លោក សាម អុីន (ស្ដាំ) ក្នុងជំនួបជាមួយលោក ហ៊ុន សែន នាយករដ្ឋមន្ត្រី។ រូបថត FB
ភ្នំពេញៈ លោក សាម អុីន ដែលជាអតីតមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន ដែលទើបទទួលបានតំណែងជារដ្ឋលេខាធិការក្រសួងបរិស្ថាន បានលើករឿងសំខាន់ចំនួន ២ ទៅកាន់នាយករដ្ឋមន្ត្រី ហ៊ុន សែន ពាក់ព័ន្ធនឹងការដាំដើមឈើឡើងវិញ និងការរក្សាទុកផ្ទៃបឹងមួយចំនួននៅរាជធានីភ្នំពេញ។
ការលើកឡើងនេះ បានធ្វើឡើងនៅពេលដែលលោកសាម អុីន បានចូលជួបសម្ដែងការគួរសម និងថ្លែងអំណរគុណ ដោយផ្ទាល់ទៅកាន់លោកនាយករដ្ឋមន្ត្រី ហ៊ុន សែន កាលពីរសៀលថ្ងៃទី១២ ខែមិថុនា ឆ្នាំ២០២៣ រយៈពេលជាង២ម៉ោង ហើយនេះជាលើកដំបូងហើយដែលលោក បានជួបដោយផ្ទាល់ជាមួយលោកនាយករដ្ឋមន្ត្រី បន្ទាប់ពីលោកឈានចូលមកកាន់គណបក្សប្រជាជន។
ក្នុងឱកាសនោះ លោក បានលើកឡើងរឿងរ៉ាវជាច្រើន ហើយរឿងដែលសំខាន់នោះ គឺទាក់ទងទៅនឹងវិស័យបរិស្ថាន អំពីសារៈសំខាន់នៃយុទ្ធនាការដាំឈើឡើងវិញតាមផ្ទះ តាមផ្លូវក្នុងភូមិ តាមសាលារៀន និងវត្តអារាមឱ្យមានពណ៌បៃតងស្រស់ស្អាត និងសារប្រយោជន៍នៃការរក្សាទុកផ្ទៃបឹងមួយចំនួននៅទីក្រុងភ្នំពេញ ដើម្បីជួយលើកស្ទួយសោភណភាពទីក្រុង និងផាសុកភាពប្រជាពលរដ្ឋ។ នេះបើតាមការអះអាងរបស់លោក សាម អុីន នៅថ្ងៃទី១៣ ខែមិថុនានេះ។
ជាអតីតមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន ដែលទើបទទួលបានតំណែងជារដ្ឋលេខាធិការក្រសួងបរិស្ថាន លោក សាម អុីន បានប្រាប់ភ្នំពេញប៉ុស្តិ៍យ៉ាងថា៖«ការដាំឈើតាមផ្ទះ គឺសម្តេចនាយកគាត់លើកឡើងថា គួរដាំដើមហូបផ្លែអ៊ីចឹងទៅ នឹងជួយផ្តល់ជាផ្លែឈើសម្រាប់ហូប និងជាម្លប់។ (លោក) ក៏មានការជជែកពិភាក្សាបន្ថែមថា បើដាំតាមផ្ទះហើយ គួរដាំតាមផ្លូវក្នុងភូមិ តាមសាលារៀន និងវត្តអារាម ឱ្យមានដើមឈើដែលផ្តល់ជាម្លប់បៃតង ហើយឱ្យរុញសកម្មភាពទាំងនេះឱ្យទៅជាយុទ្ធនាការថ្នាក់ជាតិតែម្តង»។
លោក ថ្លែងថា ដើម្បីឱ្យសកម្មភាពនៃការដាំដើមឈើឡើងវិញទូទាំងប្រទេស បានលេចជារូបរាង និងទទួលបានជោគជ័យ គឺ ដំបូងក្រសួងកំពុងរៀបចំសៀវភៅផែនការសម្រាប់ជំរុញការផ្សព្វផ្សាយ ហើយជាពិសេសនោះ គឺត្រូវការជាចាំបាច់ការចូលរួមពីសំណាក់អាជ្ញាធរមូលដ្ឋាន និងប្រជាពលរដ្ឋដោយផ្ទាល់។
លោក បានបញ្ជាក់ថា៖«យើងមិនទាន់អនុវត្តបានភ្លាមៗទេ ព្រោះគម្រោងយើងដែលលើកឡើងនេះ គឺត្រូវធ្វើឡើងជាជំហានៗ ទី១ យើងត្រូវដាក់បញ្ចូលទៅក្នុងផែនការយុទ្ធសាស្ត្ររបស់ក្រសួងបរិស្ថាន (សៀវភៅស) ដែលក្រសួងកំពុងធ្វើសេចក្តីព្រាងក្នុងពេលនេះ។ ទី២ យើង(ក្រសួងបរិស្ថាន) ក៏កំពុងធ្វើការផ្សព្វផ្សាយ ដើម្បីជំរុញជាគំរូទៅកាន់អាជ្ញាធរដែនដី ឱ្យគាត់យល់ដឹងពីសារៈសំខាន់ និងចូលរួមជំរុញប្រជាពលរដ្ឋនៅតាមមូលដ្ឋានពីការដាំដើមឈើនេះ។ ខ្ញុំនឹងព្យាយាមធ្វើការជាមួយរដ្ឋមន្ត្រីក្រសួងបរិស្ថាន ដើម្បីរុញរឿងនេះឱ្យបានលឿន»។
លោក សាម អុីន ថ្លែងថា តាមគម្រោង និងការលើកឡើងរបស់លោកនាយករដ្ឋមន្ត្រី ហ៊ុន សែន ក្នុងពេលជួបពិភាក្សាអំពីយុទ្ធនាការដាំឈើឡើងវិញតាមផ្ទះ តាមផ្លូវក្នុងភូមិ តាមសាលារៀន និងវត្តអារាមនេះ លោកអាចនឹងដាក់ឱ្យដំណើរការក្នុងពេលសមរម្យណាមួយដែលជាទិវារុក្ខា ដើម្បីជំរុញលើកទឹកចិត្តដល់ប្រជាពលរដ្ឋ និងអាជ្ញាធរមូលដ្ឋានយកចិត្តទុកដាក់ពីបញ្ហានេះ។
លោក សាម អុីន ថ្លែងថា ដើម្បីរក្សាបឹងមួយចំនួន ដូចជា បឹងតាមោក បឹងទំពុន និងបឹងជើងឯកជាដើម។ លោក ចាត់ទុកថា ការរក្សាផ្ទៃបឹងទាំងនេះ នៅក្នុងក្រុង ហើយធ្វើការអភិវឌ្ឍជាសួនសាធារណៈ គឺពិតជាមានសារៈសំខាន់ណាស់ក្នុងការរស់នៅរបស់ប្រជាពលរដ្ឋ និងធម្មជាតិ។
លោក បានបញ្ជាក់ថា៖«ក្រោយលើកឡើងពីបញ្ហានេះ លោក (ហ៊ុន សែន) បានពន្យល់មកវិញថា បឹងទាំងនោះ គឺនឹងត្រូវរក្សាទុកខ្លះ និងអាចលុបខ្លះ ព្រោះតម្រូវការអភិវឌ្ឍគឺទាមទារឱ្យមានការលុបខ្លះ និងមានទុកផ្ទៃបឹងខ្លះសម្រាប់រក្សាទឹកទុក និងអាចរៀបចំសួនច្បារ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បាននិយាយថា ការលើកឡើងពីបញ្ហាប្រឈមមួយចំនួនរវាងមន្ត្រីនៅក្រោមឱវាទ ទៅកាន់ថ្នាក់ដឹកនាំប្រទេសបែបនេះ គឺជារឿងល្អ ដែលកន្លងមក រដ្ឋាភិបាល បានធ្វើដូចជា កម្មវិធីបូកសរុបការងារឆ្នាំចាស់បន្តទៅឆ្នាំថ្មីជាដើម។ ចំពោះការរាយការណ៍របស់លោក សាម អុីន ទៅកាន់នាយករដ្ឋមន្ត្រីផ្ទាល់ដើម្បីសុំការគាំទ្រ និងដោះស្រាយបញ្ហាដែលកើតមានបែបនេះ ក៏រឹតតែមានសារៈសំខាន់ក្នុងការដោះស្រាយបញ្ហាទាំងនោះជាអាទិភាព។
លោក បានបញ្ជាក់ថា៖«ករណីលោកបណ្ឌិត សាម អុីន លើកសំណូមពរទៅសម្តេចហ៊ុន សែន ពីអ្វីដែលជាបញ្ហាអាទិភាពដែលលោកយល់ឃើញ គឺជារឿងមួយល្អ ដើម្បីបង្កើនបរិយាកាសនៃការពិភាក្សាគ្នា ក៏ដូចជាការរាយការណ៍ជូននូវអ្វីដែលលោក សាម អុីន លោកមើលឃើញ។ សម្រាប់ខ្ញុំ រាល់បញ្ហាប្រឈមមួយចំនួនដែលកើតឡើងនៅសហគមន៍ ជាពិសេសបញ្ហាដែលលោកសាម អុីន លើកឡើងនេះ គឺជារឿងល្អ បើសិនជាមានចំណុចចាប់ផ្តើមពីភាគីរដ្ឋាភិបាល ហើយស្វែងរកការគាំទ្រពីដៃគូពាក់ព័ន្ធ និងសហគមន៍ប្រជាពលរដ្ឋធ្វើការរួមគ្នាដើម្បីដោះស្រាយបញ្ហាទាំងនេះ»៕
.jpg)
