ក្រសួងវិទ្យាសាស្ត្រនិងបច្ចេកវិទ្យាគមនាគមន៍កូរ៉េ មានបំណងសហការជាមួយក្រុមហ៊ុនបច្ចេកវិទ្យាឌីជីថលនៅកម្ពុជា។ រូបថត ក្រសួងប្រៃសណីយ៍និងទូរគមនាគមន៍
ក្រសួងវិទ្យាសាស្ត្រនិងបច្ចេកវិទ្យាគមនាគមន៍ និងព័ត៌មាននៃសាធារណរដ្ឋកូរ៉េ បានបង្ហាញពីគោលបំណងក្នុងការជំរុញកិច្ចសហការជាមួយក្រុមហ៊ុនបច្ចេកវិទ្យាឌីជីថលកូរ៉េ និងកម្ពុជា ដើម្បីជួយជំរុញដល់ការគាំទ្រធុរកិច្ច និងអភិវឌ្ឍន៍វិស័យឌីជីថលនៅក្នុងព្រះរាជាណាចក្រកម្ពុជា។
ការបង្ហើបពីគោលបំណងរបស់ភាគីកូរ៉េ បានធ្វើនៅក្នុងជំនួបរវាងលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ (ក.ប.ទ.) និងលោក Kim Jongkap អគ្គនាយកមជ្ឈមណ្ឌលគាំទ្រធុរកិច្ចថ្មីឌីជីថល (Born2Global) នៃក្រសួងវិទ្យាសាស្ត្រនិងបច្ចេកវិទ្យាគមនាគមន៍និងព័ត៌មាននៃសាធារណរដ្ឋកូរ៉េ (MSIT) ជួបសម្ដែងការគួរសម និងពិភាក្សាការងារ កាលពីថ្ងៃទី ៨ខែមិថុនា ឆ្នាំ ២០២៣។ នេះបើយោងតាមការចុះផ្សាយរបស់ក្រសួងប្រៃសណីយ៍និងទូរគមនាគមន៍ នៅថ្ងៃទី ១០ខែមិថុនានេះ។
ប្រភពខាងលើបានឱ្យដឹងថា ក្នុងជំនួបនោះ លោក Kim Jongkap បានថ្លែងអំណរគុណលោករដ្ឋមន្ត្រីដែលបានអនុញ្ញាតឱ្យក្រុមការងារមជ្ឈមណ្ឌល Born2Global ស្វែងយល់កាន់តែច្បាស់អំពីសន្ទុះរីកចម្រើននៃធុរកិច្ចថ្មីឌីជីថលនៅកម្ពុជា និងបានលើកឡើងអំពីគោលបំណងក្នុងការជំរុញកិច្ចសហការរវាងក្រុមហ៊ុនបច្ចេកវិទ្យាឌីជីថលកូរ៉េនិងធុរកិច្ចថ្មីនិងក្រុមហ៊ុនបច្ចេកវិទ្យាឌីជីថលនៅកម្ពុជា។
ជាមួយគ្នានោះលោក ជា វ៉ាន់ដេត បានជម្រាបជូនភ្ញៀវអំពីការងារ និងសមិទ្ធផលសំខាន់ៗដែលក្រសួងសម្រេចបាន ការលើកកម្ពស់ការចាប់យកបច្ចេកវិទ្យាតាមរយៈដាក់ចេញនូវគំនិតផ្តួចផ្តើមជាច្រើន ការបង្កើតមជ្ឈមណ្ឌលបច្ចេកវិទ្យាសហគមន៍ ការដាក់ចេញកម្មវិធីប្រកួតប្រជែងពានរង្វាន់ឌីជីថលកម្ពុជាប្រចាំឆ្នាំជាដើម។
លោករដ្ឋមន្រ្តី ជា វ៉ាន់ដេត ក៏បានថ្លែងអំណរគុណចំពោះស្មារតីសហការរបស់ភាគីកូរ៉េ និងរំពឹងថាកិច្ចសហការរវាងស្ថាប័នទាំងពីរនឹងជួយជំរុញដល់ការគាំទ្រធុរកិច្ច និងអភិវឌ្ឍវិស័យឌីជីថលនៅក្នុងព្រះរាជាណាចក្រកម្ពុជា៕
.jpg)
