កសិករ គង់ វ៉ុង និងផលដំណាំដែលទទួលបាន។ រូបថត Kong Vong FB
តាកែវៈ ការធ្វើកសិកម្មដំណាំស្រូវឬដំណាំបន្លែផ្សេងៗមានកសិករខ្លះទទួលបានជោគជ័យហើយកសិករខ្លះក៏មិនសូវទទួលបានជោគជ័យ។ ប៉ុន្តែបុរសកសិករ ១ រូបបានធ្វើស្រែលើផ្ទៃដីជាង ៦ ហិកតា ហើយក្នុង ១ ឆ្នាំធ្វើបានរហូត ៣ ដង ដែលការប្រមូលផលម្ដងៗចំណេញបានប្រាក់ចន្លោះពី ១២ ទៅ ១៥ លានរៀល។ ដោយសារជោគជ័យក្នុងការងារកសិកម្មនេះ លោកក៏ធ្លាប់ត្រូវបានក្រសួងកសិកម្មជ្រើសរើសជាកសិករឆ្នើមជាប់ចំណាត់ថ្នាក់លេខ ២ នៅទូទាំងប្រទេសទៀតផង។
«ការធ្វើកសិកម្ម គឺយើងត្រូវសង្កេតមើលទីផ្សារ ហើយយើងដឹងពីតម្រូវការរបស់យើង។បន្ទាប់ពីស្វែងយល់យើងយកមកច្នៃតាមភាពជាក់ស្តែងថា តើស្រូវដែលយើងដាំកំពុងខ្វះអី ហើយវាត្រូវការអីខ្លះបន្ថែមទៀត»។ នេះជាការលើកឡើងរបស់លោក គង់ វ៉ុង អាយុ ៥៦ ឆ្នាំ រស់នៅភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ។
លោក គង់ វ៉ុង បានរៀបរាប់ប្រាប់ ភ្នំពេញ ប៉ុស្តិ៍ថា ជារៀងរាល់ឆ្នាំលោកធ្វើស្រែលើផ្ទៃដីជាង ៦ ហិកតាជាពូជស្រូវ [OM]54.51 ដែលជាប្រភេទស្រូវមានដើមទាប ហើយក្នុង ១ ឆ្នាំៗលោកធ្វើស្រូវបាន ៣ ដង ដោយក្នុងដី ១ ហិកតាបានផលពី ៥ តោនកន្លះទៅ ៦ តោននិងលក់បានប្រាក់ចំណូលប្រមាណ ៣៦ លានរៀល (ទាំង ៦ ហិកតា) ហើយទទួលបានប្រាក់ចំណេញម្ដងៗចន្លោះពី ១២ ទៅ ១៥ លានរៀល ដោយសារឆ្នាំនេះតម្លៃស្រូវលក់បានថ្លៃគួរសម [ចន្លោះពី ៧៥០ ទៅ ១ ០០០ រៀល/គីឡូ] ហើយបើគិតពេញ ១ ឆ្នាំវិញ លោកលក់បានចំណូល ១០៨ លានរៀល ឯប្រាក់ចំណេញក៏កើនទៅតាមនោះដែរ។ ក្រៅពីរបរធ្វើស្រែលោកក៏ធ្វើកសិកម្មដាំបន្លែលើផ្ទៃដី ១ ហិកតាកន្លះផងដែរ។
លោកបានបន្តថា ដោយសារតែដំណាំរបស់លោកត្រូវប្រមូលផលអស់ ដូច្នេះបច្ចុប្បន្ននេះលោកកំពុងភ្ជួររាស់ដី ១ ហិកតានៅទីតាំងដដែល [ដាំលើកទី២] ដើម្បីដាំបន្លែជាថ្មីម្ដងទៀត។ចំពោះបន្លែដែលលោកដាំជាប្រភេទបន្លែសុវត្ថិភាពមានស្ពៃចម្រុះ បន្លែត្រសក់ សណ្តែកកួរ ក្នុងនោះដំណាំត្រសក់លោកដាំច្រើនជាងគេ ហើយមានថ្ងៃខ្លះលោកអាចប្រមូលផលបានរហូត ៣ តោន។
លោកបានប្រាប់ថា ការធ្វើកសិកម្មនេះក៏វាអាស្រ័យលើតំបន់ដែលមានប្រភពទឹកគ្រប់គ្រាន់ដែរ រីឯនៅតំបន់ដីស្រែចម្ការរបស់លោកក៏មានបឹង អូរ មានព្រែក ជាប្រភពទឹកដែរ តែបើពេលណាខ្វះទឹកលោកបានប្រើទឹកអណ្តូងដើម្បីទាញយកទឹកស្រោចស្រពដំណាំនិងស្រូវរបស់លោកបន្ថែម។
ដោយសារធ្លាប់មានបទពិសោធន៍ក្នុងការធ្វើកសិកម្មផងនោះលោក គង់ វ៉ុង បានពន្យល់ថា ការដាំដំណាំឬការធ្វើស្រែគឺកសិករតែងតែប្រាថ្នាចង់បានផលត្រឡប់មកវិញពីរបររបស់ខ្លួនសូម្បីតែលោកក៏ដូចគ្នាដែរ។ហេតុដូច្នេះហើយដើម្បីរំពឹងនឹងទទួលបានផលគាប់ចិត្តគឺលោកត្រូវមើលស្ថានភាពទីផ្សារ ហើយគិតអំពីតម្រូវការរបស់លោកបន្ទាប់មកយកមកច្នៃតាមភាពជាក់ស្តែងនិងត្រូវសង្កេតមើលថា តើស្រូវដែលលោកកំពុងដាំដុះនោះនៅខ្វះអ្វី ហើយក្នុងដំណាក់កាលហ្នឹងស្រូវវាត្រូវការអី? ព្រោះថាដំណាំស្រូវវាមិនមែនត្រូវការជីដដែលៗទេ។
លោកបានបញ្ជាក់ថា៖ «យើងអ្នកដាំយើងដឹងច្បាស់ថា ដំណាក់កាលណាវាត្រូវការជីប្រភេទអ្វី?ហើយពេលខ្លះយើងប្រើជីនោះធ្វើឱ្យស្រូវមានបញ្ហាក៏ត្រូវកាត់បន្ថយជីឬផ្លាស់ប្តូរប្រភេទជី ឬដាក់ជីអ្វីដើម្បីឱ្យស្រូវយើងរឹងមាំ»។
លោកបានឱ្យដឹងថា ការធ្វើស្រែនិងចម្ការរបស់លោកមិនដែលជួបបញ្ហាខាតដើមឬក៏ដាំមិនបានទេ ផ្ទុយទៅវិញមានតែចំណេញ។ សម្រាប់បច្ចេកទេសនៃការធ្វើកសិកម្មគឺលោកបានសិក្សារៀនសូត្រពីមន្ទីរកសិកម្មរុក្ខាប្រមាញ់ និងនេសាទខេត្តតាកែវរួមនឹងទទួលបានការបណ្តុះបណ្តាលពីអង្គការផ្សេងៗដែលធ្វើការលើវិស័យកសិកម្ម។ដោយសារតែលោកធ្វើស្រែចម្ការតាមស្តងដាបច្ចេកទេសកសិកម្មនេះហើយទើបអតីតរដ្ឋមន្ត្រីក្រសួងកសិកម្មលោក វេង សាខុន ធ្លាប់ចុះទស្សនកិច្ចនៅចម្ការដំណាំ និងពិនិត្យមើលស្រូវរបស់លោកចំនួន ២ ដងដែរ។
លោកបញ្ជាក់ថា បន្ទាប់មកនៅក្នុងអំឡុងឆ្នាំ ២០១៨ ខាងក្រសួងកសិកម្មរុក្ខាប្រមាញ់ និងនេសាទបានជ្រើសរើសលោកឱ្យជាប់ចំណាត់ថ្នាក់លេខ ២ ជាកសិករគំរូផ្នែកដាំដំណាំបន្លែ ហើយត្រូវធ្វើបទបង្ហាញជាក់ស្តែងដើម្បីបញ្ជាក់ពីសមត្ថភាព។ ចំណែកអ្នកជាប់លេខ ១ គឺបុរសកសិករម្នាក់នៅខេត្តបាត់ដំបង។
ម្យ៉ាងវិញទៀត ដោយសារលោកមានបទពិសោធនបែបនេះហើយ ទើបអង្គការវ៉ុលវីហ្សុនអញ្ជើញលោកទៅធ្វើបទបង្ហាញនៅក្រសួងអភិវឌ្ឍន៍ជនបទ និងធ្លាប់ទៅធ្វើបទបង្ហាញនៅសាលាបណ្តុះបណ្តាលមិត្តភាពកម្ពុជា-កូរ៉េជាដើម។
ដោយសារធ្លាប់ជាកសិករឆ្នើមផងនោះ លោក គង់ វ៉ុង មានបំណងឱ្យកសិករកុំធ្វើកសិកម្មដើម្បីតែប្រាក់មួយមុខគឺត្រូវយកចិត្តទុកដាក់លើជោគជ័យនៃការផលិតជាមុនសិន។ ប៉ុន្តែបើដាំដុះគិតតែជ្រួលជ្រើមមិននឹងនរចិត្ត នោះនឹងធ្វើឱ្យការងាររបស់គាត់អាចខូច។សម្រាប់ទីផ្សារសេរីបើកសិករមិនខ្នះខ្នែងប្រឹងរកដោយខ្លួនឯង ចាំរំពឹងតែគេរកទីផ្សារឱ្យក៏ទៅមិនរួចដែរ។
ពាក់ព័ន្ធនឹងជោគជ័យលើផ្នែកកសិកម្មរបស់ លោក គង់ វ៉ុង នេះ លោកស្រីប៊ុន គឹមលាង មេឃុំចំប៉ា ក្នុងស្រុកព្រៃកប្បាសបានឱ្យដឹងថា កសិកររូបនេះគឺជាជនគំរូម្នាក់ ដែលឧស្សាហ៍ព្យាយាមក្នុងរបរកសិកម្ម ជាពិសេសដំណាំស្រូវ ហើយគាត់តែងតែដើរបង្ហាត់បង្រៀនដល់កសិករផ្សេងៗទៀតនៅក្នុងតំបន់នោះផងដែរ។
លោកស្រីថា៖ «មានកសិករផ្សេងទៀតក៏គេធ្វើដែរ តែខ្ញុំដឹងថាគាត់លេចធ្លោឈានមុខគេដោយសារគាត់ធ្វើស្រែបានច្រើន»។
ពាក់ព័ន្ធនឹងលោក គង់ វ៉ុង ដែលជាកសិករមានស្នាដៃឆ្នើមនេះ ភ្នំពេញ ប៉ុស្ដិ៍ មិនអាចសុំការបញ្ជាក់បន្ថែមពីលោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវបានទេ។ ក៏ប៉ុន្តែបើតាមបណ្ណសរសើររបស់ក្រសួងកសិកម្មដែលមានចុះហត្ថលេខានៅឆ្នាំ ២០១៨ ដោយលោក ទីសុគន្ធ រដ្ឋលេខាធិការក្រសួងនេះ បានសរសេរថា លោក គង់ វ៉ុង កសិករនៅភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ ទទួលបានចំណាត់ថ្នាក់លេខ ២។
នៅក្នុងបណ្ណសរសើរដដែលនោះបញ្ជាក់ថា៖ «មានស្នាដៃឆ្នើមក្នុងការអនុវត្តបច្ចេកទេសកសិកម្មថ្មីក្នុងផលិតកម្មបន្លែប្រកបដោយសុវត្ថិភាព និងប្រសិទ្ធភាពសេដ្ឋកិច្ចដែលបានចូលរួមប្រកួតប្រជែងនៅក្នុងវេទិកាកសិករឆ្នើមនៅទីស្តីការក្រសួងកសិកម្មរុក្ខាប្រមាញ់ និងនេសាទ»៕
.jpg)
