សហគ្រិនខ្មែរ សហការជាមួយអង្គការមិនមែនរដ្ឋាភិបាលចំនួន ៣ ប្រកាសអនុវត្តគម្រោងជាផ្លូវការកាលពីថ្ងៃទី ១១ ខែសីហា។ រូបថត សហការី
ភ្នំពេញៈ សហគ្រិនខ្មែរ សហការជាមួយអង្គការមិនមែនរដ្ឋាភិបាលចំនួន ៣ រួមគ្នាអនុវត្តកម្មវិធីបណ្តុះធុរកិច្ចកសិកម្មខ្មែរសម័យថ្មី រយៈពេល ១៦ ខែ ដើម្បីលើកកម្ពស់សហគ្រិនភាព និងប្រើប្រាស់តួនាទីរបស់ធុរកិច្ចថ្មីក្នុងការផ្ដល់ផលិតផល ឬសេវាកម្មទាក់ទងទៅនឹងការជំរុញកសិកម្មឱ្យធន់នឹងអាកាសធាតុ និងក្សេត្របរិស្ថានជូនដល់កសិករខ្នាតតូច។
ការប្រកាសអនុវត្តជាផ្លូវការនូវគម្រោងនេះ ត្រូវបានធ្វើឡើងកាលពីថ្ងៃទី ១១ ខែសីហា ឆ្នាំ ២០២៣ ដោយសហការជាមួយទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) អង្គការហេក្សកម្ពុជា (HEKS/EPER) និងការីតាសស្វ៊ីស (CARITAS Switzerland) ក្រោមគម្រោងនើឆ័រ (Nurture Project)។
សេចក្តីប្រកាសព័ត៌មានរួមដែល ភ្នំពេញ ប៉ុស្តិ៍ ទទួលបាននៅថ្ងៃទី ១៤ ខែសីហា បានឱ្យដឹងថា កសិករខ្នាតតូចនៅប្រទេសកម្ពុជា ងាយរងផលប៉ះពាល់ពីឥទ្ធិពលនៃបម្រែបម្រួលអាកាសធាតុ និងត្រូវការគំនិតនវានុវត្តន៍ថ្មីដែលអាចជួយពួកគេក្នុងការសម្របខ្លួន និងការធ្វើពិពិធកម្មទីផ្សារ។
សេចក្តីប្រកាស បានអះអាងថា៖«កម្មវិធីបណ្តុះ ធុរកិច្ចកសិកម្មខ្មែរសម័យថ្មីជំរុញនវានុវត្តន៍ផ្អែកលើតម្រូវការទីផ្សារ ដើម្បីឱ្យកសិករខ្នាតតូចទទួលបាននូវផលិតផល និងសេវាកម្មថ្មីដែលជំរុញកសិកម្មពួកគាត់ធន់នឹងអាកាសធាតុ ព្រមទាំងពង្រីកលទ្ធភាពចូលទៅកាន់ទីផ្សារក្នុងគោលដៅសម្របខ្លួន និងកាត់បន្ថយហានិភ័យនៃបម្រែបម្រួលអាកាសធាតុ»។
សេចក្តីប្រកាសនេះ ក៏បានឱ្យដឹងទៀតថា គម្រោងនេះ នឹងអនុវត្តក្នុងរយៈពេល ១៦ ខែ ដើម្បីចូលទៅបំពេញចន្លោះដ៏សំខាន់មួយទាក់ទងនឹងការជួយគាំទ្រដល់សហគ្រិនក្នុងការអភិវឌ្ឍ និងពង្រឹងផលិតផល សេវាកម្មអប្បបរមាដែលគាំទ្រកសិករខ្នាតតូចឱ្យមានភាពធន់នឹងអាកាសធាតុ។
លោក ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ បាននិយាយថា រាជរដ្ឋាភិបាលកម្ពុជា បាននិងកំពុងខិតខំអភិវឌ្ឍប្រព័ន្ធអេកូឡូស៊ីសហគ្រិន ដែលឆ្លើយតបទៅនឹងការប្រែប្រួលអាកាសធាតុ ខណៈនៅរក្សាលទ្ធភាពប្រកួតប្រជែង។
កម្មវិធីបណ្តុះធុរកិច្ចកសិកម្មខ្មែរសម័យថ្មីនេះ ត្រូវបានរៀបចំឡើង ដើម្បីនាំយកដំណោះស្រាយប្រកបដោយនវានុវត្តន៍មកពង្រឹងការដាំដុះឱ្យកាន់តែប្រសើរ។ កម្មវិធីនេះផ្ដោតលើអ្នកទទួលផលនៅតំបន់ជនបទនៃខេត្តគោលដៅចំនួន ៤ រួមមាន បាត់ដំបង បន្ទាយមានជ័យ ឧត្តរមានជ័យ និងព្រះវិហារ។ កម្មវិធីចែកជា ៣ ដំណាក់កាល រួមមាន វគ្គត្រៀមមុនកម្មវិធីបណ្តុះធុរកិច្ច វគ្គបណ្តុះធុរកិច្ច និងវគ្គការប្រឹក្សាយោបល់ក្រោយកម្មវិធី ដើម្បីធានាថា ធុរកិច្ចថ្មីទទួលបានការគាំទ្រក្នុងកម្រិតផ្សេងៗគ្នាលើការអភិវឌ្ឍផលិតផល ឬសេវាកម្មសម្រាប់កសិករខ្នាតតូច។
លោក Markus Buerill នាយកសហប្រតិបត្តិតំណាងទីភ្នាក់ងារ SDC បានថ្លែងថា កសិកម្មកម្ពុជាកំពុងប្រឈមមុខនឹងការកើនឡើនហានិភ័យនៃគ្រោះរាំងស្ងួត និងទឹកជំនន់ ទន្ទឹមនឹងការប្រែប្រួលអាកាសធាតុដែលកសិករខ្នាតតូចទទួលរងផលប៉ះពាល់ខ្លាំងជាងគេពីគ្រោះទាំងនោះ ទាមទារភាគីពាក់ព័ន្ធ ត្រូវរួមគ្នាប្តេជ្ញាចិត្តគាំទ្រការសម្របប្រព័ន្ធផលិតកម្មរបស់កសិករកម្ពុជាទៅនឹងហានិភ័យទាំងនេះ។
លោកថ្លែងថា៖ «ការពិតយើងមានបច្ចេកវិទ្យា និងសេវាកម្មដែលមានស្រាប់នៅក្នុងទីផ្សារ ប៉ុន្តែយើងចាំបាច់ត្រូវធ្វើឱ្យបច្ចេកវិទ្យា និងសេវាកម្មទាំងនោះអាចទៅដល់កសិករខ្នាតតូច និងអាចសម្របខ្លួនទៅនឹងបរិបទក្នុងទីជនបទនៅប្រទេសកម្ពុជា។ យើងជឿជាក់ថា តាមរយៈកម្មវិធីនេះយើងនឹងអាចគាំទ្រដល់ធុរកិច្ចថ្មី និងក្រុមហ៊ុននានា ដើម្បីពង្រីកផលិតផលរបស់ពួកគេជាមួយបច្ចេកវិទ្យា និងសេវាកម្មដ៏មានភាពសម្បូរបែប ទំនើប ធន់នឹងអាកាសធាតុ។ នេះមិនត្រឹមតែជាការរួមចំណែកដ៏សំខាន់ដល់ការបន្ស៊ាំនឹងការប្រែប្រួលអាកាសធាតុប៉ុណ្ណោះទេ ប៉ុន្តែវាក៏នឹងបង្កើតបរិយាកាសទីផ្សារដែលគាំទ្រដល់ជីវភាពរស់នៅប្រកបដោយភាពធន់ផងដែរ»។
លោក Julien Brewster នាយកប្រចាំតំបន់មេគង្គនៃអង្គការហេក្ស ថ្លែងថា ទោះបីជាមានការរីកចម្រើនគួរឱ្យកត់សម្គាល់នៃសហគ្រិនភាពក្នុងវិស័យកសិកម្មក្នុងទសវត្សរ៍កន្លងមកក៏ដោយ ក៏ធុរកិច្ច និងក្រុមហ៊ុន នៅតែប្រឈមមុខនឹងបញ្ហាក្នុងការពង្រីកផលិតផល និងសេវាកម្មដែលមានរួមបញ្ចូលដំណោះស្រាយដែលធន់នឹងអាកាសធាតុ ដូចជាគ្រាប់ពូជ ម៉ាស៊ីនបូមទឹកដើរដោយពន្លឺព្រះអាទិត្យ និងជីសរីរាង្គទៅកាន់ទីជនបទ និងតំបន់ដាច់ស្រយាល។
លោកថ្លែងថា៖ «កម្មវិធី នឹងផ្ដល់ជូនទៅដល់ធុរកិច្ចកសិកម្ម និងក្រុមហ៊ុនជាមួយនឹងតម្រូវការចាំបាច់ដូចជា ជំនាញ ចំណេះដឹង ការណែនាំ ទំនាក់ទំនងក្នុងវិស័យ និងឱកាសស្វែងរកមូលនិធិ។ ការណ៍នេះនឹងជួយធ្វើឱ្យកសិករខ្នាតតូចមានភាពធន់នឹងផលប៉ះពាល់នៃការប្រែប្រួលអាកាសធាតុ ធ្វើឱ្យជីវភាពរបស់ពួកគេប្រសើរឡើង»៕
