លោកស ខេង ក្នុងកិច្ចប្រជុំពីថ្ងៃទី ១ សីហា។ រូបថត ហ្វេសប៊ុកស ខេង
ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានធ្វើការប្រជុំឆ្លងសេចក្ដីព្រាងអនុក្រឹត្យស្ដីពីឯកសណ្ឋាន ស្លាកសញ្ញា និងសញ្ញាស័ក្តិ របស់មន្ដ្រីពន្ធនាគារ នាទីស្តីការក្រសួងមហាផ្ទៃ ដើម្បីធ្វើការណែនាំ និងពិនិត្យលើសេចក្តីព្រាងនេះ។
ជាមួយគ្នានោះដែរ លោក ស ខេង ក៏បានណែនាំដល់អគ្គនាយកដ្ឋានពន្ធនាគារ ត្រូវជ្រើសរើសពណ៌ឯកសណ្ឋានរបស់មន្ដ្រីពន្ធនាគារឱ្យបានសមស្រប មុនចេញអនុក្រឹត្យជាផ្លូវការ។
តាមរយៈក្រសួងមហាផ្ទៃ នៅថ្ងៃទី ១ ខែសីហា កិច្ចប្រជុំឆ្លងសេចក្ដីព្រាងអនុក្រឹត្យ ស្ដីពីឯកសណ្ឋាន ស្លាកសញ្ញា និងសញ្ញាស័ក្តិ របស់មន្ដ្រីពន្ធនាគារ ក៏មានការចូលរួមពីរដ្ឋលេខាធិការប្រចាំការ, រដ្ឋលេខាធិការ, អនុរដ្ឋលេខាធិការក្រសួងមហាផ្ទៃ, អគ្គនាយកដ្ឋានរដ្ឋបាល, អគ្គនាយកដ្ឋានពន្ធនាគារ និងអ្នកពាក់ព័ន្ធជាច្រើនរូបទៀតផងដែរ។
ក្នុងកិច្ចប្រជុំនោះ លោក ប៊ុន ហុន រដ្ឋលេខាធិការក្រសួងមហាផ្ទៃ បានធ្វើរបាយការណ៍ដល់អង្គប្រជុំពីដំណើរការនៃការត្រួតពិនិត្យ និងរៀបចំអនុក្រឹត្យស្ដីពីឯកសណ្ឋាន ស្លាកសញ្ញា និងសញ្ញាស័ក្តិរបស់មន្ដ្រីពន្ធនាគារ ស្របតាមមាត្រាទី ៨ នៃច្បាប់ ស្ដីពីពន្ធនាគារ ដែលចែងថា មន្ដ្រីពន្ធនាគារ ត្រូវមានឯកសណ្ឋាន សញ្ញាស័ក្តិ គ្រឿងបំពាក់ ឧបករណ៍ និងសម្ភារឱ្យសមស្រប។
លោកបន្ថែមថា៖ «ព្រោះហេតុដូច្នេះហើយបានជារាជរដ្ឋាភិបាលចេញអនុក្រឹត្យ ស្ដីពីឯកសណ្ឋាន ស្លាកសញ្ញា និងសញ្ញាស័ក្តិរបស់មន្ដ្រីពន្ធនាគារ ក្រសួងមហាផ្ទៃ ហើយក្រសួងមហាផ្ទៃ ក៏បានចេញសេចក្ដីប្រកាស ស្ដីពីការកំណត់រូបភាព របៀបប្រើប្រាស់ និងរបបផ្គត់ផ្គង់ ឯកសណ្ឋាន ស្លាកសញ្ញា សញ្ញាស័ក្តិ និងសម្ភារប្រើប្រាស់ផ្សេងៗរបស់មន្ដ្រីពន្ធនាគារ ក្រសួងមហាផ្ទៃ»។
លោក ស ខេង បានលើកឡើងតាមរយៈបណ្តាញសង្គមហ្វេសប៊ុករបស់លោកដោយបានធ្វើការណែនាំដល់ថ្នាក់ដឹកនាំនៃអគ្គនាយកដ្ឋានពន្ធនាគារត្រូវជ្រើសរើសពណ៌ឯកសណ្ឋាន របស់មន្ដ្រីពន្ធនាគារ ឱ្យបានសមស្រប មុនចេញនូវអនុក្រឹត្យជាផ្លូវការ។
ឆ្លៀតឱកាសនោះលោកក៏បានថ្លែងអំណរគុណចំពោះអគ្គនាយកដ្ឋានពន្ធនាគារ និងអ្នកពាក់ព័ន្ធទាំងអស់ ដែលបានធ្វើការសិក្សានូវសេចក្ដីព្រាងអនុក្រឹត្យ ស្ដីពីឯកសណ្ឋាន ស្លាកសញ្ញា និងសញ្ញាស័ក្តិ របស់មន្ដ្រីពន្ធនាគារក្រសួងមហាផ្ទៃ។
បើតាមការលើកឡើងពីលោក ប៊ុន ហុន អនុក្រឹត្យ និងសេចក្ដីប្រកាស បានអនុវត្តអស់រយៈពេលជាង ៨ ឆ្នាំមកហើយ ហើយកាលពីថ្ងៃទី ១០ ខែសីហា ឆ្នាំ ២០២០ ក្នុងឱកាស លោក ស ខេង ចូលរួមពិធីប្រកាសចូល កាន់មុខតំណែង អគ្គនាយកនៃអគ្គនាយកដ្ឋានពន្ធនាគារលោកក៏បានផ្ដល់អនុសាសន៍ឱ្យពិនិត្យ និងសិក្សាអំពីឯកសណ្ឋានពណ៌ឯកសណ្ឋានរបស់មន្ដ្រីពន្ធនាគារ ដើម្បីកុំឱ្យច្រឡំពណ៌ឯកសណ្ឋានមន្ដ្រីនគរបាលជាតិ។
លោក ប៊ុន ហុន បញ្ជាក់ថា ៖ «ដូចនេះ ទើបអគ្គនាយកដ្ឋានពន្ធនាគារបានបង្កើតក្រុមការងារមួយ ដើម្បីរៀបចំសេចក្ដីព្រាងកែសម្រួលអនុក្រឹត្យ ស្ដីពីពណ៌ឯកសណ្ឋាន ស្លាកសញ្ញា សញ្ញាស័ក្តិ និងប្រកាស ស្ដីពីការកំណត់រូបភាព របៀបប្រើប្រាស់ និងរបបផ្គត់ផ្គង់ ឯកសណ្ឋាន ស្លាកសញ្ញា សញ្ញាស័ក្តិ និងសម្ភារប្រើប្រាស់ផ្សេងៗ របស់មន្ដ្រីពន្ធនាគារក្រសួងមហាផ្ទៃ»។
ទាក់ទងនឹងឯកសណ្ឋានមន្ត្រីពន្ធនាគារនេះ លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ ថ្លែងថា ការធ្វើអនុក្រឹត្យរបស់ក្រសួងមហាផ្ទៃនេះ គឺត្រឹមត្រូវហើយ ព្រោះមន្ត្រីពន្ធនាគារត្រូវតែមានឯកសណ្ឋានសម្គាល់មួយសមរម្យ និងស្របតាមបទដ្ឋានស្តង់ដាអន្តរជាតិផងដែរ។
ទោះជាយ៉ាងណា លោក អំ សំអាត ក៏បានបញ្ជាក់ដែរថា ចំពោះការរៀបចំ ឱ្យមានឯកសណ្ឋានសមរម្យ គឺជារឿងមួយហើយ ប៉ុន្តែរឿងដែលសំខាន់ គឺមន្ត្រីអនុវត្តគួរតែទទួលបាននូវការបណ្តុះបណ្តាលផ្សេងៗ ដើម្បីធ្វើយ៉ាងណាឱ្យការគ្រប់គ្រងពន្ធនាគារ និងការការពារពន្ធនាគារ ឱ្យស្របទៅតាមបទដ្ឋានអន្តរជាតិ។
លោកថ្លែងថា៖ «មន្ត្រីពន្ធនាគារ គាត់មានឯកសណ្ឋានមួយ សម្រាប់សម្គាល់ ប៉ុន្តែបើនិយាយពីឋានន្តរស័ក្តិ យើងឃើញថា វាខុសប្លែកពីមន្ត្រីប៉ូលិស។ យើងឃើញថា បើមិនទាន់ដល់ផ្កាយទេ ស័ក្តិប្រហាក់ប្រហែលគ្នា ប៉ុន្តែដល់ផ្កាយមានលក្ខណៈខុសគ្នា។ យើងគ្រាន់តែថា ត្រូវដាក់យ៉ាងម៉េចដើម្បីឱ្យវាស្តង់ដា ងាយស្រួលសម្គាល់ និងចំណាំឱ្យបានច្បាស់ប៉ុណ្ណោះ»៕
.jpg)
