គ្រូបង្រៀននៅក្នុងវគ្គបណ្ដុះបណ្ដាល ស្ដីពីការប្រើប្រាស់បច្ចេកវិទ្យាព័ត៌មានសម្រាប់ការបង្រៀន និងរៀន។ រូបថត ក្រសួងអប់រំ
សៀមរាបៈ គ្រូបង្រៀនចំនួន ៤០ រូប នៃសាលាបឋមសិក្សាវត្តបូព៌ ខេត្ដសៀមរាប បានទទួលវគ្គបណ្ដុះបណ្ដាលពីចម្ងាយតាមប្រព័ន្ធអេឡិចត្រូនិក ពីគ្រូជនជាតិកូរ៉េ ស្ដីពីការប្រើប្រាស់បច្ចេកវិទ្យាព័ត៌មានសម្រាប់ការបង្រៀន និងរៀន។
បើយោងតាមក្រសួងអប់រំ យុវជននិងកីឡា វគ្គបណ្ដុះបណ្ដាលនេះ ធ្វើឡើងក្នុងគោលបំណងជំរុញការប្រើប្រាស់បច្ចេកវិទ្យាព័ត៌មាន ជាពិសេសការប្រើប្រាស់បច្ចេកវិទ្យាបញ្ញាសិប្បនិមិត្ត (Artificial Intelligent) ដើម្បីជំនួយដល់ការបង្រៀន-រៀន នៅតាមសាលារៀនដោយផ្អែកលើផែនការសកម្មភាព ស្របតាមបរិបទនៃបរិវត្តកម្មឌីជីថល ដោយបានចូលរួមចំណែកក្នុងការលើកកម្ពស់ការអប់រំបែបឌីជីថលនៅកម្រិតបឋមសិក្សាឱ្យកាន់តែមានលក្ខណៈប្រសើរឡើង។
វគ្គបណ្ដុះបណ្ដាលនេះ ធ្វើឡើងរយៈពេល ២ ថ្ងៃ គឺចាប់ពីថ្ងៃទី ១៨ ដល់ថ្ងៃទី ១៩ ខែកក្កដា ឆ្នាំ ២០២៣ ដោយបានសិក្សាជាមួយគ្រូជនជាតិកូរ៉េ។
ជាមួយគ្នានោះដែរ នាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡា បានធ្វើការកោតសរសើរ និងថ្លែងអំណរគុណ ដល់ក្រសួងអប់រំនៃសាធារណរដ្ឋកូរ៉េក្រោមការអនុវត្តគម្រោងដោយវិទ្យាស្ថាន APEC for Collaborative Education (IACE) ដែលបានរៀបចំវគ្គបណ្ដុះបណ្ដាលនេះឡើងនឹងផ្ដល់ឱកាសឱ្យលោកគ្រូអ្នកគ្រូនៅកម្ពុជាបានចូលរួម ក៏ដូចជាការខិតខំនិងព្យាយាមសិក្សារបស់សិក្ខាកាមកម្ពុជាទាំង ៤០ រូប។
បន្ទាប់ពីបញ្ចប់វគ្គបណ្ដុះបណ្ដាលលោកគ្រូ អ្នកគ្រូនៅតែទទួលបានការគាំទ្រ និងការចែករំលែកពីភាគីកូរ៉េ អំពីផែនការសកម្មភាពក្នុងការបង្រៀននៅតាមសាលារៀនជាក់ស្តែងផងដែរ។
សូមបញ្ជាក់ផងដែរថា ក្រសួងអប់រំ យុវជន និងកីឡា បានចុះអនុស្សរណៈយោគយល់ជាមួយក្រសួងអប់រំនៃសាធារណរដ្ឋកូរ៉េ មានរយៈពេល ៤ ឆ្នាំ ២០២០–២០២៤ ហើយត្រូវបានអនុវត្តនៅសាលាបឋមសិក្សាវត្តបូព៌ ខេត្តសៀមរាប ក្នុងគោលបំណងផ្ដល់ឱកាសសិក្សារៀនសូត្រប្រកបដោយគុណភាព និងសមធម៌ តាមរយៈការបញ្ជ្រាបនិងប្រើប្រាស់ ICT សម្រាប់ការអប់រំ ដែលអាចជួយឱ្យគ្រូបង្រៀន និងសិស្សានុសិស្សពង្រឹងសមត្ថភាពឱ្យទាន់ការរីកចម្រើនយ៉ាងឆាប់រហ័សនៃបច្ចេកវិទ្យាពិភពលោក៕
.jpg)
