.jpg)
លោក ហង់ ជួនណារ៉ុន ក្នុងជំនួបជាមួយភាគីប្រទេសម៉ាលី កាលពីថ្ងៃទី២ កញ្ញា ។ រូបថត ក្រសួងអប់រំ
ភ្នំពេញៈលោកឧបនាយករដ្ឋមន្ដ្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថានៅពេលខាងមុខកម្ពុជា នឹងបង្កើតកិច្ចសហប្រតិបត្តិការគ្នារវាងសាលារៀននៅប្រទេសម៉ាលីជាមួយនឹងសាលាជំនាន់ថ្មី ខណៈវិស័យអប់រំឯកជននៅកម្ពុជាក៏បង្ហាញការគាំទ្រផងដែរ។
លោក ហង់ជួន ណារ៉ុន បានលើកឡើងពីគម្រោងក្នុងការបង្កើតកិច្ចសហប្រតិបត្តិការជាមួយនឹងប្រទេសម៉ាលី លើផ្នែកអប់រំនេះ ក្នុងពេលលោកជួបសំណេះសំណាលជាមួយនឹងអតីតស្ថាបនិកអង្គការ CDRI លោកស្រី EvaMysliwiec និងនាយកសាលា Samdech Hun Sen School Complex នៃប្រទេសម៉ាលីកាលពីថ្ងៃទី២ ខែកញ្ញា កន្លងមក។
ជុំវិញរឿងនេះ លោក គង់ សំនៀង ប្រធានសហព័ន្ធសេវាអប់រំកម្ពុជាបានថ្លែងនៅថ្ងៃទី៤ ខែកញ្ញាថា ថ្វីដ្បិតតែប្រទេសម៉ាលីមានកម្រិតនៃការអប់រំនៅទាបជាងកម្ពុជាដោយសារប្រទេសនេះទើបតែងើបពីសង្គ្រាមនិងត្រូវការកិច្ចសហការនានាលើការពង្រឹងធនធានមនុស្សលើវិស័យអប់រំបន្ថែមក្ដី ប៉ុន្តែលោកគាំទ្រឱ្យក្រសួងលើកកម្ពស់កិច្ចសហការជាមួយផងដែរ។
លោកបានបញ្ជាក់ថា៖«តាមរយៈសាលាដែលសម្តេចបានជួយដល់ប្រទេសម៉ាលីកន្លងមកគឺជាការជួយជាហេដ្ឋារចនាសម្ព័ន្ធរឹង មិនទាន់មានហេដ្ឋារចនាសម្ព័ន្ធទន់នៅឡើយទេ ហេតុនេះក្រសួងគាត់កំពុងខំឱ្យមានកិច្ចសហការបន្ថែមលើជំនាញទន់»។
លោក គង់ សំនៀង បានបន្តថា ជំនាញទន់មានដូចជា កម្មវិធីសិក្សា កម្មវិធីបណ្តុះបណ្តាលគ្រូ វិធីសាស្ត្រអប់រំថ្មីៗជាដើម ដោយលោកលើកឡើងថា តាមរយៈការជួយនេះគឺជាជម្រើសដ៏ល្អមួយរបស់រដ្ឋាភិបាលកម្ពុជាដែលបង្ហាញពីការចែករំលែកពីការធ្វើកំណែទម្រង់អប់រំល្អៗទៅកាន់ប្រទេសដែលកំពុងត្រូវការជំនួយ។
បន្ថែមពីនេះ លោកបានថ្លែងថាការបង្កើតកិច្ចសហប្រតិបត្តិការលើវិស័យអប់រំនេះក៏នឹងជួយលើកកម្ពស់មុខមាត់កម្ពុជាលើផ្នែកអន្តរជាតិដោយលោកក៏បានជំរុញឱ្យកម្ពុជាបង្កើនកញ្ចប់ជំនួយណាមួយជួយដល់ប្រទេសទន់ខ្សោយថែមទៀតប្រើសិនបើមានលទ្ធភាព។
យោងតាមការជូនដំណឹងរបស់ក្រសួងអប់រំ លោក ហង់ជួន ណារ៉ុន បានលើកឡើងថា ជំនួបនាពេលនេះគឺក្នុងគោលបំណងធ្វើកិច្ចសហប្រតិបត្តិការជាមួយនឹងសាលានៅកម្ពុជាបន្ថែមទៀត។
លោករដ្ឋមន្ត្រីបានអះអាងថា៖«ដើម្បីឆ្លើយតបទៅនឹងការងារនេះ ក្រសួងអប់រំ យុវជន និងកីឡា នឹងបង្កើតឱ្យមានកិច្ចសហប្រតិបត្តិការរវាងសាលារៀននៅប្រទេសម៉ាលី ជាមួយនឹងសាលាជំនាន់ថ្មី ព្រះស៊ីសុវត្ថិ ដើម្បីលើកកម្ពស់ការបង្រៀនផ្នែក STEM »។
ទោះជាមិនបានបញ្ជាក់លម្អិតពីកិច្ចសហប្រតិបត្តិការនេះថានឹងចាប់ផ្តើមពេលណាឱ្យប្រាកដក៏ដោយ ប៉ុន្តែលោកហង់ជួន ណារ៉ុន លើកឡើងថា កិច្ចសហប្រតិបត្តិការនេះនឹងផ្ដោតសំខាន់លើការចែករំលែកបទពិសោធន៍របស់កម្ពុជាក្នុងការធ្វើកំណែទម្រង់សាលារៀន ជាពិសេសការបង្រៀនខាងផ្នែកវិធីសាស្ត្រនៃការបង្រៀន បច្ចេកវិទ្យា ការបណ្ដុះបណ្ដាលគ្រូ ការអនុវត្តវិធីសាស្ត្របង្រៀនថ្មី ការបណ្ដុះសិស្សនៅក្នុងការលើកកម្ពស់សមត្ថភាពសតវត្សរ៍ទី២១ដើម្បីលើកកម្ពស់គុណភាពអប់រំទ្វេភាគីឱ្យកាន់តែប្រសើរ។
សូមរំឭកថា កាលពីឆ្នាំ២០១៣ អតីតនាយករដ្ឋមន្ត្រីកម្ពុជា លោក ហ៊ុន សែនបានផ្តល់ជំនួយផ្នែកហិរញ្ញវត្ថុសម្រាប់សាងសង់សាលា១កន្លែង នៅទីក្រុងបាម៉ាកូ រដ្ឋធានីនៃប្រទេសម៉ាលី ដែលសាលានោះត្រូវបានឱ្យឈ្មោះថា Samdech Hun Sen School Complex។
សូមបញ្ជាក់ដែរថា មុខវិជ្ជា STEM គឺផ្ដោតលើផ្នែកជំនាញវិទ្យាសាស្ត្រ បច្ចេកវិទ្យា វិស្វករ និងគណិតវិទ្យា។
ពាក់ព័ន្ធនឹងមុខវិជ្ជានេះលោកនាយករដ្ឋមន្ត្រី ហ៊ុន ម៉ាណែត ក៏បានលើកឡើងកាលពីសប្តាហ៍មុនផងដែរពីការលើកកម្ពស់គុណភាពអប់រំដោយផ្តោតលើការពង្រឹងគុណភាពគ្រឹះស្ថានសិក្សារដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា។
លោកបានថ្លែងថា រាជរដ្ឋាភិបាលនឹងបន្តធ្វើកំណែទម្រង់លើគុណភាពអប់រំលើមុខវិជ្ជា STEM បន្ថែមទៀត ដើម្បីបណ្តុះបណ្តាលឱ្យសិស្សានុសិស្សមានភាពក្លាហាន ចេះស្រាវជ្រាវ និងចេះប្រើប្រាស់បច្ចេកវិទ្យាឌីជីថលពិសេសមានភាពច្នៃប្រឌិតខ្ពស់៕
