មន្ត្រីឧទ្យានុរក្សប្រទះដានជើង និងលាមកសត្វដំរីអាស៊ីចំនួន ៤ ក្បាល នៅដែនជម្រកសត្វព្រៃលំផាត់។ រូបថត អង្គការជីវិតសត្វស្លាបអន្តរជាតិ
រតនគិរីៈ មន្ត្រីឧទ្យានុរក្សប្រចាំស្នាក់ការអូរវាក់ភូមិសាស្ត្រខេត្តមណ្ឌលគិរី បានជួបប្រទះ ដានជើង និងលាមកសត្វដំរីអាស៊ីចំនួន ៤ ក្បាល នៅម្ដុំព្រៃចាស់ (ព្រៃស្រោង) នៃដែនជម្រកសត្វព្រៃ លំផាត់ភូមិសាស្ត្រ ខេត្តមណ្ឌលគិរី ក្នុងអំឡុងពេលល្បាតព្រៃ ហើយនេះគឺជាកំណត់ត្រាលើកទីមួយ នៃសត្វដំរី នៅក្នុងដែនជម្រកសត្វព្រៃលំផាត់ សម្រាប់រយៈពេល ១០ ឆ្នាំចុងក្រោយ។
តាមរបាយការណ៍ពីប្រជាពលរដ្ឋ រស់នៅក្នុងភូមិតូនកូនវ៉ា ពួកគាត់បានជួបប្រទះសត្វដំរីអាស៊ីខាងលើនេះនៅស្រែក្បែរភូមិរបស់គាត់ កាលពីថ្ងៃទី២៨ ខែឧសភា ឆ្នាំ២០២៣ ផងដែរ។ តាមការសន្និដ្ឋានរបស់មន្ត្រីឧទ្យានុរក្សខាងលើ ហ្វូងដំរីនេះ ប្រហែលផ្លាស់ទីពីដែនជម្រកសត្វព្រៃដែលមានភូមិសាស្ត្រស្ថិតនៅក្បែរៗនេះ ក្រុមការងារយើងនិងបន្តតាមដាននិងស្វែងយល់ ពីការបំលាស់ទីរបស់ពួកវា។
ក្រោមការគាំទ្រពីអង្គការជីវិតសត្វស្លាបអន្តរជាតិ និង USAID Morodok Baitang-មរតកបៃតង ដែនជម្រក សត្វព្រៃលំផាត់គឺជាទីតាំងដែលអង្គការជីវិតធម្មជាតិនៅកម្ពុជា និងក្រសួងបរិស្ថានកំពុងដំណើរការអនុវត្តគម្រោងឥណទានកាបូន ក្នុងគោលបំណងការពារព្រៃឈើ សត្វព្រៃនិងជីវ:ចម្រុះព្រមទាំងលើកកម្ពស់ជីវភាពរបស់សហគមន៍មូលដ្ឋាន៕
.jpg)
