លោក ស សុខា ក្នុងពិធីប្រកាសចូលកាន់តំណែងអគ្គស្នងការនគរបាលជាតិពីថ្ងៃ ២៨ សីហា។ រូប ក្រសួងមហាផ្ទៃ
ភ្នំពេញៈ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានដាក់ចេញគោលការណ៍ណែនាំមួយចំនួន ដើម្បីពង្រឹងប្រសិទ្ធភាពការងារមន្ត្រីនគរបាលជាតិបន្ថែមទៀត។ ការប្រកាសដាក់ចេញគោលការណ៍ណែនាំនេះគឺធ្វើឡើងក្នុងពិធីប្រកាសចូលកាន់មុខតំណែង អគ្គស្នងការនៃអគ្គស្នងការដ្ឋាននគរបាលជាតិ កាលពីរសៀលថ្ងៃទី ២៨ សីហា ឆ្នាំ ២០២៣។
យោងតាមក្រសួងមហាផ្ទៃ ការដាក់ចេញគោលការណ៍នេះ គឺដើម្បីលើកកម្ពស់ប្រសិទ្ធភាពស្មារតីទទួលខុសត្រូវ ក្នុងការអនុវត្តតួនាទីភារកិច្ចក្នុងការរួមចំណែកសម្រេចឱ្យបានជោគជ័យនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី ១ នៃរាជរដ្ឋាភិបាលនីតិកាលទី៧ នេះ។
លោក ស សុខា លើកឡើងថា ៖ «គោលការណ៍សំខាន់ទាំងនេះ ដូចជាការបន្តខិតខំរួមគ្នាថែរក្សាសុខសន្តិភាព ស្ថិរភាពនយោបាយ ការពារឯករាជ្យ អធិបតេយ្យភាពបូរណភាពទឹកដី ព្រមទាំងទប់ស្កាត់ និងប្រឆាំងដាច់ខាតរាល់សកម្មភាពប៉ុនប៉ងផ្តួលរំលំរាជរដ្ឋាភិបាលស្របច្បាប់ ឬការញុះញង់ណាមួយ ដើម្បីបង្កអស្ថិរភាពក្នុងសង្គម»។
លោកបន្តថា ត្រូវបង្កើនការថែរក្សាពង្រឹងសន្តិសុខជាតិដោយត្រូវបង្កើនកិច្ចសហប្រតិបត្តិការជាមួយអាជ្ញាធរ និងកម្លាំងអនុវត្តច្បាប់រវាងប្រទេសនានាក្នុងតំបន់ និងពិភពលោកដើម្បីផ្លាស់ប្តូរព័ត៌មាន សហការទប់ស្កាត់អំពើភេរវកម្ម ឧក្រិដ្ឋកម្មឆ្លងដែន និងបទល្មើសឆ្លងដែននានា ពិសេសដោះស្រាយបញ្ហាព្រំដែនគោក និងទឹកជាមួយប្រទេសជិតខាងដែលនៅសេសសល់ដោយផ្អែកលើមូលដ្ឋានច្បាប់អន្តរជាតិ។
លោកឧបនាយករដ្ឋមន្ត្រីបានបន្តថា មន្ត្រីនគរបាលជាតិ ក៏ត្រូវពង្រឹងការងារនគរបាល និងសហគមន៍សំដៅជំរុញអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» បង្ការ និងបង្ក្រាបបទល្មើសនានានៅតាមសហគមន៍ និងណែនាំដល់កងកម្លាំងនគរបាលជាតិ ដោយត្រូវលើកកម្ពស់កិច្ចសហប្រតិបត្តិការឱ្យកាន់តែខ្លាំងក្លាថែមទៀត ដើម្បីសិក្សាពីបទពិសោធន៍ក្នុងការបង្ក្រាប និងការស្តារនីតិសម្បទាអ្នកញៀនគ្រឿងញៀនឱ្យមានប្រសិទ្ធភាព។
លោក ស សុខា បានថ្លែងថា៖ «មន្ត្រីនគរបាលត្រូវបន្តបង្កើនវិធានការអប់រំ វិធានការរដ្ឋបាល និងវិធានការច្បាប់ឱ្យបានម៉ឺងម៉ាត់ ដើម្បីពង្រឹងសុវត្ថិភាពចរាចរណ៍ផ្លូវគោក និងសណ្តាប់ធ្នាប់តាមដងផ្លូវក្នុងទីក្រុង ទីប្រជុំជនដើម្បីដោះស្រាយភាពកកស្ទះ និងកាត់បន្ថយគ្រោះថ្នាក់ចរាចរណ៍និងត្រូវបន្តផ្តល់ការអន្តរាគមន៍សង្គ្រោះ និងដោះស្រាយបញ្ហាអគ្គិភ័យ ព្រមទាំងគ្រោះថ្នាក់នានាក្នុងសង្គម ដើម្បីរក្សាសុវត្ថិភាពជូនប្រជាពលរដ្ឋ»។
តាមរយៈកម្មវិធីនេះដែរ លោក ស សុខា ក៏បានបន្តណែនាំដល់មន្ត្រីនគរបាលជាតិ ឱ្យបន្តជំរុញការកែទម្រង់កម្លាំងនគរបាលជាតិ ដោយយកចិត្តទុកដាក់បណ្តុះបណ្តាលកងកម្លាំងនគរបាលជាតិ ឱ្យមានសមត្ថភាពជំនាញ វិជ្ជាជីវៈច្បាស់លាស់ គោរពឱ្យបានខ្ជាប់ខ្ជួនវិន័យកងកម្លាំងឱ្យបានត្រឹមត្រូវ និងមានតម្លាភាពផងដែរ។
ជុំវិញរឿងនេះ លោក អំ សំអាត នាយកទទួលបន្ទុកកិច្ចការទូទៅ នៃអង្គការលីកាដូបានថ្លែងនៅថ្ងៃទី ២៩ ខែសីហាថា ការប្រកាសដាក់ចេញគោលការណ៍ណែនាំទាំងនេះ គឺជារឿងមួយល្អ ពិសេសការយកចិត្តទុកដាក់លើការពង្រឹង និងទប់ស្កាត់បទល្មើសឆ្លងដែននានា ការពង្រឹងភូមិ ឃុំ មានសុវត្ថិភាព គឺជារឿងដែលត្រូវតែពង្រឹងឱ្យមានប្រសិទ្ធភាពបន្ថែម។
យ៉ាងណាក្តីបើទោះជាកន្លងមក មានការយកចិត្តទុកដាក់ពីនគរបាលជាតិលើកិច្ចការជាច្រើន ប៉ុន្តែ លោក អំ សំអាត យល់ថា៖ «ដើម្បីធ្វើឱ្យគោលការណ៍ទាំងនេះមានប្រសិទ្ធភាពទៅបាន គឺចាំបាច់ត្រូវតែមានកិច្ចសហការជាមួយមន្ត្រីនគរបាលគ្រប់ផ្នែកឱ្យបានល្អត្រូវបង្កើតឱ្យមានវគ្គបណ្តុះបណ្តាល និងជំនាញផ្សេងៗដល់មន្ត្រីនគរបាលឱ្យមានវិជ្ជាជីវៈ និងលុបបំបាត់អំពើពុករលួយ»។
លោកបន្តថា៖ «បើអំពើពុករលួយនៅតែកើតមានទៅលើបញ្ហាបទល្មើសគ្រឿងញៀន ការជួញដូរមនុស្ស និងបញ្ហាបទល្មើសផ្សេងៗ យើងនឹងមិនអាចធានាសុវត្ថិភាពជូនពលរដ្ឋបានទេ»៕
