យុទ្ធនាការមូលនិធិគន្ធបុប្ផាកម្ពុជា «១ ម៉ឺនរៀល ១ ម៉ឺននាក់»។ រូបថត មូលនិធិគន្ធបុប្ផាកម្ពុជា
ភ្នំពេញៈ មូលនិធិគន្ធបុប្ផាកម្ពុជាបានប្រកាសថា ត្រឹមរយៈពេល ២ សប្តាហ៍ យុទ្ធនាការ “១ ម៉ឺនរៀល ១ ម៉ឺននាក់” សម្រាប់កុមារកម្ពុជាទទួលបានថវិកាបរិច្ចាគជិត ២ លានដុល្លារ ពីសប្បុរសជនជាង ២០ ម៉ឺននាក់ ដែលការបរិច្ចាគនេះគិតរួមទាំងការបរិច្ចាគតាមប្រព័ន្ធធនាគារ និងដោយផ្ទាល់នៅមន្ទីរពេទ្យគន្ធបុប្ផា។
កាលពីថ្ងៃទី ២៩ ខែឧសភា មូលនិធិគន្ធបុប្ផាកម្ពុជា បានប្រកាសបើកយុទ្ធនាការ “១ ម៉ឺនរៀល ១ ម៉ឺននាក់” សម្រាប់កុមារកម្ពុជារយៈពេល ៣០ ថ្ងៃ ដោយចាប់ដំណើរការពីថ្ងៃទី ១ ដល់ថ្ងៃទី ៣០ ខែមិថុនា ឆ្នាំ ២០២៣ ដើម្បីអបអរសាទរទិវាកុមារអន្តរជាតិ ១ មិថុនា។
មូលនិធិគន្ធបុប្ផាកម្ពុជា បានប្រកាសនៅថ្ងៃទី ១៤ ខែមិថុនាថា បន្ទាប់ពីបានបើកយុទ្ធនាការបានរយៈពេល ២ សប្ដាហ៍មក យុទ្ធនាការ “១ ម៉ឺនរៀល ១ ម៉ឺននាក់” សម្រាប់កុមារកម្ពុជា ទទួលបានថវិកាបរិច្ចាគចំនួនជិត ២ លានដុល្លារអាមេរិក ពីសប្បុរសជនជាង ២០ ម៉ឺននាក់។ មូលនិធិគន្ធបុប្ផាកម្ពុជាបានអះអាងថា ថវិកាទាំងនោះ គឺគិតរួមទាំងការបរិច្ចាគតាមប្រព័ន្ធធនាគារ និងដោយផ្ទាល់នៅមន្ទីរពេទ្យគន្ធបុប្ផា។
មូលនិធិគន្ធបុប្ផាកម្ពុជាបានបញ្ជាក់ថា៖ «សូមលើកទឹកចិត្តសប្បុរសជននានា បន្តរួមគ្នាជាមួយមូលនិធិគន្ធបុប្ផាកម្ពុជា ក្នុងស្មារតី “ខ្មែរជួយខ្មែរ” ដើម្បីនាំមកនូវភាពញញឹមរបស់កុមារដែលជាអនាគតដ៏ភ្លឺស្វាងរបស់កម្ពុជា ទោះបីជានៅពេលយុទ្ធនាការ “១ ម៉ឺនរៀល ១ ម៉ឺននាក់” សម្រាប់កុមារកម្ពុជា នឹងត្រូវបញ្ចប់នៅដំណាច់ខែមិថុនា ឆ្នាំ ២០២៣ ខាងមុខនេះក៏ដោយ»។
មូលនិធិគន្ធបុប្ផាកម្ពុជា គឺជាស្ថាប័នជាតិមួយដែលមានតួនាទីក្នុងការកៀរគរការបរិច្ចាគ ពីសប្បុរសជន ដើម្បីរួមគ្នារក្សានិរន្តរភាពរបស់មន្ទីរពេទ្យគន្ធបុប្ផាទាំង ៥ ទីតាំង ខណៈចំណាយជាមធ្យមប្រចាំសប្ដាហ៍អស់ប្រមាណ ៨៤ ម៉ឺនដុល្លារអាមេរិក ឬស្មើនឹងជាង ៤០ លានដុល្លារ ក្នុង ១ ឆ្នាំៗឯណោះ។
លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានមូលនិធិគន្ធបុប្ផាកម្ពុជា បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែមិថុនាថា មូលនិធិគន្ធបុប្ផាពិតជាមានមោទនភាព និងមានអារម្មណ៍សប្បាយរីករាយ ពេលដែលឃើញពលរដ្ឋកម្ពុជា មានសមានចិត្តរួមគ្នាជាធ្លុងមួយក្នុងស្មារតី “ខ្មែរជួយខ្មែរ” ដើម្បីបន្តនិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំង ៥ ទីតាំង។
លោកបានបញ្ជាក់ថា នៅពេលប្រទេសជាតិមានសុខសន្តិភាពពេញលេញ ប្រាក់ចំណូលមានការកើនឡើង ពលរដ្ឋកម្ពុជាមានទឹកចិត្តសប្បុរសកាន់តែខ្លាំងក្នុងការជួយគ្នាក្នុងគ្រាលំបាក ទោះតិចក្តី ច្រើនក្តី តាមរយៈការចូលរួមបរិច្ចាគក្នុងយុទ្ធនាការសប្បុរសធម៌នានា ជាពិសេសក្នុងបុព្វហេតុរួមគ្នាជួយសង្គ្រោះជីវិតកុមារនៅកម្ពុជា។
លោកបានបញ្ជាក់ថា៖ «ឆ្នាំនេះមានសម្ទុះនៃការចូលរួមលើសពីឆ្នាំមុនខ្លាំង ទាំងទិដ្ឋភាពថវិកា និងចំនួនសប្បុរសជន ដែលការចូលរួមច្រើនបែបនេះ ក៏ព្រោះតែថ្នាក់ដឹកនាំ និងក្រុមការងារទាំងអស់នៃមូលនិធិគន្ធបុប្ផាកម្ពុជា បានយកបទពិសោធន៍នៃការរៀបចំយុទ្ធនាការនេះកាលពីឆ្នាំ ២០២២ ជាមេរៀន ជាធាតុចូលក្នុងការកែលម្អចំណុចខ្វះខាត។ ព្រមទាំងបានបង្កើតយុទ្ធសាស្ត្រផ្សព្វផ្សាយថ្មីៗ ជាពិសេសការផ្សព្វផ្សាយតាមបណ្ដាញសង្គមនានា រួមជាមួយនឹងការចូលរួមផ្សព្វផ្សាយយ៉ាងផុសផុលពីក្រសួងស្ថាប័ន គ្រឹះស្ថានឯកជន ធនាគារដៃគូ សប្បុរសជននានា និងជាពិសេសសារព័ត៌មាននៅទូទាំងប្រទេសចូលរួមយ៉ាងច្រើនកុះករ»។
លោក ចន ណារិទ្ធ បានអះអាងថា ក្នុងឆ្នាំនេះ សប្បុរសជនមិនត្រឹមតែបានចូលរួមបរិច្ចាគប៉ុណ្ណោះទេ ថែមទាំងបានចូលរួមផ្សព្វផ្សាយបន្តដល់មិត្តភក្ដិ បងប្អូន និងសាធារណជនបន្ថែមទៀតផង។
លោកបានបញ្ជាក់ថា៖ «ក្នុងនាមមូលនិធិគន្ធបុប្ផាកម្ពុជា និងក្នុងនាមអាណាព្យាបាលកុមារនៅកម្ពុជា ខ្ញុំសូមសម្ដែងអរគុណជូនសប្បុរសជនទាំងអស់ដែលតែងតែចូលរួមរក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាក្នុងការបន្តបេសកកម្មពិនិត្យ និងព្យាបាលទារក និងកុមារនៅកម្ពុជា ប្រកបដោយគុណភាព ឥតគិតថ្លៃ និងមិនមានការរើសអើង»។
មូលនិធិគន្ធបុប្ជាកម្ពុជា ត្រូវបានបង្កើតឡើងកាលពីឆ្នាំ ២០១៨ ហើយជាមូលនិធិ ១ ក្នុងចំណោមមូលនិធិចំនួន ២ គឺមូលនិធិ Beat Richner ប្រទេសស្វ៊ីស ដើម្បីរួមគ្នាគាំទ្រដល់មន្ទីរពេទ្យគន្ធបុប្ផាទាំង ៥ ហើយក្នុងឆ្នាំ ២០២២ កន្លងមកនេះ មូលនិធិគន្ធបុប្ជាកម្ពុជា បានទទួលថវិកាពីសប្បុរសជនពីគ្រប់ទិសទីប្រមាណ ១៨ លានដុល្លារប៉ុណ្ណោះ។
របាយការណ៍របស់មន្ទីរពេទ្យគន្ធបុប្ផា ប្រចាំខែឧសភា ឆ្នាំ ២០២៣ បានឱ្យដឹងថា ក្រុមគ្រូពេទ្យបានពិនិត្យព្យាបាលកុមារឈឺចំនួន ៦១ ៩១ នាក់ នៅក្នុងផ្នែកពិគ្រោះជំងឺក្រៅ និងកុមារជំងឺធ្ងន់ៗចំនួន ១១ ៤០៣ នាក់ ដោយដាក់ឱ្យសម្រាកព្យាបាលនៅក្នុងមន្ទីរពេទ្យ ហើយក្នុងនោះកុមារមានជំងឺគ្រុនឈាមមានចំនួន ២៧៥ នាក់ និងកុមារដែលទទួលបានការវះកាត់មានចំនួន ២ ៣០០ នាក់។ សម្រាប់ការព្យាបាលនៅផ្នែកសម្ភពវិញ គឺមានស្ត្រីមានផ្ទៃពោះចំនួន ៩ ១៨៩ នាក់ បានមកពិនិត្យតាមដានផ្ទៃពោះនៅមន្ទីរពេទ្យគន្ធបុប្ផាទី៣ ខណៈក្រុមគ្រូពេទ្យ បានសម្រាលកូនដល់ស្ត្រីមានផ្ទៃពោះចំនួន ១ ៦៥១ នាក់។
កញ្ញា ណយ ធានី ពលរដ្ឋម្នាក់ដែលបានបរិច្ចាគថវិកាសម្រាប់យុទ្ធនាការនេះថ្លែងថា ថវិកានេះអាចជួយសម្រួលទៅដល់ការចំណាយនានារបស់មន្ទីរពេទ្យឱ្យបន្ដសកម្មភាពនេះបានយូរជួយកុមារកម្ពុជា៕
.jpg)
