.jpg)
កិច្ចប្រជុំក្រុមប្រឹក្សាប្រាក់ឈ្នួលអប្បបរមា កាលពីថ្ងៃម្សិលមិញ។ រូបថត ក្រសួងការងារ
ភ្នំពេញៈ នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា អាណត្តិទី៣ លើកទី៣ ស្តីពីការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរនិងផលិតផលិតផលធ្វើដំណើរនិងកាបូប សម្រាប់ឆ្នាំ ២០២៤ តំណាងភាគីកម្មករនិយោជិត បានលើកឡើងនូវតួលេខចំនួន ២១៥ ដុល្លារ ខណៈដែលតំណាងភាគីនិយោជកបានលើកឡើងចំនួន ២០១ ដុល្លារ។
តាមរយៈសេចក្ដីប្រកាសព័ត៌មានស្តីពីលទ្ធផលនៃកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា របស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ៤ ខែកញ្ញា ឆ្នាំ ២០២៣ បានឱ្យដឹងថា ក្រុមប្រឹក្សាជាតិប្រាក់ឈ្នួលអប្បបរមា បានបន្តពិភាក្សាកំណត់ ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៤។ ភាគីទាំង ២ បានបន្តលើកហេតុផល និងបង្ហាញគោលជំហរផ្ទៃក្នុងរបស់ខ្លួនទៅវិញទៅមក ប្រកបដោយវិជ្ជាជីវៈ និងភាពចាស់ទុំអំពីសំណើរបស់ខ្លួន។
នៅក្នុងកិច្ចប្រជុំទាំង ៣ លើកនេះ តំណាងភាគីរាជរដ្ឋាភិបាលក៏បានសម្របសម្រួល និងផ្តល់នូវការពន្យល់បន្ថែមលើចំណុចនានា ដែលតំណាងភាគីកម្មករនិយោជិត និងតំណាងភាគី និយោជកមានចម្ងល់ផងដែរ។ ជាលទ្ធផល តំណាងភាគីកម្មករនិយោជិតបានលើកឡើងនូវតួលេខចំនួន ២១៥ ដុល្លារ និងតំណាងភាគីនិយោជក បានលើកឡើងនូវតួលេខចំនួន ២០១ ដុល្លារ។
ក្រោយចប់កិច្ចប្រជុំលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងប្រាប់អ្នកសារព័ត៌មានថា តួលេខដំបូង ២១៥ ដុល្លារ បានលើកឡើងដោយតំណាងកម្មករនិយោជិត និង ២០១ ដុល្លារ ផ្តល់ដោយតំណាងនិយោជក អាចនឹងមានការប្រែប្រួលបន្តទៀតសម្រាប់កិច្ចពិភាក្សាលើកទី៤។
លោកបញ្ជាក់ថា៖ «ភាគីក្រសួង ក៏ដូចជារដ្ឋាភិបាល នឹងខិតខំសម្របសម្រួល ដើម្បីឱ្យភាគី កាន់តែមានការយោគយល់ ដែលអាចឈានដល់ការកែសម្រួលតួលេខខាងលើនេះឱ្យកាន់តែកៀកគ្នាប្រហាក់ប្រហែល មុននឹងយើងឈានដល់ការសម្រេចបោះឆ្នោតឬក៏ឯកភាពគ្នា ជាឯកច្ឆន្ទនៅមុនពេលភ្ជុំបិណ្ឌខាងមុខនេះ»។
បើតាមលោករដ្ឋមន្ត្រី ក្រោយទទួលបានតួលេខនេះហើយ ភាគីទាំង ២ នឹងបន្តពិភាក្សាផ្ទៃក្នុងរៀងៗខ្លួនបន្ថែមទៀត មុននឹងដល់កិច្ចប្រជុំបន្ទាប់ នាថ្ងៃទី ១១ ខែកញ្ញា ឆ្នាំ ២០២៣។
លោក គឹម ចាន់សំណាង តំណាងភាគីនិយោជិតបានលើកឡើងថា ការស្នើសុំដំឡើងចំនួន ១៥ ដុល្លារ បន្ថែមពីលើនេះ គឺធ្វើឡើងដោយផ្អែកទៅលើលក្ខណវិនិច្ឆ័យទាំង ៧ ដែលការស្នើសុំនេះពុំមែនធ្វើឡើងដោយមិនមានទឡ្ហីករណ៍ច្បាស់លាស់នោះទេ។ លោកថា៖ «ការដាក់ចេញតួលេខនេះ គឺយើងឈរលើលក្ខណៈបច្ចេកទេសសិនប៉ុន្តែនេះគ្រាន់តែជាការដាក់ចេញតួលេខដំបូងសិន បន្តបន្ទាប់នឹងមានការពិភាក្សាគ្នាថែមទៀត ដើម្បីឈានដល់ការឯកភាពគ្នាដោយរីករាយ»។
នៅក្នុងកិច្ចប្រជុំនោះដែរ លោក អាត់ ធន ប្រធានសហភាពការងារកម្ពុជា (CLC) បានប្រាប់ឱ្យដឹងថា តួលេខចំនួន ២០១ ដុល្លារ ពីខាងតំណាងនិយោជក មានកម្រិតតិចតួចពេកប៉ុន្តែវាអាចជាការស្ទាបស្ទង់ពីនិយោជក ខណៈកន្លងទៅខាងតំណាងនិយោជក ថាមិនចង់ឱ្យមានការដំឡើងលើស ២០០ ដុល្លារនោះទេ។ លោកថា៖ «រាល់ឆ្នាំមានការដាក់លេខពីខាងតំណាងកម្មករនិយោជិត, ខាងតំណាងនិយោជក និងខាងរដ្ឋាភិបាល ប៉ុន្តែឆ្នាំនេះ ក្រសួងការងារមិនបានបញ្ចេញតួលេខទេ ដោយលើកហេតុផលថា ទុកលទ្ធភាពឱ្យភាគីជាអ្នកចរចា»។
លោក ណាង សុធី តំណាងភាគីនិយោជក ឱ្យដឹងថា ដំបូងឡើយ ខាងនិយោជកមិនមានគោលការណ៍ចង់បន្ថែមលើប្រាក់ឈ្នួលចាស់ ២០០ ដុល្លារនោះទេ ដោយឆ្លងកាត់តាមលក្ខខណ្ឌវិនិច្ឆ័យទាំង ៧ មក គឺមិនអាចដំឡើងបានទៀត តែដោយហេតុមានគោលការណ៍ណែនាំពីប្រមុខរាជរដ្ឋាភិបាល ទើបតំណាងនិយោជកសម្រេចថា បន្ថែម ១ ដុល្លារទៀត។
លោកថា៖«យើងធ្លាប់បានបញ្ជាក់ហើយថា មិនចង់ឱ្យមានការដំឡើងទេ ប្រាក់ឈ្នួលឆ្នាំនេះ ព្រោះការនាំចេញក្នុងវិស័យកាត់ដេរ មិនសូវល្អ តែដោយសារមានការណែនាំពីសម្តេចធិបតី ប្រមុខរាជរដ្ឋាភិបាល ទើបយើងដំឡើង ១ ដុល្លារ»។
ចំពោះការស្នើរបស់ភាគីតំណាងកម្មករនិយោជិត ១៥ ដុល្លារ លោក ណាង សុធី យល់ថា ជាតួលេខមួយដែលត្រូវមានការពិភាក្សាបន្តទៀត។
សូមជម្រាបថា នៅក្នុង ២០២៣ នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមាន ២០០ ដុល្លារ ក្នុង ១ ខែ ប្រសិនបើបូកនឹងប្រាក់អត្ថប្រយោជន៍ផ្សេងៗបន្ថែម កម្មករនិយោជិតម្នាក់ អាចទទួលបានប្រាក់ឈ្នួលចន្លោះពី ២១៧ ទៅ ២២៨ ដុល្លារ ក្នុង ១ ខែ៕
