កណ្តាលៈ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងថា រាជរដ្ឋាភិបាលបាននិងកំពុងយកចិត្តទុកដាក់លើការអភិវឌ្ឍហេដ្ឋារចនាសម្ព័ន្ធទាំងថ្នាក់ជាតិ និងថ្នាក់ក្រោមជាតិ ដែលធ្វើឱ្យសេដ្ឋកិច្ចនៅតាមូលដ្ឋានកាន់តែមានសក្តានុពល និយាយជារួម និងនិយាយដោយឡែក ជួយឱ្យការប្រកបមុខរបរចិញ្ចឹមជីវិតរបស់ប្រជាពលរដ្ឋកាន់តែមានការរីកចម្រើន។
ការលើកឡើងដូចនេះធ្វើឡើងក្នុងពិធីបើកការដ្ឋានសាងសង់ស្ពានបេតុងសរសៃដែក ប្រវែង ៧២ ម៉ែត្រ ទទឹង ៦,៦០ ម៉ែត្រ ស្ថិតនៅភូមិទួលស្លែង ឃុំលើកដែក ស្រុកកោះធំ ខេត្តកណ្តាល ដោយមានការចូលរួមពីក្រុមការងាររាជរដ្ឋាភិបាលចុះមូលដ្ឋានស្រុកកោះធំ មន្ត្រីពាក់ព័ន្ធ និងប្រជាពលរដ្ឋសរុបប្រមាណ ៥០០ នាក់នៅថ្ងៃទី ៨ ខែមិថុនា ឆ្នាំ ២០២៣។
ថ្លែងក្នុងមតិសំណេះសំណាលនាឱកាសនោះលោក ស៊ុន ចាន់ថុល បានជម្រាបជូនពីសមិទ្ធផលសំខាន់ៗដែលរាជរដ្ឋាភិបាល បានខិតខំប្រឹងប្រែងអភិវឌ្ឍលើគ្រប់វិស័យ ពិសេសផ្នែកហេដ្ឋារចនាសម្ព័ន្ធរូបវន្តនៅក្នុងស្រុកកោះធំ ដែលបានធ្វើឱ្យស្រុកនេះបានកែប្រែមុខមាត់ប្រកបដោយមោទនភាព។
បន្ថែមពីលើនេះលោក បានបង្ហាញពីសមិទ្ធផលថ្មីមួយក្នុងចំណោមសមិទ្ធផលដទៃទៀត នៃកិច្ចខិតខំរបស់រាជរដ្ឋាភិបាល សម្រាប់ស្រុកកោះធំនោះគឺ “មន្ទីរពេទ្យតេជោសែនកោះធំ” ដែលជាមន្ទីរពេទ្យទំនើបថ្មីមួយ ដែលបច្ចុប្បន្នបានសម្រេចការសាងសង់ប្រមាណជាង ៩៥% និងត្រៀមបើកឱ្យដំណើរការក្នុងពេលឆាប់ៗខាងមុខនេះ។
លោក ស៊ុន ចាន់ថុល បញ្ជាក់ថា៖ «ក្រៅពីផ្លូវសេដ្ឋកិច្ចសំខាន់ៗរាជរដ្ឋាភិបាលក៏បានបន្តយកចិត្តទុកដាក់ លើការអភិវឌ្ឍហេដ្ឋារចនាសម្ព័ន្ធដទៃទៀតយ៉ាងច្រើនរួមមានស្ពានឆ្លងទន្លេបាសាក់ (ស្ពានមិត្តភាពកម្ពុជា-ចិន) កីឡដ្ឋានស្រុកកោះធំ និងអាងហែលទឹក ផ្លូវបេតុងតាមបណ្ដាឃុំនានាក្នុងស្រុក ស្ពាន ប្រឡាយទឹក មណ្ឌលសុខភាព វត្តអារាម ព្រមទាំងមានភ្លើងសូឡាបំភ្លឺសងខាងផ្លូវក្នុងឃុំ នៃស្រុកកោះធំផងដែរ»។
លោកបន្ថែមថា ប្រព័ន្ធហេដ្ឋារចនាសម្ព័ន្ធខ្វាត់ខ្វែងក្នុងស្រុកកោះធំ បានធ្វើឱ្យស្រុកដែលមានព្រំប្រទល់ជាប់ប្រទេសវៀតណាមមួយនេះកាន់តែមានសក្តានុពលផ្នែកសេដ្ឋកិច្ច ដែលអំណោយផលដល់ការរស់នៅ និងការប្រកបមុខរបរចិញ្ចឹមជីវិតរបស់ពលរដ្ឋ។ ផ្លូវសេដ្ឋកិច្ចសំខាន់ៗក្នុងស្រុកកោះធំមានដូចជា ផ្លូវជាតិលេខ ២១ ផ្លូវលេខ ១១០ ផ្លូវលេខ ១២៩ និងផ្លូវជាតិលេខ ២៣ (ចាប់ពីផ្លូវលេខ ១១០ សង្កាត់ជ្រោយតាកែវ ទៅស្រុកលើកដែក ប្រវែង ១៩,៨៣ គ.ម) ដែលគ្រោងនឹងបើកការដ្ឋាននាពេលឆាប់ៗនេះ។
ពាក់ព័ន្ធហេដ្ឋារចនាសម្ព័ន្ធនេះលោកនាយករដ្ឋមន្ត្រី ហ៊ុន សែន កាលពីចុងឆ្នាំ ២០២២ បានថ្លែងថា ការកសាងហេដ្ឋារចនាសម្ព័ន្ធប្រកបដោយគុណភាព ទាំងផ្លូវថ្នល់ និងស្ពានជាច្រើនខ្សែបន្ថែមទៀតរួមទាំងផ្លូវល្បឿនលឿន គឺដើម្បីបម្រើឱ្យការអភិវឌ្ឍសេដ្ឋកិច្ចសង្គម។
លោកថា៖ «រាជរដ្ឋាភិបាលក៏នៅតែបន្តចាត់ទុកនិងផ្តល់អាទិភាពដល់ការអភិវឌ្ឍហេដ្ឋារចនាសម្ព័ន្ធប្រកបដោយគុណភាព។ ដោះស្រាយបញ្ហានេះបានយើងកាត់បន្ថយការលំបាករបស់ប្រជាជន ហើយកាត់បន្ថយការលំបាកនោះហើយចង់សំដៅថា កាត់បន្ថយភាពក្រីក្រក្នុងចំណោមប្រជាជន និងបង្កើនប្រាក់ចំណូលសម្រាប់ប្រជាជនរបស់យើង»។
ឆ្លៀតក្នុងឱកាសនោះដែរលោក ស៊ុន ចាន់ថុល បានជម្រាបជូនពីវឌ្ឍនភាព នៃការអភិវឌ្ឍវិស័យហេដ្ឋានរចនាសម្ព័ន្ធធំៗក្នុងប្រទេសរួមមានផ្លូវល្បឿនលឿនភ្នំពេញ-ក្រុងព្រះសីហនុ ដែលជាគម្រោងផ្លូវល្បឿនលឿនប្រវត្តិសាស្ត្រលើកដំបូងក្នុងប្រទេសកម្ពុជា។
គម្រោងផ្លូវល្បឿនលឿនភ្នំពេញ-បាវិត ដែលបានបើកការដ្ឋានកាលពីព្រឹកថ្ងៃទី ៧ ខែមិថុនា គម្រោងសិក្សាផ្លូវល្បឿនលឿនភ្នំពេញ-សៀមរាប-ប៉ោយប៉ែត ដែលក្រសួងសាធារណការ និងដឹកជញ្ជូនបានចុះហត្ថលេខាលើកិច្ចព្រមព្រៀងក្របខ័ណ្ឌ ជាមួយក្រុមហ៊ុនសាជីវកម្មស្ពាន និងថ្នល់ចិន (CRBC) កាលពីរសៀលថ្ងៃទី ៧ ខែមិថុនា ឆ្នាំ ២០២៣៕