.jpg)
មន្ត្រី ADB ចុះត្រួតពិនិត្យទីតាំងភូមិសាស្ត្រនាពេលកន្លងទៅ។ រូបថត ក្រសួងធនធានទឹក និងឧតុនិយម
ភ្នំពេញៈ យោងតាមលទ្ធផលនៃកិច្ចចរចារួមគ្នា រវាងក្រសួងធនធានទឹក និងឧតុនិយម និងគណៈប្រតិភូតំណាងស្នាក់ការកណ្តាលរបស់ធនាគារអភិវឌ្ឍន៍អាស៊ី (ADB) កាលថ្ងៃទី ២៧ ខែមិថុនា បានឱ្យដឹងថា ADB បានត្រៀមកញ្ចប់ថវិកាថ្មីចំនួន ២០០ លានដុល្លារ ដើម្បីចូលរួមវិនិយោគរយៈពេលវែងលើវិស័យគ្រប់គ្រងធនធានទឹក និងឧតុនិយមនៅទូទាំងប្រទេសកម្ពុជា។
កិច្ចចរចារួមគ្នានេះ ត្រូវបានធ្វើឡើងក្រោមការដឹកនាំដោយ លោក ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម តំណាងស្នាក់ការកណ្តាលរបស់ធនាគារអភិវឌ្ឍន៍អាស៊ីដឹកនាំដោយលោក Alvin Lopez មន្ត្រីជាន់ខ្ពស់របស់ ADB ប្រចាំនៅ ADB HQ លោក ឡុង ពិសិទ្ធ មន្ត្រីជាន់ខ្ពស់របស់ ADB ប្រចាំនៅក្នុងស្ថានស្នាក់ការតំណាងរបស់ ADB ក្នុងប្រទេសកម្ពុជា និងលោក Ly Zine ប្រធានក្រុមទីប្រឹក្សាកសាងគម្រោងខ្នាតធំរបស់ ADB។
លោក ចាន់ ស៊ីណាត បានលើកឡើងថា កិច្ចចរចានេះ គឺបានធ្វើឡើងស្របតាមអនុសាសន៍ណែនាំរបស់លោក លឹម គានហោ រដ្ឋមន្ដ្រីក្រសួងធនធានទឹក និងឧតុនិយម ដើម្បីលើកយកយុទ្ធសាស្ត្រថ្មីៗក្នុងការបំពេញបេសកកម្មដ៏សកម្ម តាមចក្ខុវិស័យដ៏ច្បាស់លាស់ក្នុងគ្រប់រយៈពេលទាំងអស់នៃវិស័យធនធានទឹក និងឧតុនិយមនៃប្រទេសកម្ពុជា។
លោកបន្តថា ដើម្បីធ្វើការគាំទ្រដល់រាជរដ្ឋាភិបាល លើគ្រប់ខណៈឱ្យអស់ពីកម្លាំងកាយចិត្តក្នុងការគ្រប់គ្រងទឹក ប្រើប្រាស់ទឹក បញ្ជាទឹក និងកិច្ចអភិវឌ្ឍន៍ក្នុងវិស័យឧតុនិយមប្រកបដោយសន្តិសុខ សុវត្ថិភាព និងនិរន្តរភាព និងដោយបានទទួលនូវការគាំទ្រយ៉ាងពេញទំហឹងពីសំណាក់ក្រសួងសេដ្ឋកិច្ច និងហិរញ្ញវត្ថុ ទើបក្រសួងបើកឱ្យមានកិច្ចចរចារួមគ្នារវាងស្ថាប័នពាក់ព័ន្ធនាពេលនេះ។
លោក ចាន់ ស៊ីណាត បានឱ្យដឹងទៀតថា តាមរយៈការចរចារួមគ្នានេះ គឺបានទទួលលទ្ធផលល្អជាអតិបរមា លើការអនុវត្តផែនការការងារនៃការវិនិយោគរយៈពេលវែងលើវិស័យគ្រប់គ្រងធនធានទឹក និងឧតុនិយម ក្នុងក្របខ័ណ្ឌទូទាំងប្រទេសកម្ពុជា គឺធនាគារ ADB បានត្រៀមហើយជាស្រេចនូវកញ្ចប់ថវិកាថ្មីចំនួន ២០០ លានដុល្លារអាមេរិក ចូលរួមវិនិយោគក្នុងការអនុវត្តផែនការការងារនេះ។
លោកថា៖ «លើសពីនេះ ADB ក៏បានសន្យា នឹងដឹកនាំកិច្ចពិភាក្សាត្រីភាគីម្តងទៀត ដើម្បីធ្វើការបង្កើនពិតានទុនវិនិយោគរបស់ ADB ឱ្យបានអស់លទ្ធភាពជាអតិបរមាក្នុងវិស័យទឹកនេះបន្ថែមទៀតដែរ»។ ក្នុងដំណើរការកិច្ចអភិវឌ្ឍន៍វិស័យធនធានទឹក និងឧតុនិយម ក្នុងនិយាមធ្វើទំនើបកម្មវិស្វកម្មតំបន់សេដ្ឋកិច្ចប៉ូលទី ៤ ភូមិភាគពាយព្យនៃប្រទេស៕
