលចិត្តថតវីដេអូសកម្មភាពការងារប្រចាំថ្ងៃដែលភាគច្រើនជាការងារកសិកម្ម ហើយក៏មានជាការចែករំលែកផ្នត់គំនិត ប្ដូរផ្លាស់ពីការធ្វើកសិកម្មបែបបុរាណមកចាប់ផ្ដើមអនុវត្តកសិកម្មបែបទំនើបវិញម្ដង។
លោក ថ្លែងថា៖ «ដោយសារតែមានចំណង់ចំណូលចិត្តខាងថត និងកាត់វីដេអូផង មានបទពិសោធន៍ និងការអនុវត្តដាំដំណាំស្រាប់ផង ទើបយើងចង់ផ្សព្វផ្សាយបន្តនូវចំណេះដឹងនិងបច្ចេកទេសកសិកម្មទំនើបទៅដល់បងប្អូនកសិករយើង។ ក្រៅពីការចែករំលែកចំណេះដឹងដោយឥគិតថ្លៃនៅលើហ្វេសប៊ុក និង YouTube «រៀនដាំ» ក៏មានសេវាកម្មបង្រៀនពិសេសជាវីដេអូអំពីការចិញ្ចឹមមាន់ និងដាំដំណាំលើទឹក ដែលមួយវគ្គមានតម្លៃ ៣៥ដុល្លារ ចំណែកចុះឈ្មោះរៀនពីរវគ្គគឺ ៥០ដុល្លារ ដែលការរៀននេះគឺមានការផ្ញើជូននូវវីដេអូតាមតំណភ្ជាប់ ដែលអាចឱ្យកសិករអាចចូលមើលបានគ្រប់ពេល ហើយក៏មានការប្រឹក្សាយោបល់នៅពេលមានបញ្ហាផងដែរ»។
លោក នី ប៊ុនថា ថ្លែងថា លោកបានចាប់ផ្ដើមបង្កើតផេច រៀនដាំ និងផលិតវីដេអូនេះឆ្នាំ២០១៨ ដោយបានសម្រេចចិត្តដាក់ឈ្មោះថា រៀនដាំ ដោយសារវាជាពាក្យសាមញ្ញ ខ្លី ងាយយល់ គ្រាន់តែឮថា រៀនដាំ គេក៏អាចយល់ដឹងថា វាជាផេកកសិកម្ម ចែករំលែកចំណេះដឹងផ្នែកកសិកម្មពិសេសការដាំដំណាំចម្រុះជុំវិញផ្ទះ។
លោកថ្លែងថា៖ «តាមរយៈការចែករំលែករបស់យើងមិនអាចឱ្យអ្នកដាំទទួលបានជោគជ័យ១០០ភាគរយនោះទេ តែវាជាមូលដ្ឋានគ្រឹះមួយសម្រាប់កសិករ ឬស្ត្រីមេផ្ទះដែលចង់ដំណាំជុំវិញផ្ទះឱ្យបានដឹងពីការដាំដុះ ការជ្រើសរើសពូជ ឬការរៀបចំដី ដែលជាផ្នែកសំខាន់ៗដែលគួរយល់ដឹងមុនពេលយកទៅអនុវត្តផ្ទាល់»។
ដោយឡែក បងប្អូនកសិករដែលតែងតែគាំទ្រ និងចែករំលែកបន្តនូវមាតិការបស់ រៀនដាំ គឺមាននៅស្ទើរគ្រប់ខេត្តរួមមានដូចជា តាកែវ បាត់ដំបង បន្ទាយមានជ័យ ថែមទាំងបងប្អូនពលករនៅប្រទេសជិតខាងមានវ័យចន្លោះពី ១៨-៣៤ ឆ្នាំផងដែរ។ នេះជាអ្វីដែលអ្នកបង្កើតមាតិការូបនេះបានលើកឡើង។
លោក នី ប៊ុនថា ថ្លែងដោយមានចក្ខុវិស័យវែងឆ្ងាយថា ក្នុងការបន្តការងារនេះទៅមុខទៀតដើម្បីចែករំលែកចំណេះដឹង បទពិសោធន៍ដែលលោកមាន ក៏ដូចជាផលិតនូវមាតិកាផ្នែកកសិកម្មឱ្យបានកាន់តែច្រើន និងទូលំទូលាយដូចនៅប្រទេសដទៃទៀតដែរ ពិសេសវាក៏ជាផ្នែកមួយជួយអភិវឌ្ឍវិស័យកសិកម្មឱ្យកាន់តែប្រសើរឡើងបានមួយកម្រិតទៀត។
ចុងក្រោយ លោកក៏សូមលើកទឹកចិត្តឱ្យអ្នកដែលមានចំណេះជំនាញផ្នែកកសិកម្ម ឬផ្នែកផ្សេងៗទៀតបន្តចែករំលែកឱ្យបានកាន់តែទូលំទូលាយ ចៀសវាងការលាក់ទុកតែម្នាក់ឯង តែត្រូវចែករំលែកផ្លាស់ប្ដូរបទពិសោធន៍ និងផ្នត់គំនិតធ្វើយ៉ាងណា ស្វែងយល់បន្ថែមទៀតដើម្បីអភិវឌ្ឍខ្លួន និងវិស័យកសិកម្មឱ្យកាន់តែប្រសើរទៅមុខ៕
នី ស្រីពៅ