សៀមរាបៈ អាជ្ញាធរ​ជាតិ​អប្សរា និងក្រសួង​ការបរទេស និង​ពាណិជ្ជកម្ម​ក្រៅប្រទេស​របស់នូវែលសេឡង់​បានចុះហត្ថលេខា​លើអនុស្សរណៈ​នៃការយោគយល់គ្នា​លើភាព​ជាដៃគូ​អំពី​គម្រោង​គ្រប់គ្រង​ទឹក​ក្នុង​រមណីយដ្ឋាន​អង្គរ​ដោយ​ប្រសិទ្ធភាព និងចីរភាព​ដើម្បី​ភាពធន់នឹង​ការប្រែប្រួល​អាកាសធាតុ និង​សង្គម-សេដ្ឋកិច្ច​នាថ្ងៃ​ទី៩ខែ​មិថុនា​នេះ។

ការចុះអនុស្សរណៈ​នៃការយោគយល់គ្នា​នេះត្រូវបាន​ធ្វើឡើង​រវាង​លោក ហង់ ពៅ អគ្គនាយក​អាជ្ញាធរ​ជាតិ​អប្សរា និង​លោក Jonathan KINGS ឯកអគ្គ​រដ្ឋទូត​នៃប្រទេស​នូវែលសេឡង់​ប្រចាំ​កម្ពុជា ក្រោម​អធិបតីភាព​លោកស្រី​ ភឿង សកុណា រដ្ឋមន្ត្រី​ក្រសួង​វប្បធម៌ និងវិចិត្រសិល្បៈ និង​ជាប្រធាន​ក្រុមប្រឹក្សាភិបាល​នៃអាជ្ញាធរ​ជាតិ​អប្សរា។

យោងតាម​អាជ្ញាធរ​ជាតិ​អប្សរា​បានឱ្យដឹង​ថា គម្រោង​គ្រប់គ្រង​ទឹក​ក្នុង​រមណីយដ្ឋាន​អង្គរ​ដោយមាន​ប្រសិទ្ធភាព និង​ចីរភាព ដើម្បី​ភាពធន់ និងការប្រែប្រួល​អាកាសធាតុ និងសង្គម-សេដ្ឋកិច្ច​នេះ នឹងផ្អែក​លើ​រយៈពេល​នៃការអនុវត្ត​រយៈពេល ៥ ឆ្នាំ ដែលចាប់ពី​ឆ្នាំ២០២៣​ដល់​ឆ្នាំ២០២៨។ អាជ្ញាធរ​ជាតិ​អប្សរា បានចាត់ទុក​ថា គម្រោង​នេះ ពិតជា​មានសារប្រយោជន៍​យ៉ាងខ្លាំង​សម្រាប់​ជួយឱ្យ​ការគ្រប់គ្រង​ប្រព័ន្ធធារាសាស្រ្ត​សម័យបុរាណ​កាន់តែ​មាន​ប្រសិទ្ធភាព​ដើម្បី​បញ្ចៀស​ទឹក​ជំនន់​នៅក្នុង​តំបន់​សៀមរាប-អង្គរ ការទាញ​អត្ថប្រយោជន៍​ពីធនធាន​ធម្មជាតិ​ដើម្បី​អភិវឌ្ឍន៍​សហគមន៍ និងការកសាង​សមត្ថភាព​ធនធាន​មនុស្ស​ជាដើម។

គម្រោង​គ្រប់គ្រង​ទឹក​ក្នុង​រមណីយដ្ឋាន​អង្គរ​ដោយមាន​ប្រសិទ្ធភាព និងចីរភាព ដើម្បី​ភាពធន់ និង​ការប្រែប្រួល​អាកាសធាតុ និងសង្គម-សេដ្ឋកិច្ច ជាគម្រោង​ទី៤​ហើយ​ដែលប្រទេស​នូវែលសេឡង់​បានសហការ​រួមគ្នា​ជាមួយ​អាជ្ញាធរ​ជាតិ​អប្សរា។ ក្នុងនោះ​ត្រូវបាន​អនុវត្ត​ជាបន្តបន្ទាប់​មានដូចជា​៖ ទី១ គម្រោង​រៀបចំ​ផែនការ​គ្រប់គ្រង​រមណីយដ្ឋាន​អង្គរ (Angkor Management Plan) ទី២ គម្រោង​កម្មវិធី​គ្រប់គ្រង​ធនធាន​ធម្មជាតិ​ក្នុង​តំបន់​អង្គរ ដោយមាន​ការចូលរួម​ពី​សហគមន៍ (Angkor Participatory Natural Resource Management & Livelihoods) ហៅកាត់​ថា APNRM&L និងទី៣ គម្រោង​អភិវឌ្ឍន៍​សេដ្ឋកិច្ច​សហគមន៍ និង​បេតិកភណ្ឌ​អង្គ (Angkor Community Heritage and Economic Advancement) ដែល​ហៅកាត់​ថា ACHA៕