ផ្លូវជាតិលេខ១១ ប្រវែង ៩៦,៤៨ គីឡូម៉ែត្រ ចាប់ពីអ្នកលឿង ក្នុងខេត្តព្រៃវែង ទៅដល់ថ្នល់ទទឹង ក្នុងខេត្តត្បូងឃ្មុំ។ រូបថត ក្រសួងសាធារណការ
ព្រៃវែងៈ ក្រសួងសាធារណការនិងដឹកជញ្ជូន នៅថ្ងៃទី ១៤ កក្កដា ឆ្នាំ ២០២៣ បានចាត់ទុកការស្ថាបនាផ្លូវជាតិលេខ១១ ក្នុងខេត្តព្រៃវែង ប្រវែង ៩៦,៤៨គីឡូម៉ែត្រ ចាប់ពីអ្នកលឿង (ចំណុចប្រសព្វផ្លូវជាតិលេខ១) ខេត្តព្រៃវែង ទៅដល់ថ្នល់ទទឹង (ចំណុចប្រសព្វផ្លូវជាតិលេខ៧) ក្នុងខេត្តត្បូងឃ្មុំ ថាបាននិងកំពុងផ្តល់អត្ថប្រយោជន៍យ៉ាងធំធេង ដល់សេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការសម្រួលដល់ការធ្វើដំណើររបស់ប្រជាពលរដ្ឋ និង ការដឹកជញ្ជូនគ្រប់ប្រភេទ។
បើយោងតាមក្រសួងសាធារណការ ផ្លូវជាតិលេខ ១១ ជាខ្សែផ្លូវតភ្ជាប់រវាងផ្លូវរបៀងសេដ្ឋកិច្ច ២ ដ៏មានសក្តានុពលរបស់មហាអនុតំបន់ មេគង្គរួមមាន៖ ១-ផ្លូវអាស៊ានហាយវ៉េ (AH1) តភ្ជាប់ពីព្រំដែន កម្ពុជា-ថៃ (ប៉ោយប៉ែត) តាមផ្លូវជាតិលេខ៥ និងផ្លូវជាតិលេខ១ ឆ្ពោះទៅកាន់ព្រំដែន កម្ពុជា-វៀតណាម នៅច្រកបាវិត ដែលភ្ជាប់ផ្លូវជាតិលេខ ១១ ត្រង់ចំណុច អ្នកលឿង និង ២-ផ្លូវអាស៊ានហាយវ៉េ (AH11) តភ្ជាប់ពីព្រំដែន កម្ពុជា-ឡាវ កាត់តាមផ្លូវជាតិ លេខ ៧ ភ្ជាប់ទៅនឹងផ្លូវជាតិលេខ៦ ត្រង់ស្ពានព្រែកតាមាក់ ឆ្លងកាត់រាជធានីភ្នំពេញ និងចុះទៅកំពង់ផែ ស្វយ័តក្រុងព្រះសីហនុ តាមផ្លូវជាតិលេខ៤។
គួរបញ្ជាក់ថា ផ្លូវជាតិលេខ ១១ ដែលមានប្រវែង ៩៦,៤៨គីឡូម៉ែត្រនេះ បានបើកការដ្ឋានសាងសង់ កាលពីថ្ងៃទី ១៩ខែធ្នូ ឆ្នាំ ២០១៧ និងបានបញ្ចប់ការសាងសង់ កាលពីថ្ងៃទី១៧ ខែមិថុនា ឆ្នាំ២០២០ ដោយចំណាយទឹកប្រាក់ប្រមាណ ៩៨,៣៨ លានដុល្លារអាមេរិក៕
.jpg)
