លោក យ៉ង សាំងកុមារ (អាវខៀវ) ពេលចុះជួបតំណាងកសិករនៅជនបទកន្លងមក។ រូបថត ហ្វេសប៊ុក Yang Saing Koma
ភ្នំពេញៈ លោកយ៉ង សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានលើកឡើង ថា លោកបានចូលរួមជាមួយរាជរដ្ឋាភិបាលកាលពីខែធ្នូ ឆ្នាំ ២០២២ ក្នុងបេសកកម្មចូលរួមអភិវឌ្ឍន៍កសិកម្មកម្ពុជា ដោយចាប់ផ្តើមពីវិស័យស្រូវអង្ករ និងមានផែនការចូលរួមធ្វើការគាំទ្រកសិករឱ្យបាន ១ លានគ្រួសារនៅទូទាំងប្រទេសដើម្បីលើកស្ទួយផលិតកម្មកសិកម្មនិងប្រាក់ចំណូល។ នេះបើយោងតាមហ្វេសប៊ុកលោកយ៉ង សាំងកុមារ។
លោកបានសរសេរ នៅលើហ្វេសប៊ុករបស់លោកនៅថ្ងៃទី ២៤ សីហាថា៖«សម្រាប់រាជរដ្ឋាភិបាលអាណត្តិថ្មីនេះ ខ្ញុំត្រូវធ្វើការជ្រើសរើសរវាងតំណែងរដ្ឋមន្ត្រីប្រតិភូអមនាយករដ្ឋមន្ត្រី ឬរដ្ឋលេខាធិការ។ ពេលនេះខ្ញុំបានសម្រេចចិត្តជ្រើសរើសយកតំណែងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទដើម្បីចូលរួមប្រឡូកផ្ទាល់ក្នុងការអនុវត្តគោលនយោបាយអាទិភាពរបស់រាជរដ្ឋាភិបាល គឺអាទិភាពទី ៥ និងទី ៦ ដែលជាកម្មវិធីគោលនយោបាយកសិកម្ម»។
នៅក្នុងកម្មវិធីគោលនយោបាយអាទិភាពទាំង ៦ ចំណុច របស់រាជរដ្ឋាភិបាលនីតិកាលទី ៧ ដែលត្រូវបានប្រកាសដាក់ឱ្យប្រើប្រាស់ដោយលោកនាយករដ្ឋមន្ត្រីហ៊ុន ម៉ាណែត នៅក្នុងកិច្ចប្រជុំពេញអង្គគណៈរដ្ឋមន្ត្រីលើកដំបូងកាលពីថ្ងៃទី ២៤ សីហា ត្រង់ចំណុចទី ៥ បានចែងថា «ការដាក់ចេញនូវយន្តការសម្របសម្រួលនិងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ»។
ចំណែកចំណុចទី ៦ ចែងថា «ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ សង្កាត់ដែលមានសកម្មភាពកសិកម្មនៅទូទាំងប្រទេសនិងការរៀបចំឱ្យមានសមាគមកសិករនៅតាមជនបទ»។
លោករដ្ឋលេខាធិការ លើកឡើងថា៖«យើងមានផែនការដាក់ពង្រាយមន្ត្រីជំនាញកសិកម្មចំនួន ១ ៦០០ នាក់នៅទូទាំងប្រទេសដើម្បីធ្វើការជាមួយកសិករជាង ១ លានគ្រួសារ»។
បន្ថែមពីនេះ លោកយ៉ង សាំងកុមារ បានគូសបញ្ជាក់ពីគោលបំណងរបស់លោកថា៖«ខ្ញុំនឹងខិតខំចូលរួមជាមួយឯកឧត្តមរដ្ឋមន្ត្រី ឌិត ទីណា និងថ្នាក់ដឹកនាំក្រសួងទាំងអស់ក្នុងការដឹកនាំអនុវត្តន៍កម្មវិធីគោលនយោបាយទាំង ២ ខាងលើនេះឱ្យបានជោគជ័យដើម្បីវិស័យកសិកម្ម ជីវភាពកសិករ និងសន្តិសុខស្បៀង សម្រាប់សង្គមជាតិយើងទាំងមូល»៕
.jpg)
