សកម្មភាពការប្រកួតប្រដាល់គុនខ្មែរ កាលពីថ្ងៃទី២២ សីហា ឆ្នាំ២០២៣។ រូបថត យូសុះ អាប់ឌុល រ៉ាស់ហ៊ីម
ភ្នំពេញៈសហព័ន្ធគុនខ្មែរអន្តរជាតិ ក្រោមកិច្ចសហការពីក្រសួងអប់រំ យុវជន និងកីឡា ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ និងគណៈកម្មាធិការជាតិអូឡាំពិកកម្ពុជា (NOCC) នឹងរៀបចំការប្រកួតប្រដាល់គុនខ្មែរជើងឯកពិភពលោកឆ្នាំ២០២៣ (Kun Khmer World Championship2023) នៅលើគុនខ្មែរអន្តរជាតិ បន្ទាប់ពីបានអាក់ខានរៀបចំការប្រកួតគុនខ្មែរជើងឯកពិភពលោកនេះ ចំនួន ២ ឆ្នាំ ហើយ បន្ទាប់ពីព្រឹត្តិការណ៍នេះ ត្រូវបានធ្វើឡើងចំនួន៣លើកកន្លងមក។
ចំណែកការរៀបចំឱ្យមានការប្រកួតជាថ្មីនេះ គឺមានទ្រង់ទ្រាយធំជាងការប្រកួត៣លើកកន្លងមក ព្រោះប្រទេសចំនួន ៥៩ នៅគ្រប់ទ្វីប សុទ្ធតែត្រូវបានអញ្ជើញឱ្យមកចូលរួមក្នុងព្រឹត្តិការណ៍នេះ។
លោក មាម រ៉ា ប្រធានសហព័ន្ធគុនខ្មែរអន្តរជាតិ បានប្រាប់ ភ្នំពេញ ប៉ុស្តិ៍ កាលពីថ្ងៃទី ២៨ ខែសីហា ថា គ្រប់ប្រទេសជាសមាជិករបស់សហព័ន្ធគុនខ្មែរអន្តរជាតិ ទាំងនៅទ្វីបអាស៊ី ទ្វីបអាមេរិក ទ្វីបអឺរ៉ុប ទ្វីបអាហ្រ្វិក និងទ្វីបអូសេអានី សុទ្ធតែត្រូវបានញ្ជើញឱ្យមកចូលរួមការប្រកួតនេះ ហើយអ្វីដែលយើងទទួលបាននៅពេលនេះ គឺប្រទេសភាគច្រើន មានបំណងបញ្ជូនប្រតិភូមកចូលរួមការប្រកួតនេះ។
លោកបានបញ្ជាក់ថា៖ «នេះជាការប្រកួតប្រចាំឆ្នាំរបស់សហព័ន្ធ ប៉ុន្តែការរៀបចំលើកនេះ មានលក្ខណៈធំជាងមុន ហើយការប្រកួតប្រជែងក៏ខ្លាំងជាងមុន ដោយសារពេលនេះ យើងទទួលបានសមាជិកច្រើន បន្ទាប់ពីព្រឹត្តិការណ៍ស៊ីហ្គេម បានបញ្ចប់ ហើយគិតមកដល់ពេលនេះ មានប្រទេសជាង ១០ ហើយ បានឆ្លើយតប សម្រាប់ការមកចូលរួម ហើយដោយសារយើងទុកពេលឱ្យពួកគាត់រៀបចំក្រុមកីឡា រហូតដល់ពាក់កណ្តាលខែតុលានោះ អ៊ីចឹងចំនួនប្រទេសចូលរួមនឹងមានការកើនឡើងថែមទៀត ដែលយើងជឿថា ប្រទេសជាច្រើន នៅគ្រប់ទាំង ៥ ទ្វីប នឹងមកចូលរួមការប្រកួតនេះ»។
តាមការបញ្ជាក់របស់លោក មាម រ៉ា បានឱ្យដឹងថា ការប្រកួត Kun Khmer World Championship 2023 នេះ គឺមានលំនាំការប្រកួតដូចស៊ីហ្គេមដែរ ប៉ុន្តែវិញ្ញាសាប្រកួតមានច្រើនជាង ដោយសារព្រឹត្តិការណ៍នេះ មានទាំងការប្រកួតរបស់ក្រុមកីឡាអាយុក្រោម១៧ ឆ្នាំ និងក្រុមអាយុពី ១៧ ដល់ ៣៧ ឆ្នាំ ហើយការប្រកួតត្រូវបានបែងចែកជា៣ប្រភេទ គឺការប្រកួតបែបស្ម័គ្រចិត្ត ពាក់កណ្តាលអាជីព និងលក្ខណៈអាជីព ហើយកម្ពុជាមានឆន្ទៈខ្ពស់ ក្នុងការរៀបចំព្រឹត្តិការណ៍នេះឱ្យបានល្អ ដើម្បីផ្សព្វផ្សាយ «គុនខ្មែរ» ទៅកាន់ពិភពលោក ឱ្យកាន់តែទូលំទូលាយថែមទៀត។
លោក មាម រ៉ា បានបន្ថែមថា៖ «យើងនឹងរៀបចំព្រឹត្តិការណ៍នេះ ឱ្យបានល្អ ដោយយើងនឹងវិលទៅធ្វើនៅខេត្តសៀមរាប ព្រោះទីនោះ យើងមានសង្វៀន និងការរៀបចំតាមបែបស្តង់ដាគុនខ្មែររបស់យើងរួចហើយ ដោយមានការសហការពីក្រសួងអប់រំ យុវជន និងកីឡា ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ និង NOCC គឺយើងនឹងធ្វើឱ្យបានកាន់តែល្អ ទៅតាមលក្ខខណ្ឌ និងបទបញ្ជានៃការប្រកួតប្រដាល់គុនខ្មែររបស់យើង»។
តាមគម្រោង ការប្រកួត Kun Khmer World Championship 2023 នឹងត្រូវរៀបចំរយៈពេល៣ថ្ងៃ ក្នុងអំឡុងពេលពិធីបុណ្យអុំទូក គឺថ្ងៃទី ២៦ ដល់ទី ២៨ ខែវិច្ឆិកា នៅសង្វៀន ១ កន្លែងក្បែរព្រះអង្គចេកព្រះអង្គចម ដែលអាចផ្ទុកអ្នកទស្សនាបានជាង៥ពាន់នាក់ ដោយការប្រកួតនេះ នឹងត្រូវរៀបចំទៅតាមប្រភេទអាយុ និងទៅតាមចំនួនកីឡាករ ដែលនឹងចុះឈ្មោះចូលរួម ហើយការប្រកួតដណ្តើមខ្សែក្រវាត់ ក៏ត្រូវបានដាក់ឱ្យមាន នៅក្នុងព្រឹត្តិការណ៍ដ៏ធំមួយនេះផងដែរ។
ចំពោះការងារនេះ លោក មាម រ៉ា បានបញ្ជាក់ថា៖ «សម្រាប់ការប្រកួតទាំង៣ថ្ងៃនេះ យើងមានរៀបចំការប្រកួតជើងឯកអាជីព ដោយយើងនឹងជ្រើសរើសកីឡាករល្អៗរបស់យើងឱ្យប្រកួតជាមួយកីឡាករ មកពីតាមបណ្តាប្រទេសផ្សេងៗ ដោយ១ថ្ងៃ យើងអាចប្រកួត៥គូ អ៊ីចឹង៣ថ្ងៃ យើងត្រូវការកីឡាករជើងខ្លាំងរបស់កម្ពុជាចំនួន១៥នាក់ ហើយក្នុងនោះ មានប្រភេទគីឡូខ្លះ ត្រូវដាក់ឱ្យប្រកួតដណ្តើមខ្សែក្រវាត់»។
យ៉ាងណាក៏ដោយ លោក មៀម រ៉ា បានទម្លាយឱ្យដឹងថា សម្រាប់ប្រភេទកីឡា ដែលត្រូវវ៉ៃដណ្តើមខ្សែក្រវាត់នេះ គឺនៅមិនទាន់បានកំណត់ច្បាស់នៅឡើយទេ ដោយរង់ចាំការពិភាក្សាគ្នាបន្ថែមទៀត ប៉ុន្តែលោកបានបង្ហើបថា សម្រាប់សហព័ន្ធគុនខ្មែរអន្តរជាតិ ចង់រៀបចំការប្រកួតបែបពាក់កណ្តាលអាជីពឱ្យបានច្រើន។
លោកបានសង្កត់ធ្ងន់ថា៖ «យើងចង់អភិវឌ្ឍកីឡាករពាក់កណ្តាលអាជីពច្រើនជាង ព្រោះទិសដៅរបស់សហព័ន្ធគុនខ្មែរអន្តរជាតិ គឺអភិវឌ្ឍ និងអប់រំកាយផ្នែកកីឡា ដែលស្របតាមគន្លងរបស់អូឡាំពិក។ មានន័យថា យើងនៅតែធ្វើតាមការស្ម័គ្រចិត្ត ហើយនៅពេលយើងទទួលបានការគាំទ្រគ្រប់ចំនួនប្រទេស យើងនឹងដាក់ពាក្យស្នើទៅអូឡាំពិកអន្តរជាតិ ដើម្បីឱ្យទទួលស្គាល់គុនខ្មែររបស់យើង»។
ទឹកដីអង្គរ ក្នុងខេត្តសៀមរាប នាចុងខែវិច្ឆិកា ខាងមុខនេះ ដើម្បីពង្រីកវិសាលភាពកីឡាជាអត្តសញ្ញាណជាតិមួយនេះ ឱ្យមានការទទួលស្គាល់ពីគណៈកម្មាធិការជាតិអូឡាំពិកអន្តរជាតិ។
ដោយសារតែវិបត្តិជំងឺកូវីដ ១៩ ធ្វើឱ្យសហព័ន្ធជាមួយគ្នានេះដែរ លោក វ៉ាត់ ចំរើន អគ្គលេខាធិការ NOCC និងជាអគ្គលេខាធិការសហព័ន្ធគុនខ្មែរអន្តរជាតិ ធ្លាប់បានអះអាងថា ការផ្សព្វផ្សាយ «គុនខ្មែរ» ទៅកាន់ពិភពលោក វាជារឿងដ៏សំខាន់ ដែលគ្រប់ភាគីត្រូវតែចូលរួមជួយទាំងអស់គ្នា ដើម្បីកម្ពុជា អាចដាក់ប្រភេទកីឡាអត្តសញ្ញាណមួយនេះចូលទៅជាប្រភេទកីឡាពេញនិយមរបស់អូឡាំពិក ហើយនេះក៏ជាជំហានទាក់ទាញភ្ញៀវទេសចរបែបកីឡា មកទស្សនានៅកម្ពុជា កាន់តែច្រើនផងដែរ។
លោក វ៉ាត់ ចំរើន ដែលជារដ្ឋលេខាធិការក្រសួងអប់រំ យុវជន និងកីឡា ផងនោះ បានថ្លែងថា៖«យើងឃើញមានបរទេសមកចូលរួមជាមួយគុនខ្មែររបស់យើង កាន់តែច្រើន ហើយបើចំនួនគាំទ្រនេះ បានកើនដល់ ៧៤ ប្រទេស យើងនឹងដាក់ពាក្យទៅអូឡាំពិក ឱ្យគេទទួលស្គាល់ក្បាច់គុនរបស់យើង អ៊ីចឹងការវិវឌ្ឍនេះឱ្យវាទន្ទឹមគ្នា គឺបើប្រទេសយើងមានហេដ្ឋារចនាសម្ព័ន្ធកីឡា កាន់តែច្រើន ស្តង់ដាល្អ ទេសចរនឹងមក ជាពិសេសកីឡាករ ដែលនៅស្រុកត្រជាក់ ព្រោះនៅស្រុកគេ ៦ ខែត្រជាក់ ដូច្នេះគេរកនៅស្រុកក្តៅណា ដែលអាចមកហាត់រាប់រយ រាប់ពាន់ នៅក្នុង ១ ឆ្នាំៗ»៕
