​ភ្នំពេញៈ លោក ​ឡុង ឌី​ម៉​ង់ អភិបាលរង​ខេត្ត​ព្រះសីហនុ បាន​សំណូមពរ​លោក​ សាយ សំ​អាល់ រដ្ឋមន្ត្រី​ក្រសួងបរិស្ថាន ពិចារណា​លើ​ការធ្វើ​និរាករណ៍​គម្រោង​វិនិយោគ​ដែល​ទទួលបាន​គោលការណ៍​អនុញ្ញាតឱ្យ​អភិវឌ្ឍ​ទេសចរណ៍​ផ្សារភ្ជាប់​នឹង​ធម្មជាតិ តែ​មិនមាន​សកម្មភាព ដើម្បី​យក​ទីតាំង​ដែលមាន​សក្តានុពល​ទាំងអស់​ត្រឡប់មកវិញ ទុក​ជូន​ក្រុមហ៊ុន ឬ​វិនិយោគិន​ដែលមាន​លទ្ធភាព​គ្រប់គ្រាន់​ក្នុងការ​អភិវឌ្ឍ​ប្រកបដោយ​មេត្រីភាព​បរិស្ថាន ក្នុង​គោលដៅ​ចូលរួម​លើកកម្ពស់​សេដ្ឋកិច្ច​មូលដ្ឋាន និង​ធ្វើ​ពិពិធ​កម្ម​វិនិយោគិន​នៅក្នុង​ខេត្ត​។​

​យោងតាម​រដ្ឋបាលខេត្ត​ព្រះសីហនុ លោក ឡុង ឌី​ម៉​ង់ បាន​សំណូមពរ​បែបនេះ ខណៈ​លោកបាន​អញ្ជើញ​ចូលរួម​កិច្ចប្រជុំ ពិនិត្យ​តាមដាន និង​វាយតម្លៃ លើ​ការអនុវត្ត​គម្រោង​អភិវឌ្ឍន៍​ទេសចរណ៍​ផ្សារភ្ជាប់​និង​ធម្មជាតិ​ខ្នាតតូច ទំហំ​ក្រោម ​១០ ​ហិកតា ក្នុង​តំបន់ការពារធម្មជាតិ និង​របៀង​អភិរក្ស​ជីវៈចម្រុះ ក្រោម​អធិបតីភាព​លោក សាយ សំ​អាល់ នៅ​ទីស្តីការ​ក្រសួងបរិស្ថាន កាលពី​ថ្ងៃទី​ ៨ ​មិថុនា​។​

​កិច្ចប្រជុំ​នេះ​បានរៀបចំ​ក្នុង​គោលបំណង​ពិភាក្សា​អំពី​បញ្ហា​ប្រឈម និង​ប្រមូល​ធាតុ​ចូល​នានា​ចូល​ពី​ក្រុមហ៊ុន និង​ម្ចាស់​គម្រោង​ដែល​ទទួលបាន​គោលការណ៍​អនុញ្ញាត​ពី​រាជរដ្ឋាភិបាល តែ​មិនទាន់មាន​សកម្មភាព​អភិវឌ្ឍ ឬ​ការអភិវឌ្ឍ​មាន​ភាពយឺតយ៉ាវ​។​

​ថ្លែង​ទៅកាន់​អ្នកចូលរួម​កិច្ចប្រជុំ លោក​រដ្ឋមន្ត្រី​បរិស្ថានបាន​គូសបញ្ជាក់ថា ការងារ​គ្រប់គ្រង​តំបន់ការពារធម្មជាតិ គឺ​ដើម្បី​បំពេញ​នូវ​តម្រូវការ​របស់​ប្រជាជន និង​ឧ​ត្ត​ម​ប្រយោជន៍​សេដ្ឋកិច្ច​របស់​ប្រទេសជាតិ ដែល​តំបន់ការពារធម្មជាតិ​ទាំងអស់ គឺជា​សសរកន្លោង​ទ្រទ្រង់​ជីវភាព​ប្រជាពលរដ្ឋ​មូលដ្ឋាន​។

​លោក​ សាយ សំ​អាល់ លើកឡើងថា ការការពារ និង​អភិរក្ស​ធនធានធម្មជាតិ គឺ​បង្កើន​ជម្រើស​មុខរបរ​ឱ្យ​សហគមន៍​មានឱកាស​គិតគូរ​ពី​ប្រភព​ចំណូល​ផ្សេង ក្រៅពី​ការពឹង​ផ្អែកលើ​ធនធានធម្មជាតិ ដូច​ជាការ​ចិញ្ចឹមសត្វ ដាំ​ដុះ​ដំណាំ​ជុំវិញ​ផ្ទះ ដើម្បី​ធានាបាន​នូវ​សន្តិសុខ​ស្បៀង​សម្រាប់​គ្រួសារ និង​សហគមន៍​។ នេះ​បើ​យោងតាម​ក្រសួងបរិស្ថាន​៕​