.jpg)
មន្រ្តីក្រសួងបរិស្ថាន និងមូលនិធិអាកាសធាតុបៃតង (GCF) បានជួបប្រជុំពិភាក្សាការងារទ្វេភាគីជាមួយគ្នានាពីថ្ងៃទី ៨ ខែសីហា ឆ្នាំ ២០២៣ នេះ។ រូបថត៖ ក្រសួងបរិស្ថាន
ភ្នំពេញៈ មន្រ្តីជាន់ខ្ពស់នៃក្រសួងបរិស្ថាន បានលើកឡើងថា កម្ពុជាបានដាក់ចេញនូវមាគ៌ាដ៏ច្បាស់លាស់ សម្រាប់សកម្មភាពអាកាសធាតុរបស់ខ្លួន ខណៈកម្ពុជាត្រូវការប្រមាណចន្លោះពី ៥០០ លានដុល្លារ ទៅ ១,៨ ពាន់លានដុល្លារអាមេរិក សម្រាប់ដំណើរការអនុវត្តយុទ្ធសាស្ត្រអព្យាក្រឹតកាបូនរយៈពេលវែង។
ការលើកឡើងនេះត្រូវបានធ្វើឡើងដោយ លោក ទិន ពន្លក រដ្ឋលេខាធិការក្រសួងបរិស្ថាន តាមរយៈកិច្ចប្រជុំការងារទ្វេភាគីជាមួយមូលនិធិអាកាសធាតុបៃតង(GCF)កាលពីថ្ងៃទី៨ ខែសីហា ឆ្នាំ២០២៣។
លោកទិន ពន្លក បានថ្លែងថា កម្ពុជាបានផ្តល់អាទិភាពខ្ពស់លើការងារប្រែប្រួលអាកាសធាតុដោយបានបញ្ចូលទៅក្នុងយុទ្ធសាស្ត្របញ្ចកោណថ្មីគ្របដណ្តប់លើទាំងសកម្មភាពបន្ស៊ាំនិងកាត់បន្ថយការបញ្ចេញឧស្ម័នផ្ទះកញ្ចក់។ នេះបើយោងតាម ក្រសួងបរិស្ថាន។
លោកបានបន្តថា៖«ដើម្បីសម្រេចកិច្ចការងារនេះ កម្ពុជាត្រូវការថវិកាប្រមាណ៧,៨ ពាន់លានដុល្លារអាមេរិកសម្រាប់អនុវត្តអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ(NDC) និងត្រូវការថវិកាចាប់ពី៥០០លានរហូត១,៨ពាន់លានដុល្លារសម្រាប់អនុវត្តយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូនផងដែរ»។
ឆ្លៀតឱកាសនោះដែរ មន្រ្តីជាន់ខ្ពស់នៃក្រសួងបរិស្ថាន ក៏បានបានស្នើឱ្យមូលនិធិអាកាសធាតុបៃតង (GCF)ផ្តល់អាទិភាពដើម្បីឈានទៅសម្រេចនូវការងារយុទ្ធសាស្រ្តអព្យាក្រឹតកាបូន តាមរយៈគម្រោងមួយចំនួន។ ក្នុងនោះរួមមាន៖ គម្រោងការបង្កើតមូលនិធិហិរញ្ញប្បទានអាកាសធាតុកម្ពុជា គម្រោងការផ្តល់អាទិភាពធនាគារឯកជនទទួលបានការទទួលស្គាល់ពី GCF គម្រោងប្រពន័្ធស្រោចស្រពបន្ស៊ាំនឹងអាកាសធាតុនិងកសិកម្មមានភាពធន់ប្រកបដោយនិរន្តរភាព គម្រោងការសម្រួលដល់អង្គភាពដែលស្នើសុំការទទួលស្គាល់ឡើងវិញពីGCF ហេដ្ឋារចនាម្ព័ន្ធ (ផ្លូវលំជនបទ) ធន់នឹងអាកាសធាតុ និងគម្រោងមួយចំនួនទៀតផងដែរ។
តាមរយៈកិច្ចប្រជុំនេះដែរ ក្រសួងបរិស្ថាន មូលនិធិអន្តរជាតិសម្រាប់ការអភិវឌ្ឍន៍វិស័យកសិកម្ម(IFAD) និងវិទ្យាស្ថានអភិវឌ្ឍន៍បៃតងសកល ក៏បានបើកិច្ចពិភាក្សារួមគ្នា ដើម្បីពិភាក្សាពីលទ្ធភាពកិច្ចសហការលើការងារប្រែប្រួលអាកាសធាតុឱ្យកាន់តែមានប្រសិទ្ធភាពថែមទៀតផងដែរ។
ក្រសួងបរិស្ថាន ក៏បានប្រកាសអនុវត្តយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន (Long-Term Strategy for Carbon Neutrality_LTS4CN)កាលពីខែកុម្ភៈ ឆ្នាំ២០២២ ដោយរំពឹងថានឹងជួយជំរុញកំណើនផលិតផលក្នុងស្រុកសរុប(GDP)ប្រចាំឆ្នាំរបស់ជាតិបានជិត ៣ភាគរយ និងអាចបង្កើតការងារបានជិត៥០ម៉ឺនកន្លែង នៅក្នុងឆ្នាំ២០៥០។
ទាក់ទងនឹងការអនុវត្តគម្រោងនេះ លោក សាយ សំអាល់ រដ្ឋមន្រ្តីក្រសួងបរិស្ថាន ធ្លាប់បានលើកឡើងនាពេលកន្លងមកថា កម្ពុជាកំពុងអនុវត្តយ៉ាងខ្ជាប់ខ្ជួននូវការប្តេជ្ញាចិត្តរបស់ខ្លួន ក្រោមអនុសញ្ញាក្របខ័ណ្ឌសហប្រជាជាតិស្តីពី ការប្រែប្រួលអាកាសធាតុ ខណៈកម្ពុជា ជាប្រទេសអភិវឌ្ឍន៍តិចតួចទី២ក្នុងពិភពលោក និងជាប្រទេសទី១ក្នុងតំបន់អាស៊ាន ដែលបានដាក់ចេញយុទ្ធសាស្រ្តនេះ ជាមួយនឹងគោលដៅឆ្នំា២០៥០ សម្រាប់ការបញ្ចេញឧស្ម័នស្មើសូន្យ៕
