.jpg)
លោកឃួង ស្រេង ចុះពិនិត្យទីតាំងគម្រោងសាងសង់ចំណតរថយន្ត និងផ្សារទំនើបក្រោមដី នៅថ្ងៃទី៣កក្កដា។ រូបថត រដ្ឋបាលរាជធានីភ្នំពេញ
ភ្នំពេញៈ អភិបាលរាជធានីភ្នំពេញ លោក ឃួង ស្រេង បានចាត់ទុកការសាងសង់ចំណតរថយន្ត និងផ្សារទំនើបក្រោមដីថា បានរួមចំណែកដោះស្រាយបញ្ហាចំណតសាធារណៈនៅក្នុងទីក្រុង ពិសេសជួយលើកកម្ពស់សោភណភាពរាជធានីភ្នំពេញថែមទៀត។
លោកលើកឡើងដូច្នេះ នៅក្នុងពិធីក្រុងពាលី និងបញ្ចុះបឋមសិលាសាងសង់ចំណតរថយន្ត ផ្សារទំនើប និងភោជនីយដ្ឋានក្រុមហ៊ុន អ៊ីឌីស៊ីផូ (ខេមបូឌា) ក្នុងសង្កាត់វត្តភ្នំ ខណ្ឌដូនពេញ កាលថ្ងៃទី ៣ ខែកក្កដា ឆ្នាំ ២០២៣។
លោកបានថ្លែងថា គម្រោងសាងសង់ចំណតរថយន្ត និងផ្សារទំនើបនៅក្រោមដី របស់ក្រុមហ៊ុនអ៊ីឌីស៊ីជូតា នឹងរួមចំណែកដ៏ល្អរបស់វិស័យឯកជន ដើម្បីដោះស្រាយបញ្ហាចំណតសាធារណៈក្នុងទីក្រុង បង្កើតជម្រើសធុរកិច្ចជូនបងប្អូនអាជីវករ កាន់តែសម្បូរបែប និងលើកកម្ពស់សោភណភាពរាជធានីភ្នំពេញឱ្យកាន់តែស្រស់បំព្រងទៀតផង។
លោក ឃួង ស្រេង មានប្រសាសន៍ថា៖ «សមិទ្ធផលថ្ងៃនេះ ថ្វីដ្បិតតែជាការវិនិយោគរបស់ក្រុមហ៊ុនឯកជន ប៉ុន្តែវាជាប្រយោជន៍ជាតិ សម្រាប់ប្រជាជនក្នុងរាជធានីភ្នំពេញ។ យើងមានមោទនភាពត្រង់ថា យើងមានចំណតរថយន្តទាំងខាងលើ ខាងក្រោម មានគ្រប់សព្វបែបយ៉ាង សម្រាប់ទទួលភ្ញៀវជាតិ និងអន្តរជាតិ ដែលនេះ គឺជាមោទនភាព តាមរយៈការដឹកនាំរបស់សម្ដេចតេជោនាយករដ្ឋមន្ត្រី»។
ពាក់ព័ន្ធរឿងនេះ លោក គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានមជ្ឈមណ្ឌលសិក្សាចិន នៃរាជបណ្ឌិត្យសភាកម្ពុជា បានបង្ហាញការសារទរ ចំពោះការវិនិយោគលើការសាងសង់ចំណតរថយន្ត និងផ្សារទំនើបក្រោមដីនៅក្នុងភូមិសាស្រ្តរាជធានីភ្នំពេញ។
លោកបានថ្លែងថា ការធ្វើចំណតក្រោមដី គឺទាមទារចំណាយទុនវិនិយោគច្រើន ហេតុនេះលោកលើកទឹកចិត្តឱ្យមានការវិនិយោគទាំងផ្សារ និងចំណតក្រោមដីក្នុងពេលជាមួយគ្នា តែលោកសូមឱ្យការយកថ្លៃសេវាចំណត កុំយកថ្លៃពេក។
អ្នកជំនាញសេដ្ឋកិច្ចរូបនេះបញ្ជាក់ថា៖ «ការសាងសង់ចំណតក្រោមដី មិនត្រឹមតែកាត់បន្ថយការកកស្ទះប៉ុណ្ណោះទេ តែវាក៏បានចូលរួមកាត់បន្ថយចំណាយរបស់រដ្ឋាភិបាលផងដែរ ព្រោះនាពេលកន្លងមក យើងឃើញថា រាល់ការចតយានយន្តចោលនៅលើតាមដងផ្លូវ មិនត្រឹមតែបង្កការកកស្ទះចរាចរណ៍ប៉ុណ្ណោះទេ តែក៏ជាការបំផ្លាញសេដ្ឋកិច្ចដ៏ច្រើនផងដែរ»។
សូមបញ្ជាក់ថា គម្រោងចំណតរថយន្តផ្សារទំនើប ភោជនីយដ្ឋាន និងសេវាកម្មផ្សេងៗនេះ មានកម្ពស់ ៤ ជាន់ ដែល ២ ជាន់ជាចំណតរថយន្ត ២ ជាន់ទៀត ជាផ្សារទំនើប លើផ្ទៃដីទំហំ ៣៣ ១២០ ម៉ែត្រការ៉េ ដែលអាចចតរថយន្តបានចំនួន ៥១៦ គ្រឿង៕
