អ្នកចូលរួមក្នុងយុទ្ធនាការសម្អាតបរិស្ថាន នៅឃុំកំពង់ភ្លុក កាលពីថ្ងៃទី២មិថុនា។ ហេង ជីវ័ន
សៀមរាបៈ អង្គការមូលនិធិទំពាំងស្នងឫស្សី និងសហគមន៍កំពង់ភ្លុក ខេត្តសៀមរាប នឹងរៀបចំព្រឹត្តិការណ៍ទេសចរណ៍បរិស្ថានរយៈពេល ២ ថ្ងៃ នៅថ្ងៃទី ១៧ និង ១៨ ខែមិថុនា ដើម្បីអបអរសាទររដូវទឹកឡើង ហើយដើមឈើចំនួន ១ ០០០ ដើម នឹងត្រូវដាំក្នុងឱកាសនោះផងដែរ។
ព្រឹត្តការណ៍ទេសចរណ៍បរិស្ថានប្រចាំឆ្នាំ២០២៣គឺជាព្រឹត្តិការណ៍មួយ ដែលធ្វើឡើងដើម្បីអបអរសាទរទិវាបរិស្ថានជាតិនិងបរិស្ថានពិភពលោក៥មិថុនាឆ្នាំ២០២៣ក្រោមប្រធានបទស្តារឡើងវិញប្រព័ន្ធអេកូឡូស៊ីបឹងទន្លេសាបនិងដើម្បីអបអរសាទរទិវាមហាសមុទ្រពិភពលោក៨មិថុនាឆ្នាំ២០២៣ក្នុងរូបភាពជាបុណ្យសមុទ្រទឹកសាបកម្ពុជាដោយយកបឹងទន្លេសាបជានិមិត្តរូបនៃមហាសមុទ្រស្របពេលរដូវទឹកឡើងក្នុងតំបន់ទន្លេសាប ក៏នឹងមកដល់ក្នុងពេលឆាប់ៗ។
លោកស៊ាសុផលប្រធានអង្គការមូលនិធិទំពាំងស្នងឫស្សីបានប្រាប់ភ្នំពេញប៉ុស្តិ៍ថាអង្គការមូលនិធិទំពាំងស្នងប្ញស្សី (NGO2) តែងតែបើកយុទ្ធនាការចលនាសហគមន៍បឹងទន្លេសាបឱ្យនាំគ្នាចូលរួមសម្អាតបរិស្ថានប្រមូលសំណល់ប្លាស្ទិកទាំងរដូវទឹកសម្រកនិងទឹកដំឡើងដោយបានសហការគ្នាយ៉ាងល្អជាមួយអាជ្ញាធរដែនដីគ្រប់លំដាប់ថ្នាក់មានទាំងក្រសួង-មន្ទីរបរិស្ថានខេត្តជាដើម។
លោកបានបន្តថា៖«ក្នុងនោះដែរយើងតែងតែប្រារព្ធព្រឹត្តិការណ៍ធំចំនួន២ដងក្នុង១ឆ្នាំគឺអបអររដូវទឹកឡើងក្នុងខែមិថុនា (ប្រធានបទស្របតាមទិវាបរិស្ថានជាតិនិងពិភពលោក៥មិថុនា) នៅពេលទឹកទន្លេសាបចាប់ផ្ដើមហូរចូលត្រឡប់មកវិញនិងម្ដងទៀតក្នុងខែវិច្ឆិកានៅពេលទឹកទន្លេសាបចាប់ផ្ដើមស្រកទៅវិញ (ប្រធានបទស្របតាមទិវាអនាម័យបរិស្ថានជាតិ២៣វិច្ឆិកា)»។
លោកស៊ាសុផលបានសង្កត់ធ្ងន់ថាសម្រាប់អបអរសាទររដូវទឹកឡើងក្នុងឆ្នាំនេះព្រឹត្តិការណ៍ទេសចរណ៍បរិស្ថានប្រចាំឆ្នាំ២០២៣នឹងមានកម្មវិធីបែបបរិស្ថានបែបប្រពៃណីសាសនានិងបែបទេសចរណ៍កម្សាន្តសប្បាយរួមបញ្ចូលគ្នាដោយរៀបចំឡើងដោយប្រជាសហគមន៍ដោយផ្ទាល់។
លោកបញ្ជាក់ថា៖«ដើម្បីអបអរសាទរទិវាបរិស្ថានជាតិនិងបរិស្ថានពិភពលោក៥មិថុនានិងអបអរសាទរទិវាមហាសមុទ្រពិភពលោក៨មិថុនាយើងបានដំឡើងកូនតុក្កតាយក្សមានមច្ឆជាតិនិងសត្វស្លាបចម្រុះគ្នាចំនួន១២០រូបត្រៀមដង្ហែក្បួននៅក្នុងសហគមន៍កំពង់ភ្លុកទៅកាន់មាត់បឹងទន្លេសាបនៅល្ងាចថ្ងៃទី១៧មិថុនានិងកម្មវិធីដាំកូនឈើ១ ០០០ដើមនិងសកម្មភាពសម្អាតប្លាស្ទិកមាត់បឹងទន្លេសាបនៅព្រឹកថ្ងៃទី១៨មិថុនា »។
តាមសេចក្តីប្រកាសព័ត៌មានរបស់អង្គការមូលនិធិទំពាំងស្នងឫស្សីបានឱ្យដឹងថាកម្មវិធីបរិស្ថានដែលមានក្នុងព្រឹត្តិការណ៍នោះគឺការដាំកូនឈើ១ ០០០ដើមតំណាងឱ្យប្រជាជនកំពង់ភ្លុក១ ០០០គ្រួសារ ការសម្អាតសំណល់ប្លាស្ទិកនៅតាមមាត់បឹងទន្លេសាបនិងយុទ្ធនាការគ្រួសារស្អាតជាគ្រួសារគំរូក្នុងសហគមន៍រួមទាំងគម្រោងកម្មវិធីប្រមូលប្លាស្ទិកតាមខ្នងផ្ទះផងដែរ។
ចំណែកកម្មវិធីបែបប្រពៃណីនិងសាសនាគឺមានពិធីបុណ្យឆ្លងសាលាឆទានស្ពានមាត់ទន្លេនិងពូនភ្នំខ្សាច់សូត្រមន្តរាប់បាត្រឆ្លងនិងពិធីបួងសួងដឹងគុណទន្លេសាបខណៈកម្មវិធីបែបទេសចរណ៍និងកម្សាន្តគឺមានការហែតុក្កតាយក្សល្បែងប្រជាប្រិយការសម្តែងល្ខោនបាសាក់កីឡាអ្នកចម្បាំងទន្លេសាបអុំទូកជិះកង់រត់ប្រណាំងបោះជំរំតង់យុវជនមេត្រីបរិស្ថានរួមទាំងពិព័រណ៍សហគមន៍ទៀតផង។នេះបើតាមសេចក្តីប្រកាសព័ត៌មាន។
កញ្ញាមាំពីសីតំណាងយុវជននៅក្នុងសហគមន៍កំពង់ភ្លុកបានប្រាប់ភ្នំពេញប៉ុស្តិ៍ថានេះគឺជាព្រឹត្តិការណ៍លើកទី១ដែលមិនធ្លាប់មានពីមុនមកនៅក្នុងសហគមន៍នេះ។ព្រឹត្តិការណ៍នេះនឹងចូលរួមទាក់ទាញភ្ញៀវទេសចរកាន់តែច្រើនបន្ថែមទៀតឱ្យមកកម្សាន្តនៅក្នុងសហគមន៍កំពង់ភ្លុក។
កញ្ញាបញ្ជាក់ថា៖ «សម្រាប់ក្រុមខ្ញុំគឺបានបែងចែកទៅតាមក្រុមហើយក្រុមការងារបានណែនាំក្នុងការយើងរៀបចំដំឡើងតុក្កតាយក្សទៅតាមក្រុមនីមួយៗ។នៅក្នុងថ្ងៃកម្មវិធីខាងមុខគឺយើងនឹងមានការរៀបចំកម្មវិធីបន្ថែមផ្សេងៗទៀតហើយចំពោះខ្ញុំនិងគ្រូៗនៅក្នុងសាលារបស់ខ្ញុំនិងនៅក្នុងសហគមន៍កូនសិស្សគឺពិតជាទទួលបានចំណេះដឹងថ្មីក្នុងការរៀបចំកម្មវិធីដ៏ធំនេះ»។
សហគមន៍កំពង់ភ្លុកមានប្រជាសហគមន៍ប្រមាណ១ ០០០គ្រួសាររស់នៅក្នុងភូមិចំនួន៣គឺភូមិត្នោតកំបុតភូមិគោកក្តុលនិងភូមិដីក្រហមស្ថិតក្នុងឃុំកំពង់ភ្លុកស្រុកប្រាសាទបាគងខេត្តសៀមរាប។ភាគច្រើនប្រជាពលរដ្ឋ រស់នៅលើផ្ទះបណ្តែតទឹកនិងប្រកបរបរនេសាទ។
សហគមន៍នេះមានភាពទាក់ទាញដល់អ្នកទេសចរដែលអាចទស្សនាផ្ទះសង់ខ្ពស់ៗនៅលើផ្ទៃទឹកទស្សនាភូមិបណ្តែតទឹកអុំទូកទស្សនាក្នុងភូមិទស្សនាព្រៃលិចទឹកនិងអាចទស្សនាផ្ទៃបឹងទន្លេសាបដ៏ធំល្វឹងល្វើយជាមួយនឹងទិដ្ឋភាពថ្ងៃហៀបលិចនៅលើផ្ទៃបឹង។
លោកឃឹមហ្វីណង់អភិបាលរងខេត្តសៀមរាបបានអំពាវនាវដល់សាធារណជនឱ្យចូលទស្សនាមើលប្រជាសហគមន៍កំពង់ភ្លុកដង្ហែសាកល្បងទីងមោងកាន់ដោយដៃរូបសត្វស្លាបជិតផុតពូជនិងត្រីកម្រៗធ្វើពីវល្លិ៍រំពាក់ឫស្សីនិងក្រដាសដើម្បីលើកកម្ពស់ការយល់ដឹងពីការទុកដាក់សំរាមឱ្យបានត្រឹមត្រូវនៅក្នុងសហគមន៍និងការអភិរក្សជីវចម្រុះនៅតាមដងបឹងទន្លេសាប។
លោកថាការដង្ហែទីងមោងនេះគឺជាផ្នែកមួយនៃកម្មវិធីជាច្រើនទៀតដែលសហគមន៍កំពង់ភ្លុកគ្រោងនឹងរៀបចំឡើងនៅក្នុងព្រឹត្តិការណ៍ទេសចរណ៍បរិស្ថាន«បុណ្យឆ្លងសាលាឆទានឆ្លងស្ពានមាត់ទន្លេ» នាថ្ងៃទី១៧-១៨ខែមិថុនាដើម្បីអបអរសាទរទិវាបរិស្ថានជាតិនិងបរិស្ថានពិភពលោក។
លោកបានបញ្ជាក់ថា៖«ពិតជាគួរឱ្យស្ងើចសរសើរគំនិតច្នៃប្រឌិតនិងសកម្មភាពដើម្បីប្រយោជន៍រួមរបស់បងប្អូនសហគមន៍កំពង់ភ្លុកណាស់។ (ខ្ញុំ) ឃើញហើយធ្វើឱ្យមានសង្ឃឹមយ៉ាងខ្លាំងចំពោះអនាគតដ៏ស្រស់ស្អាតរបស់សហគមន៍មួយនេះ»។
លោកនេត្រភត្ត្រាអ្នកនាំពាក្យក្រសួងបរិស្ថានដែលបានទៅដល់សហគមន៍កំពង់ភ្លុកបាននិយាយថាប្រជាពលរដ្ឋនៅឃុំកំពង់ភ្លុកបានចូលរួមយ៉ាងសកម្មក្នុងការថែរក្សាអនាម័យបរិស្ថាននិងប្រព័ន្ធអេកូឡូស៊ី។
លោកបន្តថាពលរដ្ឋនៅក្នុងឃុំកំពង់ភ្លុកបានរៀបចំទុកដាក់និងញែកសំរាមដែលគាត់បានប្រើប្រាស់បានយ៉ាងល្អនិងមិនបោះចោលសំណល់ប្លាស្ទិកក្នុងបរិស្ថាននៃបឹងទន្លេសាបដែលនេះជាការចូលរួមក្នុងការការពារថែរក្សាព្រៃលិចទឹកប្រព័ន្ធអេកូឡូស៊ីនៃបឹងទន្លេសាប។
លោកបញ្ជាក់ថា៖«ខ្ញុំបានជួបសំណេះសំណាលជាមួយអាជ្ញាធរប្រជាពលរដ្ឋនិងប្អូនៗសិស្សានុសិស្សដើម្បីលើកទឹកចិត្តពលរដ្ឋបន្តប្រតិបត្តិមេត្រីបរិស្ថាន។ ជាមួយគ្នានេះសិស្សានុសិស្សនៃវិទ្យាល័យកំពង់ភ្លុកបានធ្វើការកែច្នៃសំណល់ប្លាស្ទិកជារូបមច្ឆជាតិនិងសត្វស្លាបជាច្រើនប្រភេទដែលតំណាងឱ្យភាពសម្បូរបែបនៃជីវចម្រុះនៅបឹងទន្លេសាបដែលជាប្រភពសន្តិសុខស្បៀងអាហារនិងចំណូលសេដ្ឋកិច្ចយ៉ាងសំខាន់ក៏ដូចជាការគ្រប់គ្រងសំណល់ប្លាស្ទិកនៅតំបន់បឹងទន្លេសាបដែរ»៕
.jpg)
